བོད་ཀྱི་ཁོར་ཡུག་སྲུང་སྐྱོབ་པ་ཀརྨ་བསམ་གྲུབ་ལགས་གློད་གྲོལ་བཏང་འདུག

གསར་ལས་ཁང་གི་གསར་འགོད་པས།

༢༠༢༤-༡༡-༢༠

༄༅། །ཨེ་ཤེ་ཡ་རང་དབང་རླུང་འཕྲིན་ཁང་ནས་གནས་ཚུལ་སྤེལ་བར་གཞིགས་ན། རྒྱ་ནག་གཞུང་གིས་མི་ལོ་ ༡༥ བཙོན་འཇུག་ཁྲིམས་ཐག་བཅད་པའི་བོད་ཀྱི་ཁོར་ཡུག་སྲུང་སྐྱོབ་པ་དང་། ཚོང་པ་གྲགས་ཅན་ཀརྨ་བསམ་གྲུབ་ལགས་ཕྱི་ཚེས་ ༡༨ ཉིན་གློད་གྲོལ་བཏང་འདུག སྐབས་དེར་ཁོང་གློད་གྲོལ་གཏོང་སར་ཁོང་གི་ནང་མི་མང་པོས་ཕེབས་བསུ་ཞུས་ཡོད་པ་དང་། ཁོང་གི་གཟུགས་གཞིའི་གནས་སྟངས་སྐོར་གསལ་པོར་བརྗོད་ཐུབ་ཀྱི་མེད་ནའང་། ལོ་བཅོ་ལྔའི་སྔོན་གྱི་ཕོ་གསར་སྐུ་གཟུགས་བདེ་ཐང་ཡིན་པ་ནས་ད་ཆ་ཁོང་མི་གཉིས་ཀྱིས་ལག་པ་གཡས་གཡོན་ནས་བསྐྱོར་ནས་འགྲོ་ཐུབ་པ་ལས་གོམ་པ་སྤོ་མི་ཐུབ་པའི་གནས་སྟངས་ཆགས་འདུག་ཅེས་བོད་ནས་ཁུངས་ལྡན་གནས་ཚུལ་བརྗོད་མཁན་བོད་མི་གསུམ་གྱིས་འདི་གའི་ཨེ་ཤ་ཡའི་རང་དབང་རླུང་འཕྲིན་ཁང་ལ་ངོ་སྤྲོད་གནང་བྱུང་།

བོད་ཀྱི་ཁོར་ཡུག་སྲུང་སྐྱོབ་བ་ཀརྨ་བསམ་གྲུབ་ལགས་ཕྱི་ལོ་ ༢༠༡༠ ཟླ་བ་ ༦ ཚེས་ ༢༤ ཉིན་རྒྱ་ནག་ཤིན་ཅང་ཡན་ཆི་རྫོང་ཁྲིམས་ཁང་ (Xinjiang Yanqi County Court) གིས་མི་ལོ་ ༡༥ བཙོན་འཇུག་ཁྲིམས་ཆད་པ་དང་། མི་ལོ་ ༥ རིང་ཆབ་སྲིད་ཀྱི་ཁེ་དབང་འཕྲོག་པ། རྒྱ་སྒོར་ཆིག་ཁྲིའི་ཉེས་ཆད་བཅས་བཅད་ཡོད། ཁོང་ལ་ལོ་བཅོ་ལྔའི་ཁྲིམས་ཐག་བཅད་ཡོད་ནའང་། བཙོན་གྱི་དུས་ཡུན་ཟླ་བ་བདུན་ཙམ་གྱི་མ་ཚང་སྔོན་ལ་གློད་གྲོལ་བཏང་འདུག ད་ལྟའི་ཆར་རྒྱུ་མཚན་གང་གི་ཐོག་ནས་ཁོང་བཙོན་དུས་མ་ཚང་གོང་གློད་གྲོལ་བཏང་བ་ཤེས་རྟོགས་མེད་ནའང་། ཕལ་ཆེར་སྐུ་གཟུགས་སྐྱོ་པོ་ཡིན་པའི་གནས་སྟངས་འོག་ནས་གློད་གྲོལ་བཏང་བ་ཡིན་པ་གོང་ཞུ་བོད་ནང་གི་གནས་ཚུལ་མཁོ་སྤྲོད་པས་ཚོད་དཔག་བྱེད་བཞིན་ཡོད་པ་རེད།

