༄༅། །ཕྱི་ལོ་ ༢༠༢༤ ཟླ་བ་ ༡༡ ཚེས་ ༡༩ ཉིན་འཕགས་བོད་འབྲེལ་མཐུད་ཚོགས་པའི་ (Bharat Tibbat Sahyog Manch) གོ་སྒྲིག་འོག་རྒྱ་གར་མངའ་སྡེ་ཨ་སམ་གྱི་རྒྱལ་ས་གུ་ཝཱ་ཧཱ་ཊིར་རྟ་དབང་གནས་སྐོར་ཐེངས་བཅུ་གསུམ་པ་དབུ་འཛུགས་གནང་ཡོད།
སྐབས་དེར་རྒྱལ་ཡོངས་སྤྱི་ཚོགས་ཞབས་ཞུ་ཚོགས་པའི་ཚོགས་མི་རྒན་པ་དང་། འཕགས་བོད་འབྲེལ་མཐུད་ཚོགས་པ་ཐོག་མར་དབུ་འཛུགས་གནང་མཁན་སྐུ་ཞབས་ཨེན་དྲེཤ་ཀུ་མཱར་ལགས་གཙོས་པའི་རྒྱ་གར་མངའ་སྡེ་ ༢༣ ནས་མི་གྲངས་ ༢༧༥ ལྷག་ཀྱིས་བོད་དོན་རྒྱབ་སྐྱོར་མཚོན་ཆེད་མཉམ་ཞུགས་གནང་ཡོད།
དེ་ཡང་མཛད་སྒོའི་ཐོག་མར་སྣང་སེལ་མར་མེ་ཞལ་ཕྱེ་གནང་རྗེས་ཨ་སམ་གྱི་རིག་གཞུང་འཁྲབ་སྟོན་དང་། གུས་འདུད་དང་ཆེས་བསྟོད་ཀྱི་གླུ་གཞས་ (Lachitar Ahban) ཞེས་པ་གཟིགས་འབུལ་ཞུས་ཡོད། སྐབས་དེར་ཨིན་དྲེཤ་ཀུ་མར་ལགས་དང་། བོད་མི་མང་སྤྱི་འཐུས་ཚེ་རིང་སྒྲོལ་མ་ལགས། རྒྱ་གར་བྷི་ཇེ་པི་སྲིད་དོན་ཚོགས་པའི་ཏི་རི་པུ་ར་མངའ་སྡེའི་དྲུང་ཆེ་རབིནྡྲ་རཱ་ (Rabindra Raji) ལགས། ཨ་སམ་འཕགས་བོད་འབྲེལ་མཐུད་ཚོགས་པའི་ཚོགས་གཙོ་ཀཻ་ལཱཤ་སར་མ་ (Kailash Sarma) ལགས། འཕགས་བོད་འབྲེལ་མཐུད་ཚོགས་པའི་འཛིན་སྐྱོང་ཚོགས་མི་ལྕམ་ཨུར་ཝ་ཤི་མ་ཧན་ཊ་ (Urvashi Mahanta) ལགས། ཨ་རིའི་སྨན་ལས་ཚན་རིག་པ་གྲགས་ཅན་བྷི་ཀུལ་དཱ་སི་ (Dr. Bikul Das) ལགས། ཨ་རུ་ནཱ་ཅལ་མངའ་སྡེའི་གྲོས་ཚོགས་འཐུས་མི་ཟུར་པ་རིན་ཆེན་མཁའ་འགྲོ་ལགས། ཨ་སམ་འཕགས་བོད་འབྲེལ་མཐུད་ཚོགས་པའི་སྤྱི་ཁྱབ་དྲུང་ཆེ་བྷི་ཆན་སིངྒ་ (Dr. Bichan Kr. Singha) ལགས། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས་སོགས་ཚོགས་ཞུགས་གནང་ཡོད།
མཛད་སྒོའི་ཐོག་བོད་མི་མང་སྤྱི་འཐུས་ཚེ་རིང་སྒྲོལ་མ་ལགས་དང་། འཕགས་བོད་འབྲེལ་མཐུད་ལས་ཁང་གི་འབྲེལ་མཐུད་པ་བཀྲ་ཤིས་བདེ་སྐྱིད་ལགས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་རྣམ་ངོས་ཀྱི་ཡུལ་དང་ངོས་ཀྱི་མི་མང་། ཧིན་དྷི་ཐོག་པར་བསྐྲུན་ཞུས་པ་ཞིག་ཨིན་དྲེཤ་ཀུ་མཱར་ལགས་སུ་ཕུལ་ཡོད།
