༄༅། །ཕྱི་ལོ་ ༢༠༢༤ ཟླ་བ་ ༡༡ ཚེས་ ༡༣ ནས་ ༡༥ བར་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་ཀུལ་ལུ་དཔལ་རབ་གླིང་ས་གནས་འགོ་འཛིན་ཁྱབ་ཁོངས་ས་གནས་ཁག་ཏུ་གཟིགས་སྐོར་དུ་ཕེབས་ཡོད།
དེ་ཡང་གཟིགས་སྐོར་གྱི་ཉིན་དང་པོར་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་ཀྱིས་རྡོ་སྦི་དཔལ་རབ་གླིང་དང་། པ་ཀུལ་ས་གནས་སུ་གཟིགས་སྐོར་གནང་སྐབས་ས་གནས་འཐུས་ཚོགས་ཀྱི་ཚོགས་གཙོ་དང་། ཀུལ་ལུ་ས་གནས་འགོ་འཛིན་དང་ལས་བྱེད། དེ་བཞིན་ས་གནས་ཀྱི་གཞུང་དང་གཞུང་ཁོངས་མིན་པའི་ཚོགས་པའི་སྐུ་ཚབ་བཅས་ནས་ཕེབས་བསུ་ཞུས་ཡོད། དེ་རྗེས་ཁོང་རྣམས་ནས་ཆར་དུས་སྐབས་སུ་ཆུ་ལོག་གི་གནོད་འཚེ་ལས་སྲུང་སྐྱོབ་ཆེད་ཕྱི་ལོ་ ༢༠༢༣ ལོར་འཛུགས་སྐྲུན་གནང་བའི་ཆུ་རགས་ལས་གཞིར་ཞིབ་འཇུག་གནང་། ལས་གཞི་འདིའི་ཆེད་བོད་མིའི་སྒྲིག་འཛུགས་དང་རོགས་ཚོགས་ཁག་ཅིག་ནས་དཔལ་འབྱོར་མཐུན་རྐྱེན་གནང་ཡོད་པ་དང་། ཆུ་རགས་ལས་གཞི་འདི་ནི་ཆུ་འགྲམ་དུ་ཆགས་པའི་གཞིས་ཆགས་ཁག་ཆར་དུས་སྐབས་ཆུ་ལོག་གི་ཉེན་ཁ་ལས་སྲུང་སྐྱོབ་ཆེད་ཡིན་པ་རེད།
དེ་བཞིན་ནང་སྲིད་དྲུང་ཆེ་ནས་གཞིས་ཆགས་ཀྱི་འབྲེལ་ཡོད་སྐུ་ཚབ་རྣམ་པ་དང་མཇལ་འཕྲད་གནང་སྟེ། ཧི་མ་ཅཱལ་མངའ་སྡེའི་ནང་གི་བོད་མིའི་གཞིས་ཆགས་ཁག་གི་ས་ཆ་བོགས་གཏོང་གི་གནད་དོན་སེལ་ཐབས་སུ་ལས་ཁུངས་ནས་འབད་བརྩོན་གནང་བཞིན་པའི་སྐོར་འགྲེལ་བརྗོད་དང་། དེ་མ་ཟད་ཁོང་གིས་རྒྱ་ནག་གཞུང་གིས་བོད་མིའི་མཐུན་འབྲེལ་ལ་གནོད་པའི་ལས་ངན་སྣ་ཚོགས་སྤེལ་བཞིན་པའི་སྐབས་སུ་བོད་མི་རྣམས་ནས་ནང་ཁུལ་མཐུན་ལམ་རྡོག་རྩ་ཆིག་སྒྲིལ་དགོས་རྒྱུ་གལ་ཆེན་པོ་ཡིན་པ་ནན་བརྗོད་གནང་ཡོད། ཕྱོགས་མཚུངས་ཁོང་གིས་བཀའ་ཤག་གི་དགོངས་གཞི་དང་། ལས་དོན་གྱི་གྲུབ་འབྲས་ཡར་རྒྱས་གཏོང་ཆེད་ས་ཁུལ་དབྱེ་བགོས་ཀྱི་ལས་དོན་སྤེལ་མུས་ཡིན་སྐོར་འགྲེལ་བརྗོད་གནང་ཡོད་པ་རེད།
གཟིགས་སྐོར་སྐབས་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་ནས་ཀུལ་ལུ་དཔལ་རབ་གླིང་ས་གནས་འགོ་འཛིན་ཁྱབ་ཁོངས་རྡོ་སྦི་དཔལ་རབ་གླིང་དང་། པ་ཀུལ། མེལ་ ༡༥། ཀུལ་ལུ་གཡུ་ལོ་བཀོད། མ་ན་ལི། བྷུན་ཏར་ཕུན་ཚོགས་རབ་བརྟན་གླིང་བཅས་སུ་གཟིགས་སྐོར་གནང་ཞིང་། གཟིགས་སྐོར་སྐབས་ས་གནས་བོད་མི་རྣམས་ནས་ས་གནས་ཀྱི་བདེ་སྡུག་ཞུས་དོན་ཁག་ལ་དྲུང་ཆེ་ནས་བོད་མིའི་སྒྲིག་འཛུགས་དང་ལྷག་པར་ནང་སྲིད་ལས་ཁུངས་ངོས་ནས་བོད་མིའི་བདེ་སྡུག་དཀའ་སེལ་སླད་འགན་ཁུར་ལྡན་པའི་ཐོག་དགོས་ངེས་རོགས་སྐྱོར་གནང་རྒྱུའི་ཞལ་བཞེས་གནང་ཡོད་པ་བཅས།། 
