༄༅། །ཕྱི་ལོ་ ༢༠༢༤ ཟླ་བ་ ༡༡ ཚེས་ ༠༨ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་སྐུ་ནན་སི་པི་ལོ་སི་མཆོག་སླར་ཡང་གྲོས་ཚོགས་འཐུས་མིར་བདམས་ཐོན་བྱུང་བར་འཚམས་འདྲི་གནང་ཡོད།
དེ་ཡང་འཚམས་འཕྲིན་ནང་དཔལ་ལྡན་སྲིད་སྐྱོང་མཆོག་གིས། བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ། སྐུ་ཉིད་ཨ་རིའི་གྲོས་ཚོགས་འོག་མའི་འཐུས་མིར་བསྐྱར་འདེམས་བྱུང་བར་དགའ་བསུའི་འཚམས་འདྲི་ཞུ་རྒྱུ་ཡིན། སྐུ་ཉིད་གྲོས་ཚོགས་སུ་མུ་མཐུད་བཞུགས་པ་འདིས་སྐུ་ཉིད་ཀྱི་མི་མང་ཙམ་མ་ཡིན་པར་འཛམ་གླིང་ཡོངས་ཀྱི་འགྲོ་བ་མིའི་ཐོབ་ཐང་དང་མང་གཙོའི་རྒྱབ་སྐྱོར་བ་ཚོའི་རེ་བའི་སྒྲོན་མེ་ཞིག་ཆགས་ཡོད།
དུས་སྐབས་ཁྱད་པར་ཅན་འདིར་སྐུ་ཉིད་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་མཛའ་བརྩེའི་འབྲེལ་བ་དམ་ཟབ་གནང་བ་དང་། བོད་དོན་ཐོག་རྒྱུན་རིང་རྒྱབ་སྐྱོར་གནང་བར་ང་ཚོས་སྙིང་ཐག་པ་ནས་བཀའ་དྲིན་རྗེས་དྲན་ཞུ་རྒྱུ་ཡིན། སྐུ་ཉིད་ནས་གྲོས་ཚོགས་ནང་བོད་དོན་དང་འབྲེལ་བའི་ཁྲིམས་འཆར་ཁག་ལ་རྒྱབ་སྐྱོར་གནང་བ་སོགས་ཀྱིས་ང་ཚོར་བཀའ་དྲིན་ཆེན་པོ་བསྐྱངས་ཡོད།
སྐུ་ཉིད་ཀྱི་ལོ་རྒྱུས་ལྡན་པའི་ཆབ་སྲིད་ཀྱི་མདུན་ལམ་ཁྲོད། བོད་མི་ཙམ་མ་ཡིན་པར་འཛམ་གླིང་ཡོངས་ཀྱི་གཉའ་གནོན་འོག་གནས་པའི་མི་མང་རྣམས་ཀྱི་འགྲོ་བ་མིའི་ཐོབ་ཐང་དང་ཆེ་མཐོང་ལ་རྒྱུན་མཐུད་རྒྱབ་སྐྱོར་ཤུགས་ཆེ་གནང་ཡོད། སྐུ་ཉིད་ཀྱི་གཞི་རྩའི་དབུ་ཁྲིད་ལམ་སྟོན་དེས་འཛམ་གླིང་ས་ཕྱོགས་གང་སར་དྲང་བདེན་དང་བྱམས་བརྩེའི་ཆེད་དུ་ལངས་ཕྱོགས་བརྟན་པོ་འཛིན་མཁན་ས་ཡ་མང་པོར་སེམས་ཤུགས་སྤར་གྱི་ཡོད།
དུས་སྐབས་དཀའ་ངལ་ཅན་འདིའི་སྐབས་སུ། སྐུ་ཉིད་ཀྱི་འབོད་སྒྲ་དང་ལམ་སྟོན་ནི་སྔར་ལས་ཀྱང་གལ་གནད་ཆེ་བ་ཆགས་ཡོད། ང་ཚོས་སྐུ་ཉིད་ཀྱི་རྒྱབ་སྐྱོར་ལ་བཀའ་དྲིན་ཆེན་པོར་འཛིན་གྱི་ཡོད་ལ། མ་འོངས་པར་ཡང་བོད་དང་གཉའ་གནོན་འོག་གནས་པའི་མི་མང་ཡོངས་ཀྱི་དྲང་བདེན་གྱི་འཐབ་རྩོད་ཆེད་སྐུ་ཉིད་ཀྱི་དབུ་ཁྲིད་མུ་མཐུད་གནང་བའི་རེ་བ་ཞུ་བཞིན་ཡོད། ཅེས་གསུངས་ཡོད་པ་བཅས།།