དེ་ནས་བོད་མི་མང་སྤྱི་འཐུས་ཚེ་རིང་སྒྲོལ་མ་ལགས་ཀྱིས་རྒྱ་ནག་སྲིད་གཞུང་འོག་བོད་མི་རྣམས་སྡུག་སྦྱོང་མྱོང་བཞིན་པའི་སྐོར་གསལ་སྟོན་གནང་སྐབས་རྒྱ་ནག་གཞུང་གིས་མི་རིགས་བཙན་བསྒྱུར་གྱི་སྲིད་བྱུས་འོག་བོད་ནང་དུ་གཏན་འཇགས་སློབ་གྲྭ་བཙུགས་ཡོད་སྐོར་དང་། རྒྱ་གར་གཞུང་ནས་བོད་ཀྱི་མགྲིན་ཚབ་གནང་སྟེ་བོད་དོན་ཐོག་རྒྱབ་སྐྱོར་གནང་བའི་རེ་སྐུལ་ཞུས་ཡོད། དེ་བཞིན་བོད་དང་རྒྱ་གར་དབར་ས་མཚམས་ཀྱི་འབྲེལ་བ་ཡོད་སྟབས་བོད་རྒྱའི་དཀའ་རྙོག་དེ་རྒྱ་གར་དང་ཐད་ཀར་འབྲེལ་ཆགས་ཀྱི་ཡོད་པ་གསུངས།
དེ་རྗེས་འཕགས་བོད་འབྲེལ་མཐུད་ཚོགས་པའི་སྤྱི་ཁྱབ་དྲུང་ཆེ་པཾ་ཀ་ཇི་གྷོ་ཡལ་ལགས་ཀྱིས་འཕགས་བོད་འབྲེལ་མཐུད་ཚོགས་པའི་ལོ་རྒྱུས་དང་འབྲེལ་འཛམ་གླིང་སྟེང་བོད་དོན་དྲིལ་བསྒྲགས་གནང་ཡོད་སྐོར་དང་། མི་མང་ནས་རྒྱ་ནག་ཀྱི་ཐོན་རྗས་བེད་སྤྱོད་མི་གཏོང་བའི་འབོད་སྐུལ་ཞུས་པ་དང་སྦྲགས། ཁོང་གིས་གནས་སྐོར་འདི་བརྒྱུད་རྒྱ་གར་གྱི་མི་འབོར་ཚང་མའི་ཚབ་ཞུས་ཏེ་རྒྱ་ནག་གི་མཁར་ཆེན་ཁོ་ན་རྒྱ་ནག་གི་ཁྲིམས་མཐུན་ས་མཚམས་ཡིན་པ་ལས་གཞན་ཆ་ཚང་བཙན་བཟུང་བྱས་པའི་ས་ཁུལ་ཡིན་ཞེས་གསུངས་ཡོད།
དེ་ནས་ཨ་རུ་ནཱ་ཅལ་མངའ་སྡེའི་གྲོས་ཚོགས་འཐུས་མི་ཟུར་པ་རིན་ཆེན་མཁའ་འགྲོ་ལགས་ཀྱིས་བོད་དང་རྒྱ་གར་བར་གྱི་ལོ་རྒྱུས་དང་། ཆོས་ཀྱི་འབྲེལ་བའི་སྐོར་འགྲེལ་བརྗོད་གནང་གྲུབ་མཚམས་འཕགས་བོད་འབྲེལ་མཐུད་ཚོགས་པ་དབུ་འཛུགས་གནང་མཁན་ཨིན་དྲེཤ་ཀུ་མཱར་ལགས་ཀྱི་ཚོགས་པའི་དམིགས་ཡུལ་སྐོར་ངོ་སྤྲོད་གནང་ཡོད། སྐབས་དེར་ཁོང་གིས་འཕགས་བོད་འབྲེལ་མཐུད་ཚོགས་དེ་བཞིན་ཐོག་མར་བོད་ལ་རང་དབང་དགོས། ཞེས་པའི་འབོད་ཚིག་དང་ལྷན་འགོ་ཚུགས་པ་རེད། དེ་ཡང་འཛམ་གླིང་སྟེང་རྒྱ་ནག་གི་དབང་ཤུགས་སྐོར་དྲིས་སྐབས་བདེན་པ་ནི་ཇི་ཙམ་ཆུང་ཡང་དཀའ་ངལ་གང་འདྲ་ཞིག་ལའང་གདོང་ལེན་བྱེད་ཐུབ་ཅེས་འགྲེལ་བརྗོད་རྒྱག་བཞིན་ཡོད། རྟ་དབང་གི་གནས་སྐོར་གྱིས་དེ་མཚོན་གྱི་ཡོད། ཅེས་གསུངས།
ཐེངས་འདིའི་གནས་སྐོར་དེ་བཞིན་གུ་ཝཱ་ཧཱ་ཊི་ནས་དབུ་འཛུགས་ཀྱིས་མོང་གལ་ད་ཡེ་དང་། རཽ་ཊཱ། འབུམ་སྡེ་ལ། སེ་ལ་བཅས་བརྒྱུད་དེ་རྟ་དབང་བར་ཡིན་པ་དང་། རྟ་དབང་གནས་སྐོར་ཐེངས་བཅུ་གསུམ་པ་དེས་རྒྱ་གར་གྱིས་བོད་དོན་ལ་རྒྱབ་སྐྱོར་མུ་མཐུད་གནང་རྒྱུ་དང་། ས་ཁུལ་དེར་དྲང་བདེན་དང་ཞི་བདེ་བསྐྲུན་ཐབས་ཀྱི་དམ་བཅའ་མཚོན་གྱི་ཡོད་པ་བཅས།།
