༄༅། །ཕྱི་ལོ་ ༢༠༢༤ ཟླ་བ་ ༡༡ ཚེས་ ༡༠ ཉིན་རྒྱབ་ཆུ་ཚོད་ ༢ ཙམ་ལ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་སྒང་ཏོག་ས་གནས་མང་ཚོགས་ལ་གསུང་བཤད་གནང་ཡོད། སྐབས་དེར་བྱང་ཤར་སྤྱི་ཁྱབ་པ་དང་རྡོར་གླིང་ས་གནས་འགོ་འཛིན་གཅིག་ལྕོགས་རྡོ་རྗེ་རིག་འཛིན་ལགས་དང་། སྒང་ཏོག་གི་ས་གནས་འགོ་འཛིན་དོན་གྲུབ་བཟང་པོ་ལགས། ཀ་སྦུག་ས་གནས་འགོ་འཛིན་ཚེ་བརྟན་ལགས། མཁྱེན་རིན་པོ་ཆེ་མཆོག ས་གནས་འཐུས་ཚོགས་ཀྱི་ཚོགས་གཙོ་སྦྱིན་པ་ལགས། ས་གནས་རང་བདེན་ཚོགས་ཆུང་གི་ཚོགས་གཙོ་སངས་རྒྱས་ལགས། ས་གནས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་བློ་བཟང་དབང་རྒྱལ་ལགས། ས་གནས་བུད་མེད་ལྷན་ཚོགས་ཀྱི་ཚོགས་གཙོ་རིག་འཛིན་སྒྲོལ་མ་ལགས། གཞན་ཡང་གཞུང་དང་གཞུང་ཁོངས་མ་ཡིན་པའི་ཚོགས་པའི་སྐུ་ཚབ། མི་མང་བཅས་ཕེབས་ཡོད།
དེ་ཡང་ཐོག་མར་སྒང་ཏོག་ས་གནས་འགོ་འཛིན་དོན་གྲུབ་བཟང་པོ་ལགས་ཀྱིས་ཕེབས་བསུའི་གསུང་བཤད་དང་ལས་བསྡོམས་སྙིང་བསྡུས་སྙན་སྒྲོན་ཞུས་རྗེས་དཔལ་ལྡན་སྲིད་སྐྱོང་མཆོག་གིས་འཚམས་འདྲི་དང་འབྲེལ་གསུང་བཤད་གནང་དོན། རྒྱུན་དུ་མང་ཚོགས་ལ་ཞུས་པ་བཞིན་ད་ལྟའི་བཙན་བྱོལ་དང་བོད་ནང་གི་གནས་ཚུལ་སྐོར་གོ་རྟོགས་དགོས་རྒྱུ་གལ་ཆེན་པོ་ཆགས་ཡོད་པས་སྙན་སེང་ཞུ་བཞིན་ཡོད། དེང་སང་རྒྱ་ནག་གིས་སྤྱི་ཚོགས་དྲྭ་ལམ་ཁག་བརྒྱུད་བཙན་བྱོལ་སྤྱི་ཚོགས་ནང་དུ་དཀྲུག་ཤིང་དང་། ལྷག་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུས་པའི་བཙན་བྱོལ་གྱི་མི་སྣ་གྲགས་ཆེན་རྣམས་ལ་མཚན་སྨད་ཞུས་པ་སོགས་ཀྱི་གནས་ཚུལ་ཇེ་མང་དུ་འགྲོ་བཞིན་ཡོད་པ་ལས་ཉུང་དུ་འགྲོ་རྒྱུ་ཞིག་མེད། མི་མང་རྣམས་ནས་དངོས་ཡོད་གནས་ཚུལ་ངོས་འཛིན་པའི་ཐོག་ཕྱི་གསལ་ནང་གསལ་གྱི་ཕྱག་ལས་གནང་ན། མི་མང་ཁྲོད་དཀྲོག་གཏམ་ཉུང་དུ་འགྲོ་བའི་ཕན་ཐོགས་ཡོད་སྟབས། བཀའ་ཤག་སྐབས་བཅུ་དྲུག་ནས་ལས་དོན་གང་བརྩམ་པ་དེ་ཕྱི་གསལ་ནང་གསལ་ཐོག་ནས་འབད་བརྩོན་ཞུ་གི་ཡོད། ང་ཚོ་འགན་འཁུར་མཁན་ངོས་ནས་མང་ཚོགས་ལ་བཀའ་ཤག་སྐབས་བཅུ་དྲུག་པའི་ལས་དོན་བྱེད་སྟངས་དང་། འཛིན་སྐྱོང་། སྤྱི་ཚོགས་ཞབས་ཞུ་དང་བཅས་པ་སྐབས་དང་དུས་སོ་སོར་ཞུ་ཐུབ་ན། དཀྲོག་གཏམ་སྤེལ་མཁན་རྣམས་ལ་གོ་སྐབས་མེད་པ་ཞིག་བཟོ་རྒྱུའི་རེ་བ་ཡོད། དེ་ཡོང་ཐུབ་པར་མང་ཚོགས་ཁྲོད་གོ་རྟོགས་ཡག་པོ་དགོས་རྒྱུ་ཧ་ཅང་གལ་ཆེན་པོ་ཆགས་ཡོད། གནས་ཚུལ་གང་འདྲ་ཞིག་འབྱོར་མ་ཐག་དེས་སྤྱི་ཚོགས་ལ་ཕན་ཐོགས་ཡོད་མེད་ཐོག་དགོངས་པ་བཞེས་ནས་ཁྱབ་སྤེལ་གཏོང་དགོས་ཀྱི་ཡོད། ཅེས་དང་།