ཀརྨ་བསམ་འགྲུབ་ལགས་ཕྱི་ལོ་ ༢༠༡༠ ཟླ་བ་ ༡ ཚེས་ ༣ ཉིན་འཛིན་བཟུང་བཙན་འཁྲིད་བྱས་ཡོད་པ་དང་། ཟླ་ཤས་རིང་ཤིན་ཅང་པཱ་ཀྲིག་ཟེར་བར་བཀག་ཉར་བྱས་ཏེ་སྡུག་སྦྱོང་མནར་གཅོད་དང་འདྲི་རྩད་བཙན་སྐུལ་བསམ་ཡུལ་ལས་འདས་པ་བྱས་པ་དང་། དེ་ནས་ཕྱི་ལོ་༢༠༡༠ ཟླ་བ་ ༦ ཚེས་ ༢༤ ཉིན་ཤིན་ཅང་ཡན་ཆི་རྫོང་ཁྲིམས་ཁང་གིས་ཁོང་ལ་དུར་ས་བསྔོགས་ཏེ་རིག་གཞུང་གི་ཤུལ་དངོས་བརྐུས་ཁྱེར་བྱས་ཡོད་པའི་ནག་ཉེས་བཙུགས་ཏེ་ཁྲིམས་ཐག་བཅད་ཡོད་འདུག་ནའང་། དེ་ནི་ཕྱི་ལོ ༡༩༩༨ ཙམ་ལ་ཞིན་ཅང་ནས་ཁོང་ལ་ནག་ཉེས་དེ་བཙུགས་ཡོད་ཀྱང་ཕྱིས་སུ་དཀར་འདོན་བྱས་ཟིན་པ་ཞིག་ཡིན་ན་ཁོང་དང་ཁོང་གི་ནང་མི་ནས་སྐབས་དེར་བརྗོད་ཡོད་པ་རེད། ཀརྨ་བསམ་གྲུབ་ལགས་ལ་སྐབས་དེར་ཁྲིམས་ཐག་བཅད་དོན་དེ་ནི་གཙོ་བོ་ཁོང་གིས་རྒྱ་ནག་གི་བཙོན་ཁང་ནང་ཡོད་པའི་རང་གི་བུ་སྤུན་གཉིས་སྐྱོབ་ཆེད་རྒྱ་ནག་གཞུང་ལ་ཞུ་གཏུགས་བྱས་པའི་དབང་གིས་རྒྱ་ནག་གཞུང་གིས་ཁོང་ལ། དུར་སྔོག་དང་རིག་གཞུང་གི་ཤུལ་དངོས་བརྐུས་ཁྱེར་བྱས་པའི་ཉེས་པ་བཀལ་ཡོད་པ་མང་པོ་ཞིག་གིས་ཡིད་ཆེས་བྱེད་བཞིན་ཡོད་པ་རེད།

ཀརྨ་བསམ་འགྲུབ་ལགས་ཀྱི་སྤུན་རིན་ཆེན་བསམ་གྲུབ་ལགས་དང་འཇིགས་མེད་རྣམ་རྒྱལ་ལགས་གཉིས་ཕྱི་ལོ་ ༢༠༠༩ ཟླ་བ་ ༨ པའི་ནང་རྒྱ་ནག་གཞུང་གིས་འཛིན་བཟུང་བྱས་ཏེ། རྒྱལ་ཁབ་ཀྱི་བདེ་འཇགས་ལ་གནོད་པའི་ལས་ཀ་བྱས་པའི་ཉེས་མིང་འོག་རིན་ཆེན་བསམ་གྲུབ་ལགས་ལ་ལོ་ ༥ བཙོན་འཇུག་ཁྲིམས་ཐག་བཅད་དེ་ཕྱི་ལོ་ ༢༠༡༤ ཟླ་བ་ ༨ ཚེས་ ༨ ཉིན་ལྷ་སའི་བཙོན་ཁང་ཞིག་ནས་ཀློད་ཡོད་པ་དང་། འཇིགས་མེད་རྣམ་རྒྱལ་ལགས་ལོ་གཅིག་དང་ལོ་ཕྱེད་ཙམ་རིང་ངལ་རྩོལ་བསྒྱུར་བཀོད་ཁང་དུ་བཅུག་ཡོད་པ་རེད།

