༄༅། །ཕྱི་ལོ་ ༢༠༢༤ ཟླ་བ་ ༡༡ ཚེས་ ༠༢ ནས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གི་རྒྱ་གར་བྱང་ཤར་ཁུལ་གྱི་གཞུང་འབྲེལ་ཕྱོགས་ཕེབས་གནང་འགོ་ཚུགས་པ་ལྟར། ཕྱི་ཚེས་ ༠༣ ཉིན་གྱི་ཉིན་རྒྱབ་ཆུ་ཚོད་ ༣ པའི་ཐོག་བསྟན་འཛིན་སྒང་བོད་མིའི་གཞིས་ཆགས་སུ་ཕེབས་འབྱོར་བྱུང་ཡོད། སྐབས་དེར་ས་གནས་འགོ་འཛིན་རབ་བརྟན་ཚེ་རིང་ལགས་དང་། ས་འཐུས་ཚོགས་གཙོ་ཕུན་ཚོགས་ཚེ་རིང་ལགས། དཔལ་རྒྱུད་སྟོད་དགོན་པའི་ཕྱག་མཛོད་མཆོག་བཅས་ཀྱི་གཙོས་ས་གནས་མི་མང་དང་སློབ་ཕྲུག་བཅས་ནས་བསྟན་འཛིན་སྒང་དུ་ཆགས་པའི་དཔལ་རྒྱུད་སྟོད་དགོན་པའི་རྒྱལ་སྒོ་རུ་ཕེབས་བསུ་གཟབ་རྒྱས་ཞུས་ཡོད། དེ་ནས་དཔལ་རྒྱུད་སྟོད་དགོན་པར་དཔལ་ལྡན་སྲིད་སྐྱོང་མཆོག་ལ་རྟེན་བྱུང་འབྲས་སིལ་དང་གསོལ་ཇ་འདེགས་འབུལ་ཞུས་སྐབས་ས་གནས་འགོ་འཛིན་དང་ས་འཐུས་ཚོགས་གཙོ་བཅས་དང་ལྷན་གཞིས་ཆགས་དང་འབྲེལ་བའི་གནད་དོན་ཐོག་བཀའ་མོལ་གནང་གྲུབ་མཚམས་མི་མང་ཚོགས་ཁང་དུ་མི་མང་ལ་གསུང་བཤད་གནང་། དེ་ཡང་ཐོག་མར་ས་གནས་འགོ་འཛིན་རབ་བརྟན་ཚེ་རིང་ལགས་ནས་ཕེབས་བསུའི་གསུང་བཤད་དང་སྦྲགས་ལས་བསྡོམས་སྙིང་བསྡུས་ཤིག་སྒྲོགས་སྦྱང་གནང་རྗེས་དཔལ་ལྡན་སྲིད་སྐྱོང་མཆོག་གི་གསུང་བཤད་གནང་དོན། བོད་མིའི་སྒྲིག་འཛུགས་ཀྱི་སྲིད་སྐྱོང་གི་འགན་འཁུར་བ་ནས་བཟུང་ཨ་རུ་ནཱ་ཅལ་མངའ་སྡེ་རུ་ཐེངས་གཅིག་བཅར་རྒྱུ་བྱུང་། དེ་ཡང་ཕྱི་ཚེས་ ༤ ཉིན་འབུམ་སྡེ་ལར་ཐུབ་མཆོག་དགའ་ཚལ་གླིང་གི་གཙུག་ལག་ཁང་གསར་བཞེངས་ཀྱི་དབུ་འབྱེད་མཛད་སྒོ་དང་བསྟུན་བྱང་ཤར་ཁུལ་དུ་བཅར་བ་ཡིན། ཁྱེད་རྣམ་པའི་རེ་བ་ཞིག་བཅོལ་ཏེ་ང་ལ་སྲིད་སྐྱོང་བཀོད་པ་རེད། ང་རང་ཆུང་དུས་ནས་ཕ་མའི་སློབ་གསོ་དང་། གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བྱིན་རླབས་ལ་བརྟེན་ནས་བོད་སྤྱི་བའི་དོན་དུ་ཞབས་ཕྱི་ཞུ་རྒྱུ་བྱུང་ཡོད་ལ། ང་ཚོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་ཀྱི་དགོངས་པ་དང་། བཀའ་དྲིན་རྗེས་སུ་དྲན་པའི་སྒོ་ནས་ལས་དོན་སྒྲུབ་རྒྱུ་གལ་ཆེན་པོ་ཡིན་ཞེས་གསུངས།
