༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ ཟླ་བ་ ༡༡ པའི་ཚེས་ ༢ ཉིན་སྔ་དྲོ་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། སྤྱི་འཐུས་དགེ་བཤེས་ལྷ་རམས་པ་ཨ་ཀྲུག་ཚེ་བརྟན་ལགས་རྣམ་གཉིས་རྒྱ་གར་རྒྱལ་ས་ལྡི་ལི་ནས་གྷོ་ཝ་ཧ་ཀྲི་བརྒྱུད་འབུམ་སྡེ་ལར་ཕེབས་ཐོན་གྱིས་གྷོ་ཝ་ཧ་ཀྲི་གནམ་ཐང་དུ་ཕེབས་འབྱོར་མཚམས། བསྟན་འཛིན་སྒང་གཞིས་ཆགས་ཀྱི་ས་འཐུས་ཚོགས་གཙོ་ཕུན་ཚོགས་ཚེ་རིང་ལགས་ཀྱིས་གནམ་ཐང་ནས་སྣེ་ལེན་ཕེབས་བསུ་དང་། བསྟན་འཛིན་སྒང་གཞིས་ཆགས་བརྒྱུད་འབུམ་སྡེ་ལར་ཕེབས་ཐོན་སྐབས། ལམ་བར་དུ་བསྟན་འཛིན་སྒང་གཞིས་ཆགས་ཀྱི་ས་གནས་འགོ་འཛིན་རབ་བརྟན་ཚེ་རིང་ལགས་ཀྱིས་ཕེབས་བསུ། དེ་རྗེས་ཕྱི་དྲོ་བསྟན་འཛིན་སྒང་གཞིས་ཆགས་སུ་ཕེབས་འབྱོར་མཚམས། དེ་གའི་རྒྱུད་སྟོད་དགོན་པའི་ཕྱག་མཛོད་མཆོག་དང་། འབུམ་སྡེ་ལ་འབྲེལ་མཐུད་པ། ས་གནས་འགོ་འཛིན་ལས་ཁུངས་ཀྱི་ལས་བྱེད། གཞིས་ཆགས་ཀྱི་བརྒྱ་དཔོན་རྣམ་པ། ས་གནས་མཉམ་འབྲེལ་དང་། འཕྲོད་བསྟེན་སྨན་ཁང་། གཞོན་ནུ། བུད་མེད་ལྷན་ཚོགས། སམ་བྷོ་ཊ་སློབ་གྲྭའི་དགེ་སློབ་རྣམ་པ་བཅས་ནས་ཕེབས་བསུ་གཟབ་རྒྱས་ཞུས་པ་དང་། དེ་བཞིན་དགོན་པའི་ཕྱག་མཛོད་མཆོག་གིས་སྣེ་ཁྲིད་འོག དཔལ་ལྡན་རྒྱུད་སྟོད་དགོན་པའི་ནང་གནས་མཇལ་དང་། ས་གནས་ཀྱི་གནད་ཡོད་མི་སྣ་འདུ་འཛོམས་ཐོག་གསོལ་ཇ་བཞེས་ཏོག་འདེགས་འབུལ་བཅས་ཞུས་གནང་སོང་།
དེ་ནས་འབུམ་སྡེ་ལར་ཕེབས་ཐོན་སྐབས་ལམ་བར་དུ་ (Gacham) ཁུལ་ལ་གནས་སྡོད་བོད་རིགས་ཁ་འཐོར་མི་མང་རྣམས་ནས་དཔལ་ལྡན་ཚོགས་གཙོ་མཆོག་དང་། སྤྱི་འཐུས་དགེ་བཤེས་ལྷ་རམས་པ་ཨ་ཀྲུག་ཚེ་བརྟན་ལགས་རྣམ་གཉིས་ལ་སྣེ་ལེན་ཕེབས་བསུ་དང་། འབུམ་སྡེ་ལ་བཞུགས་གནས་མགྲོན་ཁང་ (Circuit House) དུ་ཕེབས་འབྱོར་སྐབས། མོན་ཡུལ་འབུམ་སྡེ་ལ་དགོན་ཐུབ་མཆོག་དགའ་ཚལ་གླིང་གྲྭ་ཚང་གི་སྐུ་ཚབ་སློབ་དཔོན་དང་། ཕྱག་མཛོད། ས་གནས་རང་བདེན་ཚོགས་ཆུང་གི་ཚོགས་མི་བཅས་ནས་སྣེ་ལེན་དང་། མགྲོན་ཁང་དུ་འབུམ་སྡེ་ལ་རྫོང་དཔོན་ལས་ཁུངས་ཀྱི་ལས་བྱེད་སངས་རྒྱས་ནོར་བུ་ (Shri Sange Norbu, Circle Officer, DC Office, Bomdila) ལགས་དང་། རྒྱ་གར་བྱང་ཤར་ཁུལ་གྱི་འཕགས་བོད་འབྲེལ་མཐུད་ཚོགས་པའི་ཚོགས་གཙོ་སྐུ་ཞབས་མཁའ་འགྲོ་ཐང་གྷུན་ (Khandu Thaungon) ལགས་རྣམ་གཉིས་སོ་སོར་ཕེབས་ཏེ། དཔལ་ལྡན་ཚོགས་གཙོ་མཆོག་དང་། སྤྱི་འཐུས་མཆོག་རྣམ་གཉིས་དང་ལྷན་མཇལ་འཕྲད་ཀྱིས་འདི་གའི་ས་གནས་ནང་ཕེབས་པར་འཚམས་འདྲི་ཞུས་གནང་སོང་།
གཞི་རྩའི་དཔལ་ལྡན་ཚོགས་གཙོ་མཆོག་དང་། སྤྱི་འཐུས་དགེ་བཤེས་ལྷ་རམས་པ་ཨ་ཀྲུག་ཚེ་བརྟན་ལགས་རྣམ་གཉིས་ཕྱི་ཚེས་ ༤ ཉིན་ཚོགས་གཏན་ཁེལ་བའི་མོན་ཡུལ་འབུམ་སྡེ་ལ་དགོན་ཐུབ་མཆོག་དགའ་ཚལ་གླིང་གྲྭ་ཚང་གི་གཙུག་ལག་ཁང་གསར་བཞེངས་ཀྱི་དབུ་འབྱེད་མཛད་སྒོར་ཆེད་བཅར་གནང་རྒྱུ་ཡིན་པ་བཅས།།
