༄༅། །ཕྱི་ལོ་ ༢༠༢༤ ཟླ་བ་ ༡༡ ཚེས་ ༠༤ ཉིན་རྒྱབ་ཆུ་ཚོད་ ༢ ཙམ་ལ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་འབུམ་སྡེ་ལར་ཆགས་པའི་འབུམ་ལ་བསྟན་སྒང་ས་གནས་འགོ་འཛིན་ཁྱབ་ཁོངས་ཁ་འཐོར་ས་གནས་འབུམ་སྡེ་ལ་དང་། དགའ་འཆམ། རྡི་རང་། རྟ་དབང་བཅས་ཀྱི་ས་གནས་འགོ་འཛིན་ལས་ཁུངས་གཅིག་ལྕོགས་སུ་ཆེད་ཕེབས་གནང་སྟེ་གསུང་བཤད་གནང་ཡོད།
དེ་ཡང་ཐོག་མར་བསྟན་འཛིན་སྒང་དང་འབུམ་སྡེ་ལ་གཉིས་ཀྱི་ས་གནས་འགོ་འཛིན་གཅིག་ལྕོགས་རབ་བརྟན་ཚེ་རིང་ལགས་ཀྱིས་ལས་བསྡོམས་སྙིང་བསྡུས་སྒྲོགས་སྦྱང་གནང་རྗེས་དཔལ་ལྡན་སྲིད་སྐྱོང་མཆོག་གིས་འཚམས་འདྲི་དང་སྦྲགས་གསུང་བཤད་གནང་དོན། ངས་རྒྱུན་དུ་བོད་པའི་ས་གནས་ཁག་ཏུ་ཐེངས་གཉིས་རེ་བཅར་རྒྱུ་འབད་བརྩོན་ཞུ་གི་ཡིན་ཞེས་བརྗོད་པ་བཞིན་ཕྱི་ལོ་ ༢༠༢༢ ལོར་ཐེངས་དང་པོ་བཅར་ཞིང་། ད་རེས་འབུམ་སྡེ་ལར་གུ་རུ་རིན་པོ་ཆེའི་དགོན་པའི་འདུ་ཁང་གི་དབུ་འབྱེད་དང་སྦྲགས་བསྟན་འཛིན་སྒང་དང་འབུམ་སྡེ་ལ་སོགས་སུ་ཐེངས་གཉིས་པ་བཅར་རྒྱུའི་གོ་སྐབས་བྱུང་། སྤྱིར་རྒྱ་གར་ནང་དུ་བཙན་བྱོལ་བོད་མིའི་ས་གནས་ཁག་ ༣༧ ཡོད་པ་དང་། ཕྱི་རྒྱལ་དང་ལྷག་པར་ཨ་རི་ལྟ་བུ་མཚོན་ན་བོད་མི་གནས་སྡོད་བྱེད་ཡུལ་མངའ་སྡེ་ ༢༩ ཙམ་ཡོད། དེ་དག་ལ་སྐོར་བསྐྱོད་བྱེད་བཞིན་ཡོད་ཀྱང་བོད་མི་རྣམས་དང་ཐུག་འཕྲད་བྱ་རྒྱུ་ཙམ་མ་ཡིན་པར་ཕྱིའི་མི་སྣ་མང་དག་ཅིག་ཐུག་འཕྲད་དང་ཞུ་གཏུག་བྱེད་དགོས་ཀྱི་ཡོད།
དེ་བཞིན་བཀའ་ཤག་སྐབས་བཅུ་དྲུག་པའི་ངོས་ནས་ཕུགས་རྒྱང་རིང་པོའི་བསམ་བློའི་ངང་འབྱུང་འགྱུར་སྤྱི་ཚོགས་གང་འདྲ་ཞིག་ཆགས་ཀྱི་ཡོད་མེད་ཐོག་ལས་འཆར་དང་འཆར་གཞི་བཀོད་སྒྲིག་བྱེད་བཞིན་ཡོད་ལ། འཛམ་གླིང་སྟེང་དུའང་བོད་དོན་ཐོག་རྒྱུ་མཚན་ལྡན་པའི་ཐོག་ནས་འགྲེལ་བརྗོད་རྒྱག་བཞིན་ཡོད། བོད་རྒྱའི་དཀའ་རྙོག་སེལ་བའི་ཐབས་ལམ་དབུ་མའི་ལམ་ལས་གཞན་མེད་ཚུལ་དང་། དེའི་ཆེད་དུ་རྒྱ་ནག་གཞུང་དང་བོད་དབར་གྲོས་མོལ་བྱུང་དགོས་ཀྱི་ཡོད་ཀྱང་རྒྱ་