༄༅། །ཕྱི་ལོ་ ༢༠༢༤ ཟླ་བ་ ༡༡ ཚེས་ ༢༣ དང་ ༢༤ བཅས་ཉིན་གྲངས་གཉིས་རིང་ཐའེ་ཝན་སྐུ་ཚབ་དོན་གཅོད་ལས་ཁུངས་ཀྱི་གོ་སྒྲིག་འོག་ཐའེ་ཝན་གྱི་རྒྱལ་ས་ཐའེ་པེར་གངས་ལྗོངས་གླེང་སྟེགས། ཨ་རིའི་བོད་དོན་རྒྱབ་སྐྱོར་ཁྲིམས་ཡིག་གི་ཤུགས་རྐྱེན་དང་རྒྱལ་སྤྱིའི་ཐོག་བོད་ཀྱི་གནས་བབ་དང་བོད་དོན་སྲིད་བྱུས་ཀྱི་ཁ་ཕྱོགས་ཞེས་ ༢༠༢༤ ལོའི་ཐུན་མོང་གི་གཞི་རྟེན་འཚོལ་བའི་རྒྱལ་སྤྱིའི་བོད་དོན་བགྲོ་གླེང་ཚོགས་འདུ་ཚོགས་གནང་ཡོད།
དེ་ཡང་ཚོགས་འདུའི་ཐོག་དགའ་ལྡན་ཕོ་བྲང་གི་དྲུང་ཆེ་རྔ་བ་ཚེ་རྒྱམ་ལགས་དང་། ཚོགས་དྲུང་བསོད་ནམས་རྡོ་རྗེ་ལགས། ཆབ་སྲིད་དྲུང་ཆེ་ཤ་འབྲོང་བཀྲ་ཤིས་རྒྱ་མཚོ་ལགས། ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས། ཐའེ་ཝན་སྐུ་ཚབ་དོན་གཅོད་འབའ་པ་སྐལ་བཟང་རྒྱལ་མཚན་ལགས། ཕྱི་དྲིལ་རྒྱ་ཡིག་ཚན་པའི་འགན་འཛིན་འཇམ་དབྱངས་ཚེ་རིང་ལགས། ཨ་རིའི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས། ཡུ་རོབ་རྒྱ་རིགས་འབྲེལ་མཐུད་པ་སངས་རྒྱས་སྐྱབས་ལགས། ཨོསྟྲེ་ལི་ཡ་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཟླ་བ་བཟང་མོ་ལགས། རྒྱ་ནག་གཞུང་གི་སྟངས་འཛིན་འོག་ཡོད་པའི་བོད་ནང་གི་མི་སེར་སྤེལ་ཡུལ་གཏན་འཇགས་སློབ་གྲྭའི་སྐོར་ཐེར་འདོན་གནང་མཁན་འབུམ་རམས་པ་རྒྱལ་ལོ་ལགས། ཐའེ་ཝན་བོད་རིགས་ཚོགས་པའི་ཚོགས་གཙོ་དཀོན་མཆོག་ལྷག་པ་ལགས། བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་ཕན་ཐོགས་ལགས། དེ་བཞིན་རྒྱ་ནག་ཐོག་ཉམས་ཞིབ་མཁས་པ་དང་། ཡུ་གུར། ཐའེ་ཝན། ལྷོ་སོག ཧོང་ཀོང་། རྒྱ་རིགས་མཁས་དབང་སོགས་མི་གྲངས་ ༡༠༠ ལྷག་ལྷན་ཞུགས་གནང་ཡོད།
སྐབས་དེར་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་ཀྱིས་ཚོགས་འདུའི་དབུ་འབྱེད་ཀྱི་གསུང་བཤད་སྐབས་བོད་མིའི་སྒྲིག་འཛུགས་ཀྱི་ངོས་ནས་རྒྱལ་སྤྱིའི་སྟེང་བོད་ཀྱི་དངོས་ཡོད་ལོ་རྒྱུས་གསལ་བཀྲོལ་གནང་བཞིན་ཡོད་པ་དང་། ཉེ་བའི་འཆར་ཨ་རིའི་སྲིད་གཞུང་ནས་བོད་རྒྱའི་རྩོད་རྙོག་སེལ་ཐབས་ཀྱི་ཁྲིམས་ཡིག་གཏན་འབེབས་གནང་ཡོད་པ་འདིའི་ནང་། རྒྱ་ནག་གཞུང་གིས་བོད་དོན་དང་བོད་ཀྱི་དངོས་ཡོད་ལོ་རྒྱུས་ལ་འཁྱོག་བཤད་བྱེད་བཞིན་པར་ཁ་གཏད་གཅོག་གི་ཡོད་པ་མ་ཟད། ཨ་རིའི་གཞུང་འབྲེལ་གྱི་སྲིད་བྱུས་ཐོག་ནས་རྒྱ་ནག་མི་མང་སྤྱི་མཐུན་རྒྱལ་ཁབ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་བམ་མང་གཙོའི་ལམ་ནས་འོས་འདེམས་བྱུང་བའི་བོད་མིའི་འགོ་ཁྲིད་དང་ལྷན་སྔོན་འགྲོའི་ཆ་རྐྱེན་གང་ཡང་མེད་པའི་ཐོག་ནས་གྲོས་མོལ་ཡོང་ཐབས་སུ་རྒྱབ་སྐྱོར་བསྐྱར་ནན་གནང་གི་ཡོད་པ་གསལ་སྟོན་དང་སྦྲགས། བོད་མིའི་སྒྲིག་འཛུགས་ངོས་ནས་གཉིས་སྨན་དབུ་མའི་ལམ་གྱི་སྲིད་བྱུས་གཞིར་བཞག་གྲོས་མོལ་ལམ་ནས་བོད་རྒྱའི་དཀའ་རྙོག་སེལ་རྒྱུའི་ཆོད་སེམས་བརྟན་པོ་ཡོད་པ་གསུང་སྟེ། སྲིད་བྱུས་འདི་ནི་བོད་རྒྱ་གཉིས་ཕན་དང་ཕུགས་ལ་སྨིན་པའི་ཐབས་ལམ་གལ་ཆེན་ཞིག་ཡིན་པ་འགྲེལ་བརྗོད་གནང་ཡོད།
ཉིན་གྲངས་གཉིས་ཀྱི་ཚོགས་འདུའི་ཐོག་ཨ་རིའི་བོད་དོན་རྒྱབ་སྐྱོར་གྱི་ཁྲིམས་ཡིག་གི་ཤུགས་རྐྱེན་དང་རྒྱལ་སྤྱིའི་སྟེང་བོད་ཀྱི་གནས་བབ་དང་བོད་དོན་སྲིད་བྱུས་ཀྱི་ཁ་ཕྱོགས། རྒྱལ་སྤྱིའི་སྤྱི་ཚོགས་ནས་བོད་དོན་ལ་དོ་སྣང་དང་བོད་མིའི་སྒྲིག་འཛུགས་ནས་རྒྱ་རིགས་ཐོག་ལས་དོན་སྤེལ་ཕྱོགས། བོད་རྒྱའི་དཀའ་རྙོག་སེལ་བའི་ཐབས་ལམ་གཉིས་སྨན་དབུ་མའི་ལམ་གྱི་སྲིད་བྱུས་སོགས་ཀྱི་ཐད་བགྲོ་གླེང་དང་དེ་འབྲེལ་ཐུན་མོང་གི་གྲོས་ཆོད་གཏན་འབེབས་བཅས་གནང་ཡོད། །