དེ་མཚུངས་དཔལ་ལྡན་སྲིད་སྐྱོང་མཆོག་གིས་མི་མང་རྣམས་ལ་བོད་མིའི་སྒྲིག་འཛུགས་ཀྱི་བཀའ་ཤག་སྐབས་བཅུ་དྲུག་པའི་སྲིད་བྱུས་ངོ་སྤྲོད་དང་འབྲེལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དགོངས་གཞི་དང་བཀའ་སློབ་ལམ་སྟོན་ལྟར་དབུ་མའི་ལམ་གྱི་སྲིད་བྱུས་གཞིར་བཞག་ཕྱག་ལས་གནང་གི་ཡོད་སྐོར་དང་། དབུ་མའི་ལམ་གྱི་ངོ་སྤྲོད་གནང་ཡོད། དེ་བཞིན་ཁོང་གིས་འཛམ་གླིང་སྟེང་བོད་མཐོ་སྒང་གི་གལ་གནད་དང་། ས་ཁམས་ཆབ་སྲིད་སྐོར་ངོ་སྤྲོད་ཞིབ་ཕྲ་གནང་ཞིང་། ད་ལྟ་བོད་ནང་དུ་རྒྱ་ནག་གི་འཛམ་གླིང་གི་ཆུ་མཛོད་ཆེ་ཤོས་བཟོས་ཡོད་པའི་སྐོར་སོགས་གསུངས།
དེ་ནས་ཁོང་གིས་རྒྱལ་སྤྱིའི་སྟེང་བོད་ཀྱི་དཀའ་རྙོག་དེ་གང་འདྲ་ཞིག་ལ་ངོས་འཛིན་བྱེད་ཀྱི་ཡོད་མེད་སྐོར་གསུང་སྐབས། ཉེ་ལམ་ཨ་རིིའི་སྲིད་གཞུང་ནས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་ཡིག་གཏན་འབེབས་གནང་བ་དེས་ཨ་རིའི་སྲིད་གཞུང་གིས་བོད་རྒྱའི་དཀའ་རྙོག་དེ་ད་ལྟ་སེལ་རྒྱུ་ཡིན་པ་ཞིག་ལ་ངོས་འཛིན་དང་། དཀའ་རྙོག་དེ་རྒྱལ་སྤྱིའི་ཁྲིམས་ཀྱི་སྒོ་ནས་སེལ་དགོས་པ། བོད་མིར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་གཙོས་རང་ཐག་རང་གཅོད་ཀྱི་ཐོབ་ཐང་ཡོད་པ། དེ་བཞིན་བོད་དེ་གནའ་སྔ་མོ་ནས་རྒྱ་ནག་གི་ཆ་ཤས་ཡིན་ཞེས་པ་དེར་ངོས་ལེན་མེད་པ་མ་ཟད། བོད་ཅེས་པ་དེ་བོད་རང་སྐྱོང་ལྗོངས་ལ་མོ་གོ་བར་མདོ་དབུས་ཁམས་གསུམ་ཆ་ཚང་ལ་གོ་དགོས་པ་སོགས་ཀྱི་གནད་དོན་གསལ་སྟོན་གནང་། དེ་མིན་རྒྱལ་སྤྱིའི་འགོ་ཁྲིད་རྣམས་ཀྱིས་བོད་དེ་རྒྱ་ནག་གི་ཆ་ཤས་ཡིན་ཞེས་གསུངས་ཚེ་བོད་དང་རྒྱ་ནག་བར་གྲོས་མོལ་གྱི་གཞི་མེད་ཅེས་ཡང་ཡང་འགྲེལ་བརྗོད་གནང་གི་ཡོད་པ་གསུངས། དེ་དག་བོད་མི་རྣམས་ནས་རྒྱལ་སྤྱིའི་མི་རྣམས་ལ་གོ་རྟོགས་སྤེལ་རྒྱུ་གལ་གང་ཆེན་པོ་ཡིན་ཞེས་གསུངས་པ་མ་ཟད། རྒྱལ་སྤྱིའི་མི་མང་ལ་འགྲེལ་བཤད་རྒྱབ་པར་ཐོག་མར་མི་མང་རྣམས་ནས་རྒྱལ་སྤྱིའི་ནང་གི་གནས་ཚུལ་དང་། ལྷག་པར་བོད་པའི་སྤྱི་ཚོགས་ནང་གི་གནས་སྟངས་སྐོར་གོ་རྟོགས་དགོས་རྒྱུ་གལ་ཆེན་པོ་ཆགས་ཡོད་པ་དང་། གནས་ཚུལ་དེ་དག་གོ་སའི་བརྒྱུད་ལམ་ཁག་ཡོད་པ་དེ་དག་དོ་སྣང་བྱེད་དགོས་གལ་ཡིན་ཞེས་གསུངས།
གཞན་ཡང་རྒྱ་ནག་གིས་བོད་དེ་ཆབ་སྲིད་རིང་ལུགས་ཀྱི་ལྷ་ཡུལ་ཞིག་ཡིན་ཞེས་བརྗོད་པ་དེ་རྩ་བ་ནས་བདེན་པ་མིན་པ་མ་ཟད། ད་ལྟ་རྒྱ་ནག་གཞུང་གིས་ལག་བསྟར་བྱེད་བཞིན་པའི་སྲིད་བྱུས་དེ་ནི་རྩོམ་པ་པོ་ཇོཇ་ཨོར་ཝེལ་གྱིས་བརྩམས་པའི་ ༡༩༨༤ ནང་བརྗོད་པའི་སྲིད་དབང་རིང་ལུགས་དང་གཅིག་མཚུངས་ཡིན་པ་གསལ་སྟོན་གནང་རྗེས་ཉེ་ཆར་བོད་ནང་དུ་ཀིརྟི་དགོན་པའི་གྲྭ་བཙུན་ཁག་ཅིག་ལ་སློབ་གྲྭ་སྒོ་བརྒྱབ་པའི་གནས་ཚུལ་སྐོར་པར་འགྲེམས་སྤེལ་བྱས་པའི་ཉེས་དམིགས་འོག་འཛིན་བཟུང་བྱས་ཡོད་པའི་སྐོར་སོགས་གསུངས།
མཐར་དཔལ་ལྡན་སྲིད་སྐྱོང་མཆོག་གིས་བསྟན་འཛིན་སྒང་གི་མི་འབོར་གྲངས་ཐོ་དང་། སློབ་གྲྭའི་སློབ་ཕྲུག་གི་གྲངས་ཐོ་ཚད་ལྡན་ཞིག་དགོས་པའི་ནན་སྐུལ་གནང་རྗེས་མི་མང་རྣམས་ཀྱི་དྲི་བ་ཁག་ལ་ལན་འདེབས་གནང་གྲུབ་མཚམས་ས་གནས་འགོ་འཛིན་ལས་ཁུངས་དང་། སཾ་བྷོ་ཊ་བསྟན་འཛིན་སྒང་གི་ཉལ་ཁང་གསར་པར་གཟིགས་སྐོར་གནང་ཡོད།
དཔལ་ལྡན་སྲིད་སྐྱོང་མཆོག་ལྷན་ནང་སྲིད་དྲུང་འཕར་བཀྲ་ཤིས་བདེ་སྐྱིད་ལགས་དང་། ནང་སྲིད་ལས་ཁུངས་ཀྱི་འབྲེལ་ཡོད་ལས་བྱེད་འཕྲིན་ལས་དབུ་མ་བ་ལགས་ལྷན་བཅར་ཞུས་ཡོད། །
