༄༅། །ཕྱི་ལོ་ ༢༠༢༤ ཟླ་བ་ ༡༡ ཚེས་ ༨ ཉིན་གྱི་སྔ་དྲོ་ཆུ་ཚོད་ ༨ ཙམ་ལ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཀ་སྦུག་སྲད་རྒྱུད་གྲྭ་ཚང་དང་། ཟེ་དཀར་ཆོས་སྡེ་སྐྱིད་ཚལ་གླིང་དུ་ཆོས་མཇལ་གནང་གྲུབ་མཚམས་ཀ་སྦུག་སཾ་བྷོ་ཊ་གཏན་སློབ་ཀྱི་ཞོགས་ཚོགས་སུ་ལྷན་ཞུགས་གནང་བ་དང་། དགེ་ལས་སློབ་ཕྲུག་ཡོངས་ལ་བོད་ཀྱི་ལོ་རྒྱུས་དང་། ཆབ་སྲིད་ཀྱི་གནས་བབ་སྐོར་གསུང་བཤད་གནང་ཡོད།
དེ་ཡང་ཐོག་མར་སློབ་གྲྭའི་སློབ་སྤྱི་ཚེ་རིང་མཚོ་མོ་ལགས་ཀྱིས་ཕེབས་བསུའི་གསུང་བཤད་དང་། སློབ་གྲྭའི་ལོ་རྒྱུས་སྙིང་བསྡུས་ཤིག་སྙན་སྒྲོན་ཞུས་རྗེས་དཔལ་ལྡན་སྲིད་སྐྱོང་མཆོག་གིས་ཐོག་མར་འཚམས་འདྲི་དང་འབྲེལ་དགེ་ལས་ཡོངས་ལ་ཐུགས་རྗེ་ཆེ་ཞུ་གནང་བ་དང་སྦྲགས། སློབ་སྤྱི་ཚེ་རིང་མཚོ་ལགས་ནས་ལོ་ངོ་ ༣༦ རིང་བོད་པའི་སྤྱི་ཚོགས་ནང་ཕྱག་ལས་གནང་བར་བསྔགས་བརྗོད་དང་ཐུགས་རྗེ་ཆེ་ཞུས་གནང་ཡོད། 
དེ་ནས་དཔལ་ལྡན་སྲིད་སྐྱོང་མཆོག་གིས་བོད་ཀྱི་སྐོར་བོད་པའི་སློབ་ཕྲུག་ཙམ་མ་ཡིན་པར་རྒྱ་གར་སློབ་ཕྲུག་རྣམས་ནས་ཀྱང་ཤེས་ནས་མ་འོངས་བོད་དོན་ཐོག་རོགས་རམ་གནང་རྒྱུ་གལ་ཆེན་པོ་ཡིན་པ་དང་། བོད་པའི་སློབ་ཕྲུག་རྣམས་ལ་བོད་རྒྱའི་དཀའ་རྙོག་སེལ་རྒྱུའི་ལས་འགན་ཡོད། ལྷག་པར་འཛིན་རིམ་བཅུ་གཅིག་དང་བཅུ་གཉིས་སློབ་ཕྲུག་རྣམས་མ་འོངས་མཐོ་སློབ་ཁག་ཏུ་མི་རིགས་འདྲ་མིན་གྱི་སློབ་ཕྲུག་རྣམས་ལ་བོད་དོན་ཐོག་གོ་རྟོགས་སྤེལ་རྒྱུ་གལ་ཆེན་པོ་ཆགས་ཡོད། ཅེས་དང་།
དེ་བཞིན་བོད་ཀྱི་ས་ཁམས་ཆགས་ཚུལ་སྐོར་དང་འབྲེལ་གསུངས་དོན། ནུབ་ཕྱོགས་རྒྱལ་ཁབ་རྣམས་ནས་བོད་དེ་འཛམ་གླིང་གི་ཡང་རྩེ་ཞེས་མིང་བཏགས་ཡོད། བོད་ནི་འཛམ་གླིང་ནང་གི་མཐོ་སྒང་མཐོ་ཤོས་ཤིག་ཡིན་པ་མ་ཟད། དེང་སང་ཚན་རིག་པ་རྣམས་ཀྱིས་བོད་ལ་སྣེ་གསུམ་པ་ཞེས་ཀྱང་བརྗོད་ཀྱི་ཡོད། ཨེ་ཤི་ཡའི་ནང་གི་གཙང་པོ་དང་རྒྱུག་ཆུ་མང་དག་ཅིག་གི་བྱུང་ཁུངས་བོད་ཡིན། བོད་ནི་འཛམ་གླིང་དང་ལྷག་པར་ཨེ་ཤི་ཡའི་རྒྱལ་ཁབ་ཆེད་དུ་ཧ་ཅང་གལ་ཆེན་པོ་ཆགས་ཡོད། དེང་སང་རྒྱ་ནག་གིས་བོད་ནང་དུ་འཛམ་གླིང་ནང་གི་ཆུ་མཛོད་ཆེ་ཤོས་བརྒྱབ་རྒྱུའི་འཆར་གཞི་ཡོད་པས་དེར་བོད་ནང་གི་ཁོར་ཡུག་ལ་གནོད་སྐྱོན་ཆེན་པོ་འཕོག་གི་ཡོད། ཅེས་བོད་ཀྱི་ཁོར་ཡུག་དེ་བཞིན་བོད་མི་ཙམ་ལ་མིན་པར་རྒྱ་གར་ལའང་གལ་གནད་ཆེན་པོ་ཡིན་པས་རྒྱ་གར་སློབ་ཕྲུག་རྣམས་ནས་ཀྱང་དོ་སྣང་བྱེད་དགོས་གལ་སྐོར་སོགས་གསུངས་རྗེས་སློབ་ཕྲུག་གི་དྲི་བ་ཁག་ཅིག་ལ་ལན་འདེབས་གསལ་བཤད་གནང་ཡོད།
དེ་རྗེས་དཔལ་ལྡན་སྲིད་སྐྱོང་མཆོག་དཔལ་ས་སྐྱའི་ཆོས་གྲྭ་བརྩེ་ཆེན་འཕྲིན་ལས་དར་རྒྱས་གླིང་དགོན་དང་། དགེ་ལྡན་ཐར་པ་ཆོས་གླིང་དགོན་དུ་ཆོས་མཇལ་དང་། འགྲེམས་སྟོན་ཁང་དུ་འཚམས་གཟིགས་གནང་ཡོད། །
