༄༅། །ཕྱི་ལོ་ ༢༠༢༤ ཟླ་བ་ ༡༡ ཚེས་ ༠༡ ཉིན་དབུས་འོས་བསྡུ་ལས་ཁང་དང་ལས་བྱེད་འདེམས་བསྐོ་ལྷན་ཁང་གི་ལས་ཁྱུར་དྲུང་ཆེ་གཅིག་ལྕོགས་ཚེ་རིང་དབྱངས་སྐྱིད་ལགས་དང་། ཚབ་གསར་དྲུང་ཆེ་བསྟན་འཛིན་ལེགས་གྲུབ་ལགས་གཉིས་བར་རྩིས་སྤྲོད་རྩིས་ལེན་ལེགས་པར་གྲུབ་སྟེ། བསྟན་འཛིན་ལེགས་གྲུབ་ལགས་ཀྱིས་དབུས་འོས་བསྡུ་ལས་ཁང་དང་ལས་བྱེད་འདེམས་ལྷན་གྱི་དྲུང་ཆེའི་ལས་ཁུར་དབུ་འཛུགས་ཞུས་ཡོད།

དེ་ཡང་དབུས་འོས་བསྡུ་ལས་ཁང་དང་ལས་བྱེད་འདེམས་ལྷན་གྱི་དྲུང་ཆེ་གསར་རྙིང་བར་གྱི་རྩིས་སྤྲོད་རྩིས་ལེན་སྐབས་བདེ་སྲུང་དྲུང་ཆེ་ཀརྨ་རིན་ཆེན་ལགས་ཀྱིས་སྤྲོད་དཔང་གི་ཐུགས་འགན་བཞེས་ཡོད་ཅིང་། རྩིས་སྤྲོད་གྲུབ་མཚམས་དབུས་འོས་བསྡུ་ལས་ཁང་གི་འགན་འཛིན་བློ་བཟང་ཡེ་ཤེས་ལགས་དང་། ལས་བྱེད་འདེམས་བསྐོ་ལྷན་ཁང་གི་ཚོགས་གཙོ་ཀརྨ་ཡེ་ཤེས་ལགས་གཉིས་ནས་ལས་ཁྱུར་དྲུང་ཆེ་དང་ཚབ་གསར་དྲུང་ཆེ་རྣམ་པ་གཉིས་ལ་འཚམས་འདྲིའི་མཇལ་དར་སྒྲོན་པ་དང་སྦྲགས། རྟེན་འབྱུང་གསོལ་ཇ་འབྲས་སིལ་འདེགས་འབུལ་ཞུས་ཡོད།སྤྱིར་བསྟན་འཛིན་ལེགས་གྲུབ་ལགས་ནི། ཕྱི་ལོ་ ༢༠༠༣ ཟླ་བ་ ༠༢ ཚེས་ ༠༦ ནས་དྲུང་ལས་གནས་རིམ་དུ་བདེ་སླར་མཉམ་དྲུང་དུ་བསྐོ་གཞག་དང་། ཕྱི་ལོ་ ༢༠༠༣ ཟླ་བ་ ༩ ཚེས་ ༢༧ ནས་ལས་བྱེད་ངོ་མར་བསྐོ་གཞག་གིས་ལས་འགན་རང་འཇགས། ཕྱི་ལོ་ ༢༠༠༩ ཟླ་བ་ ༡ ཚེས་ ༢༠ ནས་དྲུང་གཞོན་གནས་རིམ་དུ་གནས་སྤར་གྱིས་ལས་འགན་རང་འཇགས། ཕྱི་ལོ་ ༢༠༠༩ ཟླ་བ་ ༡༠ ཚེས་ ༡༢ ནས་དཔལ་འབྱོར་ལས་ཁུངས་ཀྱི་དྲུང་གཞོན། ཕྱི་ལོ་ ༢༠༡༣ ཟླ་བ་ ༩ ཚེས་ ༧ ནས་ཟུང་དྲུང་གནས་རིམ་དུ་གནས་སླར་གྱིས་ལས་འགན་རང་འཇགས། ཕྱི་ལོ་ ༢༠༡༤ ཟླ་བ་ ༦ ཚེས་ ༢ ནས་ཉི་འོང་དང་ཤར་ཨེ་ཤ་ཡའི་སྐུ་ཚབ་དོན་གཅོད་ལས་ཁུངས་ཀྱི་ཟུང་དྲུང་དུ་གནས་སྤོས། ཕྱི་ལོ་ ༢༠༡༧ ཟླ་བ་ ༣ ཚེས་ ༢༥ ནས་བཀའ་དྲུང་ཡིག་ཚང་གི་ཟུང་དྲུང་དུ་གནས་སྤོས། ཕྱི་ལོ་ ༢༠༡༧ ཟླ་བ་ ༩ ཚེས་ ༡༡ ནས་ནང་སྲིད་ལས་ཁུངས་ཀྱི་ཟུང་དྲུང་དུ་གནས་སྤོས། ཕྱི་ལོ་ ༢༠༡༨ ཟླ་བ་ ༥ ཚེས་ ༧ ནས་དཔལ་འབྱོར་ལས་ཁུངས་ཀྱི་ཟུང་དྲུང་དུ་གནས་སྤོས། ཕྱི་ལོ་ ༢༠༢༠ ཟླ་བ་ ༢ ཚེས་ ༡ ནས་དྲུང་འཕར་གནས་རིམ་དུ་གནས་སྤར་གྱིས་ལས་འགན་རང་འཇགས། ཕྱི་ལོ་ ༢༠༢༡ ཟླ་བ་ ༧ ཚེས་ ༡ ནས་དཔལ་འབྱོར་ལས་ཁུངས་ཀྱི་དྲུང་ཆེ་ལས་ཚབ་ཏུ་བསྐོ་གཞག ཕྱི་ལོ་ ༢༠༢༣ ཟླ་བ་ ༩ ཚེས་ ༧ ནས་དཔལ་འབྱོར་ལས་ཁུངས་ཀྱི་དྲུང་འཕར་དུ་ལས་འགན་རང་འཇགས། ཕྱི་ལོ་ ༢༠༢༤ ཟླ་བ་ ༡༡ ཚེས་ ༡ ནས་དྲུང་ཡིག་ཆེན་མོའི་གནས་རིམ་དུ་གནས་སྤར་གྱིས་དབུས་འོས་བསྡུ་ལས་ཁང་དང་ལས་བྱེད་འདེམས་ལྷན་གྱི་དྲུང་ཆེ་གཅིག་ལྕོགས་སུ་བསྐོ་གཞག་གནང་ཡོད་པ་བཅས།།