དེ་ཡང་ཐོག་མར་འབུམ་ལ་དགོན་ཐུབ་མཆོག་དགའ་ཚལ་གླིང་གྱི་འདུ་ཁང་གསར་བསྐྲུན་གནང་མཁན་༸སྐྱབས་རྗེ་གུ་རུ་སྤྲུལ་སྐུ་རིན་པོ་ཆེ་མཆོག་ནས་ཕེབས་བསུའི་གསུང་བཤད་གནང་གྲུབ་མཚམས་ཞྭ་སེར་བསྟན་པའི་གཙུག་རྒྱན་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་ ༡༠༤ བློ་བཟང་བསྟན་འཛིན་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་སྒོ་དང་འབྲེལ་ཏེ་སྩལ་བའི་གསུང་འཕྲིན་སྒྲོགས་སྦྱང་གནང་རྗེས་དཔལ་ལྡན་སྲིད་སྐྱོང་མཆོག་གིས་གསུང་བཤད་གནང་དོན། འབུམ་སྡེ་ལ་ཐུབ་མཆོག་དགའ་ཚལ་གླིང་དགོན་པའི་འདུ་ཁང་གསར་བཞེངས་ལེགས་གྲུབ་ཀྱི་མཛད་སྒོ་འདིར་ཆེད་ཕེབས་མཛད་པའི་དཔལ་མཉམ་མེད་རི་བོ་དགེ་ལུགས་པའི་གཙུག་རྒྱན་༸སྐྱབས་རྗེ་དགའ་ལྡན་ཁྲི་རིན་པོ་མཆོག་གིས་དབུས། ༸སྐྱབས་རྗེ་མེ་རག་བླ་མ་གུ་རུ་མཆོག་སྤྲུལ་རིན་པོ་ཆེ་མཆོག་དང་། སྐྱབས་གནས་དགེ་འདུན་གྱི་སྡེ། ཨ་རུ་ན་ཅལ་མངའ་སྡེ་བློན་ཆེན་པདྨ་མཁའ་འགྲོ་མཆོག རྒྱ་གར་དབུས་གཞུང་གི་གྲོས་ཚོགས་དང་གྲངས་ཉུང་མི་རིགས་ཀྱི་བློན་ཆེན་ཀེ་རན་རེ་ཇི་ཇུ་མཆོག ཕྱི་ནང་སྐུ་མགྲོན་རྣམ་པ། དད་ལྡན་མང་ཚོགས་བཅས་ལ་བོད་མིའི་སྒྲིག་འཛུགས་བཀའ་ཤག་གི་ཚབ་ཞུས་ཏེ་འཚམས་འདྲི་བཀྲ་ཤིས་བདེ་ལེགས་ཞུ་བ་ཡིན།
ཐུབ་མཆོག་དགའ་ཚལ་གླིང་དགོན་འདི་ཕྱི་ལོ་ ༡༩༥༩།༦༠ ནང་ཙམ་ལ་ས་གནས་མང་ཚོགས་ཀྱིས་བཞེངས་སྐྲུན་གནང་སྟེ། གུ་རུ་རིན་པོ་ཆེ་སྐུ་གོང་མ་མཆོག་ལ་དགོན་འགོ་ཕུལ་བ་ཞིག་རེད་འདུག་ཅིང་། ད་ཆ་གུ་རུ་མཆོག་སྤྲུལ་རིན་པོ་ཆེ་མཆོག་གིས་འཛིན་སྐྱོང་གནང་བཞིན་པ་རེད་འདུག ཐུབ་མཆོག་དགའ་ཚལ་གླིང་གི་ཡན་ལག་ཏུ་ཤེས་ཡོན་བསྟི་གནས་གུ་རུ་བསྟན་པའི་སྒྲོན་མེ་སློབ་གྲྭར་ཟུར་འཛུགས་བསྐྱངས་འདུག་པ་དེས་སྤྱི་ཚོགས་ལ་ཕན་རླབས་རྒྱ་ཆེན་འབྱུང་གི་ཡོད་པ་དེར་རྗེས་སུ་ཡི་རང་དང་། བསྔགས་བརྗོད་ཞུ་འདོད་བྱུང་།
མེ་རག་བླ་མ་སྐུ་ཕྲེང་རིམ་བྱོན་རྣམས་རྒྱལ་སྲིད་སྐྱོང་མཁན་དང་། སྤྲུལ་པའི་རིགས་རྒྱུད། བོད་བཙན་པོའི་གདུང་རྒྱུད་སོགས་སྤྲུལ་པའི་རོལ་གར་སྣ་ཚོགས་ཤིག་བཞེས་འདུག་ཅིང་། མེ་རག་བླ་མ་སྐུ་ཕྲེང་རིམ་བྱོན་དང་༸རྒྱལ་དབང་སྐུ་ཕྲེང་རིམ་བྱོན་ཕལ་ཆེ་བར་བླ་སློབ་ཀྱི་འབྲེལ་ཐུན་མོང་མ་ཡིན་པ་བྱུང་ཡོད་ལ། མོན་ཡུལ་དུ་རི་བོ་དགེ་ལུགས་པའི་བསྟན་པ་ཉག་ཕྲ་བའི་སྐབས་སུ། ༸གོང་ས་ལྔ་བ་ཆེན་མོའི་བཀའ་དགོངས་བཞིན། ཕྱི་ལོ་ ༡༦༨༠ ལོར། མེ་རག་བླ་མ་སྐུ་ཕྲེང་ལྔ་པ་ཆོས་རྗེ་བློ་གྲོས་རྒྱ་མཚོས་རྟ་དབང་དགའ་ལྡན་ལྷ་རྩེ་གསར་བཞེངས་གནང་བ་དང་། ༸གོང་ས་མཆོག་གིས་མེ་རག་བླ་མ་བླ་གཉེར་དུ་བསྐོ་གཞག་གིས་མོན་ཡུལ་གྱི་ཆོས་སྲིད་གཉིས་ཀྱི་མཛད་ཁུར་གཏད་པས། མེ་རག་བླ་མ་སྐུ་ཕྲེང་རིམ་བྱོན་ནས་མོན་ཡུལ་དུ་ཆོས་སྲིད་ཀྱི་མཛད་འཕྲིན་རྒྱ་ཆེར་བསྐྱངས་ཡོད་ཅིང་། མེ་རག་བླ་མ་སྐུ་ཕྲེང་དྲུག་པ་ནི་རྒྱལ་དབང་སྐུ་ཕེང་དྲུག་རིག་འཛིན་ཚངས་དབྱངས་རྒྱ་མཚོའི་གཅུང་པོར་འཁྲུངས་ཡོད་ལ། སྐུ་ཕྲེང་བཅུ་པ་༸གོང་བཅུ་གསུམ་པའི་སྐུ་ཚབ་ཏུ་བརྫངས་ཏེ་མོན་འབྲུག་གི་ས་མཚམས་ཆིངས་འདུམ་གནང་བ་སོགས་རྣམ་ཐར་མང་པོ་ཡོད།
མེ་རག་བླ་མ་སྐུ་ཕྲེང་བཅུ་གཉིས་པ་༸སྐྱབས་རྗེ་བསྟན་འཛིན་འཕྲིན་ལས་རྣམ་རྒྱལ་རིན་པོ་ཆེ་མཆོག་གིས་ཀྱང་བཞུགས་སྒར་མཚན་ཉིད་གྲ་ཚང་ནས་ལོ་ངོ་བཅུ་ཕྲག་གཅིག་དང་ཕྱེད་ཀ་ཙམ་ལ་སློབ་གཉེར་མཛད་དེ། འབྲས་སྤུངས་སྒོ་མང་དུ་དགེ་བཤེས་ལྷ་རམས་པ་དང་། རྒྱུད་སྨད་དུ་སྔགས་རིམ་པའི་དམ་འཇོག་མཛད་པ་མ་ཟད་སྨད་རྒྱུད་པའི་དགེ་བསྐོས་བཞེངས་ཤིང་། བཞུགས་སྒར་དགའ་ལྡན་ཕོ་བྲང་ཡིག་ཚང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ལོ་མང་སྲི་ཞུ་ཧུར་བསྐྱེད་བསྒྲུབས་གནང་ཡོད་པས་མཚོན། བསྟན་འགྲོའི་མཛད་འཕྲིན་སྤྱི་དང་། ཡང་སྒོས་མོན་ཡུལ་དུ་ཆོས་དང་རིག་གཞུང་། ཤེས་ཡོན། སྤྱི་ཚོགས་ཞབས་ཞུའི་ཕྱག་ལས་གཟེངས་ཐོན་གནང་བར་རྒྱ་གར་དབུས་གཞུང་ནས་ངོས་འཛིན་ཆེ་བསྟོད་ཀྱི་པད་མ་ཤྲིའི་གཟེངས་རྟགས་འབུལ་བཞེས་མཛད་པ་སོགས་མཛད་འཕྲིན་ཡར་ངོའི་ཟླ་ལྟར་རྒྱས་བཞིན་པར་རྗེས་སུ་ཡི་རང་ཞུ།
མཐའ་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས། བསྟན་འཛིན་གྱི་སྐྱེས་ཆེན་རྣམ་པ་སྐུ་ཚེ་མཛད་འཕྲིན་རྒྱས་པ་དང་། ཐུགས་བཞེད་ལྷུན་གྲུབ་ཡོང་བའི་སྨོན་འདུན་ཞུ་རྒྱུ་དང་། སྐབས་དོན་མེ་རག་བླ་མ་༸སྐྱབས་རྗེ་མཆོག་སྤྲུལ་རིན་པོ་ཆེ་སྐུ་ཚེ་བརྟན་ཅིང་། བསྟན་འགྲོའི་བྱ་གཞག་རླབས་ཆེན་སྒྲུབ་པའི་ཐུགས་བསྐྱེད་དུས་སུ་སྨིན་པའི་སྨོན་འདུན་ཞུ་བཞིན་ཡོད། ཅེས་གསུངས།
གཞན་ཡང་དཔལ་ལྡན་སྲིད་སྐྱོང་མཆོག་གོང་ཚེས་ཉིན་གྱི་སྔ་དྲོ་བསྟན་འཛིན་སྒང་ནས་འབུམ་སྡེ་ལར་ཕེབས་ཐོན་སྐབས་དགའ་འཆམ་དུ་ས་གནས་མི་མང་རྣམས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད་པ་མ་ཟད། ཨ་རུ་ནཱ་ཅལ་མངའ་སྡེའི་གྲོས་ཚོགས་འཐུས་མི་ཟུར་པ་དང་རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མའི་ཚོགས་གཙོ་སྐུ་ཞབས་རིན་ཆེན་མཁའ་འགྲོ་ཁིར་མེ་ལགས་ཀྱིས་རང་ཉིད་ཀྱི་བཞུགས་གནས་སུ་ཞོགས་ཟས་འདེགས་འབུལ་ཞུས་ཡོད་པ་བཅས།།