དེ་བཞིན་དཔལ་ལྡན་སྲིད་སྐྱོང་མཆོག་གིས་བཀའ་ཤག་སྐབས་བཅུ་དྲུག་པའི་ངོས་ནས་ཆབ་སྲིད་དང་། སྤྱི་ཚོགས་བདེ་དོན། འཛིན་སྐྱོང་གི་ལས་དོན་ཁག་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་པ་གང་ཡིན་སྐོར་རྟོགས་རྒྱུའི་འབད་བརྩོན་བྱས་ཏེ་སྲིད་བྱུས་བཟུང་གི་ཡོད། བཀའ་ཤག་སྐབས་བཅུ་དྲུག་པའི་ལས་ཡུན་རིང་འཛིན་སྐྱོང་དང་སྤྱི་ཚོགས་བདེ་དོན་གང་ཅིའི་ཐད་གྲུབ་འབྲས་ཕྲན་བུ་ཐོབ་པ་ཡོད་ན་དེ་སྤྱི་ནོར་་གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ཉག་གཅིག་ལ་བརྟེན་ནས་བྱུང་གི་ཡོད་པ་ང་ཚོས་དུས་རྒྱུན་དུ་དྲན་བཞིན་ཡོད་ལ་མང་ཚོགས་ནས་ཀྱང་དེ་ལྟར་ཡིད་ལ་བཅང་དགོས།
དེ་བཞིན་བོད་མིའི་སྒྲིག་འཛུགས་ཀྱི་སྒྲོམ་གཞི་དང་འབྲེལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་ཆོལ་ཁ་གསུམ་དང་། ཆོས་བརྒྱུད་ལྔ་ཡོངས་སུ་ཚུད་པའི་སྒྲིག་འཛུགས་ཤིག་བསྐྲུན་གནང་མཛད་ཡོད་པས་ཆོལ་ཁ་དང་ཕྱོགས་ཞེན་ལ་མ་ལྟོས་པར་བོད་སྤྱི་བའི་དོན་དུ་ནུས་པ་མཉམ་སྤུངས་དགོས་གལ་སྐོར་དང་། བོད་མི་ཉམ་ཐག་དང་། གནས་སྟངས་སྐྱོ་བ་རྣམས་ལ་ལྟ་རྟོག་བྱ་རྒྱུ་ནི་བོད་མིའི་སྒྲིག་འཛུགས་ཀྱི་ལས་འགན་ཡིན་ཞེས་གསུངས་རྗེས་བཀའ་ཤག་སྐབས་བཅུ་དྲུག་པའི་ལས་གཞི་ཁག་འགྲེལ་བརྗོད་གནང་བ་དང་འབྲེལ་གྲངས་འཛིན་དཔེ་མཛོད་དང་། བོད་ཀྱི་སྐད་ཡིག་གི་གལ་གནད། གྲངས་ཐོ་ཚད་ལྡན་དགོས་གལ། མི་མང་གི་དགོས་མཁོ་དང་བསྟུན་ནས་ཁང་པ་གསར་རྒྱག་གི་ལས་གཞི་སོགས་ཀྱི་སྐོར་འགྲེལ་བརྗོད་གནང་ཡོད། 
དེ་དང་ཕྱོགས་མཚུངས་བཀའ་ཤག་སྐབས་བཅུ་དྲུག་སྐབས་གདོང་ལེན་བྱ་དགོས་པ་ནི་རུབ་སྡོད་གཞིས་ཆགས་ནང་གནས་སྡོད་གཞོན་སྐྱེས་རྣམས་ལ་འཚམ་པའི་ལས་ཀ་ཐོབ་ཀྱི་མེད་པས་ཕྱིའི་རྒྱལ་ཁབ་ཁག་ཏུ་བསྐྱོད་ཀྱི་ཡོད་པ་དང་། གཞིས་ཆགས་ཁག་གི་གཞོན་སྐྱེས་ཉུང་དུ་ཕྱིན་ཡོད་པའི་སྐོར། སློབ་གྲྭ་ཁག་ཏུ་སློབ་ཕྲུག་མེད་པའི་དཀའ་ངལ་སོགས་ཀྱི་སྐོར་གསུངས་གྲུབ་མཚམས་མི་མང་རྣམས་ལ་བོད་མིའི་སྒྲིག་འཛུགས་ཀྱི་སྲིད་བྱུས་དབུ་མའི་ལམ་གྱི་སྐོར་འགྲེལ་བརྗོད་དང་སྦྲགས། ཆབ་སྲིད་ཀྱི་ཐོག་ནས་མཐའ་གཉིས་ངོས་འཛིན་ཚུལ་སྐོར་ངོ་སྤྲོད་གནང་ཡོད་པ་མ་ཟད། བོད་ཀྱི་གནད་དོན་སྐོར་བགྲོ་གླེང་གནང་དགོས་རྒྱུ་ཧ་ཅང་གལ་ཆེན་པོ་ཡིན་པ་དང་། གཞན་ལ་འགྲེལ་བཤད་རྒྱག་དགོས་པ་ནི་སོ་སོའི་ལས་འགན་དང་། ཕྱིའི་རྒྱལ་ཁབ་ཁག་གི་མི་སྣ་རྣམས་ནས་བོད་ཀྱི་གནད་དོན་ཐོག་སྣང་ཚུལ་གང་འདྲ་ཡོད་མེད་སོགས་ཀྱི་སྐོར་ཤེས་དགོས་གལ་ཡིན་ཞེས་གསུངས་རྗེས་དཔལ་ལྡན་སྲིད་སྐྱོང་མཆོག་གིས་སྒང་ཏོག་ས་གནས་མི་མང་གི་དོགས་འདྲི་ཁག་ཅིག་ལ་ལན་འདེབས་གསལ་བཤད་གནང་ཡོད་པ་བཅས།།