ནག་སྲིད་འཛིན་གྱི་སྲིད་བྱུས་བཟུང་སྟངས་ལ་བལྟས་ཚེ་ཁག་པོ་ཡིན་པ་མ་ཟད། བོད་ནང་དཔེ་མཛོད་ཁང་དུ་ནང་ཆོས་དང་འབྲེལ་བའི་ཡིག་ཆ་དང་དེབ་རིགས་མི་འཇོག་པ་དང་། བོད་པའི་གཞོན་སྐྱེས་རྣམས་རྒྱ་རིགས་སུ་བསྒྱུར་ཐབས་ཀྱི་སྲིད་བྱུས་སྤེལ་བཞིན་པ་སོགས་ཀྱི་གནས་ཚུལ་ཡོད་པས་ད་ལྟའི་རྒྱ་གཞུང་དང་ལྷན་དུ་གྲོས་མོལ་བྱ་རྒྱུ་ཧ་ཅང་ཁག་པོ་ཆགས་ཡོད། དེར་བརྟེན་ང་ཚོས་རྒྱལ་སྤྱིའི་སྤྱི་ཚོགས་ཁག་ལ་ཞུ་གཏུག་བྱེད་དགོས། ཞེས་གསུངས།དེ་མཚུངས་ཨ་རིའི་སྲིད་གཞུང་གིས་བོད་རྒྱའི་རྩོད་རྙོག་སེལ་ཐབས་ཀྱི་ཁྲིམས་ཡིག་གཏན་འབེབས་གནང་བ་དེ་དགའ་སྤྲོ་བྱེད་འོས་པ་ཞིག་ཡིན་ཡང་ཁྲིམས་ཡིག་འདི་བཞིན་ང་ཚོའི་མཐའ་མའི་གྲུབ་འབྲས་མིན་པ་དང་། ཁྲིམས་ཡིག་འདི་བརྒྱུད་བོད་རྒྱའི་རྩོད་རྙོག་སེལ་ཆེད་གོམས་པ་མདུན་སྤོས་ཤིག་ཡིན། རྒྱ་ནག་གཞུང་གིས་བོད་འདི་སྤྱི་ཚོགས་རིང་ལུགས་ཀྱི་ལྷ་ཡུལ་ཡིན་ཞེས་འཛམ་གླིང་ནང་འབོད་ཀྱི་ཡོད་ཀྱང་བོད་ནང་དུ་བོད་མི་རྣམས་འུ་ཐུག་ཐབས་ཟད་ཀྱིས་རང་ལུས་མེར་སྲེག་གི་གནས་ཚུལ་མང་དག་ཅིག་མཐོང་རྒྱུ་ཡོད།
དེ་བཞིན་རྒྱ་ནག་གཞུང་གིས་བོད་དེ་རྒྱ་ནག་གི་ཆ་ཤས་ཡིན་ཞེས་པ་དེ་བདེན་པ་མིན་པའི་སྐོར་འགྲེལ་བརྗོད་དང་སྦྲགས་བོད་མི་རྣམས་ནས་དེ་དང་འབྲེལ་ཏེ་བོད་ཀྱི་ཆོས་དང་རིག་གཞུང་། ལོ་རྒྱུས། ས་ཆའི་གནས་བབ་སོགས་ཀྱི་སྐོར་གཞན་ལ་འགྲེལ་བརྗོད་རྒྱག་དགོས་རྒྱུ་གལ་ཆེན་པོ་ཡིན་པ་མ་ཟད། ཆུང་དུས་སྐབས་ནས་བོད་པའི་གཞོན་སྐྱེས་རྣམས་ལ་བོད་པ་ཡིན་པའི་སྤོབས་པ་དགོས་རྒྱུ་གལ་ཆེན་པོ་ཡིན་ཞེས་གསུངས།
གཞན་ཡང་བཀའ་ཤག་སྐབས་བཅུ་དྲུག་པའི་གྲངས་འཛིན་དཔེ་མཛོད་ཀྱི་ལས་གཞིའི་སྐོར་འགྲེལ་བརྗོད་དང་། གཞིས་ཆགས་གནས་སྤོའི་ལས་གཞི། དེའི་ཆེད་དུ་གྲངས་ཐོ་ཚད་ལྡན་དགོས་གལ་སོགས་ཀྱི་སྐོར་གསུང་བཤད་གནང་གྲུབ་མཚམས་མི་མང་གི་དོགས་འདྲི་ཁག་ཅིག་ལ་ལན་འདེབས་གསལ་བཤད་གནང་ཡོད། སྐབས་དེར་འབུམ་སྡེ་ལ་དང་། དགའ་འཆམ་གཉིས་ཀྱི་མི་མང་གྲངས་ ༦༠ ཙམ་ཕེབས་ཡོད།
