༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། ཡུ་རོབ་ལུག་སཾ་བྷོག་རྒྱལ་ཁབ་ཏུ་བོད་དོན་ཞུ་སྐུལ་གྱི་ལས་འགུལ་ཆེད་བོད་མི་མང་སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་དང་། སྤྱི་འཐུས་ཀུན་དགའ་བསོད་སྟོབས་ལགས། སྤྱི་འཐུས་ཆོས་གྲགས་རྒྱ་མཚོ་ལགས་བཅས་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ཞིག་ཕྱི་ལོ་ ༢༠༢༤ ཟླ་བ་ ༡༡ ཚེས་ ༡༧ ཐོ་རངས་རྒྱ་གར་གྱི་རྒྱལ་ས་ལྡི་ལི་ནས་ཆེད་ཐོན་གྱིས་ཕྱི་དྲོ་ལུག་སཾ་བྷོག་གི་རྒྱལ་སའི་གནམ་ཐང་དུ་ཕེབས་འབྱོར་སྐབས། སྦར་སིལ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་དང་། དོན་ཁང་གི་ཡུ་རོབ་བོད་དོན་ཞུ་གཏུག་གི་འབྲེལ་མཐུད་པ་དྲུང་ལས་བསྟན་འཛིན་ཕུན་ཚོགས་ལགས། ཁུལ་དེར་གནས་སྡོད་བོད་མིའི་སྐུ་ཚབ་པ་སངས་སྒྲོལ་མ་ལགས་དང་། བསྟན་པ་ལགས། རྡོ་རྗེ་ལྷ་མོ་ལགས་བཅས་ནས་ཕེབས་བསུ་དང་བཅས་བཞུགས་གནས་མགྲོན་ཁང་དུ་གདན་འདྲེན་ཞུས་མཚམས་བོད་དོན་ཞུ་གཏུག་འབྲེལ་མཐུད་པ་བསྟན་འཛིན་ཕུན་ཚོགས་ལགས་ནས་བོད་དོན་ཞུ་སྐུལ་གྱི་ལས་རིམ་ཁག་སྤྱན་འབུལ་དང་། དགོང་དྲོ་ས་གནས་བོད་རིགས་མི་མང་ལྷན་ཐུག་འཕྲད་ཀྱིས་སྦར་སིལ་སྐུ་ཚབ་དོན་ཁང་ནས་ཕེབས་བསུའི་དགོང་ཚིགས་འདེགས་འབུལ་ཞུས་གནང་ཡོད།
ཕྱི་ལོ་ ༢༠༢༤ ཟླ་བ་ ༡༡ ཚེས་ ༡༨ སྔ་དྲོ་བྷེ་ཀྲམ་བྷོག་གྲོང་སྡེའི་སྤྱི་ཁྱབ་ (Mayor of Bettembourg) དང་། རྒྱལ་ཁབ་ཀྱི་ལྷོ་ཕྱོགས་མངའ་ཁུལ་གྱི་གྲོས་ཚོགས་འཐུས་མི་སྐུ་ཞབས་ལའོ་རན་ཊི་ ཛཡེ་མཊི་ (Laurent Zeimet) ལགས་མཇལ་འཕྲད་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་མིའི་མང་གཙོའི་ལམ་སྲོལ་གསར་གཏོད་མཛད་པའི་རྒྱུད་རིམ་དང་འབྲེལ་བོད་མི་མང་སྤྱི་འཐུས་ལྷན་ཚོགས་ངོ་སྤྲོད་དང་། སྤྱི་འཐུས་ཚོགས་གཙོ་མཆོག་གི་མཚན་རྟགས་འཁོད་པའི་བོད་དོན་ཞུ་སྐུལ་གྱི་ཡིག་ཆ་ནང་གསལ་ལྟར་རྒྱ་ནག་དམར་པོའི་གཞུང་གིས་བོད་ནང་དུ་བོད་མིར་དྲག་གནོན་གདུག་རྩུབ་ཚད་ལས་འདས་པ་བྱེད་བཞིན་ཡོད་པའི་སྐོར་དང་། བོད་ཀྱི་ཆོས་དང་རིག་གཞུང་རྩ་གཏོར་ཇི་ལྟར་བྱེད་ཀྱི་ཡོད་པའི་སྐོར་སོགས་ངོ་སྤྲོད་ཞུས་ཏེ། ཡུ་རོབ་མཉམ་འབྲེལ་དང་ལྷག་པར་ལུག་སཾ་བྷོག་རྒྱལ་ཁབ་ནས་བོད་དོན་ལ་རྒྱབ་སྐྱོར་སྔར་ལྷག་ཡོང་བའི་ཞུ་སྐུལ་དང་བོད་དོན་དང་འབྲེལ་བའི་ཁྲིམས་འཆར་དང་གྲོས་ཆོད་སོགས་འཇོག་གནང་ཡོང་བ། རྒྱ་ནག་དང་འབྲེལ་ལམ་རྩ་འགོག་གམ། དེ་མིན་རྒྱུན་དུ་ཐུགས་གཟབ་མ་གནང་ཚེ་ཉིན་ཞིག་དཀའ་ངལ་ཤུགས་ཆེ་འཕྲད་རྒྱུ་ཡིན་པ་སོགས་ཕན་ཚུན་བཀའ་མོལ་ལྷུག་པོ་བྱུང་བ་དང་། བོད་དོན་ཞུ་སྐུལ་གྱི་ཡི་གེའི་ནང་གསལ་གནད་དོན་རྣམས་ཁོང་ནས་ཡུལ་དེའི་སྲིད་བློན་སོགས་འབྲེལ་ཡོད་གཞུང་འཛིན་མི་སྣ་ལྷན་འཛོམས་སར་སྙན་སྒྲོན་གྱིས་རྒྱབ་སྐྱོར་ཡོང་ཐབས་གནང་རྒྱུའི་ཞལ་བཞེས་ཐོབ། ལོ་ལྟར་གསུམ་བཅུའི་དུས་དྲན་ཉིན་ཡུ་རོབ་རྒྱལ་ཁབ་མང་པོའི་གྲོང་ཁྱེར་དང་གྲོང་སྡེ་ལས་ཁུངས་སོགས་ཀྱི་མདུན་དུ་བོད་ཀྱི་རྒྱལ་དར་སྒྲེང་འཛུགས་གནང་སྲོལ་ཡོད་པ་ལྟར་བྷེ་ཀྲམ་བྷོག་གྲོང་སྡེ་ལས་ཁུངས་ཀྱི་མདུན་དུ་བོད་ཀྱི་རྒྱལ་དར་ད་ལྟ་ཡང་སྒྲེང་འཛུགས་གནང་ནས་བཞག་ཡོད་འདུག
དེ་རྗེས་ལྗང་ཁུ་ཚོགས་པའི་གྲོས་ཚོགས་འཐུས་མི་དང་། གྲོས་ཚོགས་ཀྱི་ཕྱི་སྲིད་ཚོགས་ཆུང་གི་ཚོགས་མི་ལྕམ་སྐུ་སེམ་ ཊན་སན་ (Sam Tanson) ལགས་དང་མཇལ་འཕྲད་སྐབས་གོང་གསལ་བཞིན་བོད་དོན་ཞུ་སྐུལ་དང་ལྷག་པར་རྒྱ་ནག་མཉམ་འབྲེལ་ལམ་སོགས་གནང་སྐབས་གནད་དོན་གང་གི་ཐད་ཐུགས་སྣང་གནང་དགོས་པའི་གཞེན་སྐུལ་དང་། བོད་དོན་སྐོར་གླེང་སློང་ཡོང་ཐབས། འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་སོགས་སུ་བོད་ནང་གི་འགྲོ་བ་མིའི་ཐོབ་ཐང་དང་འབྲེལ་བའི་སྐོར་ལ་གླེང་སློང་དང་རྒྱབ་སྐྱོར་ཡོང་ཐབས། བོད་ནང་རྒྱ་ནག་གིས་འཛུགས་སྐྲུན་འདྲ་མིན་ལ་ཁ་གཡར་ནས་ཁོར་ཡུག་གཏོར་སྐྱོན་དང་། ལྷག་པར་འབྲི་ཆུའི་ཆུ་མཛོད་དང་འབྲེལ་བའི་ཉེན་ཚབས་རྣམས་ངོ་སྤྲོད་བཅས་ཀྱི་སྐོར་ཞུས། གོང་གསལ་དཔོན་རིགས་གཉིས་ཀར་སྤྱི་འཐུས་ལྷན་ཚོགས་ཀྱི་ཕྱག་རྟགས་དང་། ༸གོང་ས་མཆོག་གི་མཛད་རྣམ་དང་གསུང་རྩོམ་ཕྱག་དེབ། ཞྭ་སྒབ་པའི་ཕྱི་བསྐྱོད་ལམ་ཡིག་སོགས་ཡིག་ཆ་ཁག་འབུལ་ལམ་ཞུས་ཡོད།
སྐབས་དེར་སྦར་སིལ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་དང་། ཡུ་རོབ་བོད་དོན་ཞུ་གཏུག་འབྲེལ་མཐུད་པ་བསྟན་འཛིན་ཕུན་ཚོགས་ལགས། ལུག་སཾ་བྷོག་བོད་དོན་རྒྱབ་སྐྱོར་ཚོགས་པའི་ཚོགས་གཙོ་པི་ཨེར་ (Mr. Pierre) ལགས། བོད་མིའི་སྐུ་ཚབ་པ་སངས་སྒྲོལ་མ་ལགས་རྣམས་མཉམ་བཅར་ཞུས་ཡོད་འདུག་པ་བཅས། །