ད་ལྟ་རང་ལོ་ ༥༦ ཙམ་ཡིན་པའི་ཀརྨ་བསམ་གྲུབ་ལགས་ནི། བོད་གོ་འཇོ་རྫོང་བསམ་འཕེལ་ཡུལ་ཚོ་སྡོམ་པ་གྲོང་རྡལ་ནས་ཡིན་ལ། ཁོང་སྤུན་གསུམ་གྱིས་ཨ་ཆུང་སེང་གེ་གནམ་རྫོང་གི་དང་བླངས་ཁོར་ཡུག་སྲུང་སྐྱོབ་ཚོགས་པ་ཞེས་པ་ཞིག་ཆེད་འཛུགས་བྱས་ཤིང་། རིན་ཆེན་བསམ་གྲུབ་ལགས་དང་འཇིགས་མེད་རྣམ་རྒྱལ་ལགས་གཉིས་ཀྱིས་རྒྱ་ནག་གི་ལས་བྱེད་ཚོས་ཡུལ་དེའི་རི་སྐྱེས་སྲོག་ཆགས་རྣམས་ལ་གནོད་འཚེ་གཏོང་གི་ཡོད་པའི་གནད་དོན་ཞུ་གཏུགས་བྱས་རྗེས། རྒྱ་ནག་གཞུང་གིས་ཁྲིམས་འགལ་ཐོག་ནས་ཁོང་གཉིས་ཀྱིས་ཁོར་ཡུག་དང་འབྲེལ་བའི་གནས་ཚུལ་བསྡུ་རུབ་བྱས་ཤིང་། རྒྱལ་ཁབ་ཀྱི་བདེ་འཇགས་ལ་གནོད་པའི་ལས་ཀ་བྱས་ཚུལ་གྱི་ནག་ཉེས་བཙུགས་ཡོད་པ་བོད་ནང་གི་བོད་མི་མང་པོས་སྐྱོན་བརྗོད་བྱས་ཡོད་པ་རེད།།

རྒྱ་ནག་གཞུང་གིས་མི་ལོ་ ༡༥ བཙོན་འཇུག་ཁྲིམས་ཐག་བཅད་པའི་བོད་ཀྱི་ཁོར་ཡུག་སྲུང་སྐྱོབ་པ་དང་། ཚོང་པ་གྲགས་ཅན་ཀརྨ་བསམ་གྲུབ་ལགས་ཕྱི་ཚེས་ ༡༨ ཉིན་གློད་གྲོལ་བཏང་འདུག སྐབས་དེར་ཁོང་གློད་གྲོལ་གཏོང་སར་ཁོང་གི་ནང་མི་མང་པོས་ཕེབས་བསུ་ཞུས་ཡོད་པ་དང་། ཁོང་གི་གཟུགས་གཞིའི་གནས་སྟངས་སྐོར་གསལ་པོར་བརྗོད་ཐུབ་ཀྱི་མེད་ནའང་། ལོ་བཅོ་ལྔའི་སྔོན་གྱི་ཕོ་གསར་སྐུ་གཟུགས་བདེ་ཐང་ཡིན་པ་ནས་ད་ཆ་ཁོང་མི་གཉིས་ཀྱིས་ལག་པ་གཡས་གཡོན་ནས་བསྐྱོར་ནས་འགྲོ་ཐུབ་པ་ལས་གོམ་པ་སྤོ་མི་ཐུབ་པའི་གནས་སྟངས་ཆགས་འདུག་ཅེས་བོད་ནས་ཁུངས་ལྡན་གནས་ཚུལ་བརྗོད་མཁན་བོད་མི་གསུམ་གྱིས་འདི་གའི་ཨེ་ཤ་ཡའི་རང་དབང་རླུང་འཕྲིན་ཁང་ལ་ངོ་སྤྲོད་གནང་བྱུང་།