༄༅། །ཕྱི་ལོ་ ༢༠༢༤ ཟླ་བ་ ༡༡ ཚེས་ ༢ ཉིན་ཉི་འོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཉི་འོང་བོད་རིགས་ཚོགས་པའི་ཚོགས་མི་གསར་རྙིང་བར་གྱི་རྩིས་སྤྲོད་རྩིས་ལེན་དུ་གཙོ་ཞུགས་གནང་ཡོད།
དེ་ཡང་ཉི་འོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ལས་ཁྱུར་བོད་རིགས་ཚོགས་པའི་ཚོགས་མི་རྣམས་ནས་ལྷག་བསམ་རྣམ་དག་གི་ཕྱག་ལས་གནང་བར་ཐུགས་རྗེ་ལེགས་འབུལ་ཞུས་པ་དང་ཆབས་ཅིག་གསར་འདེམས་ཚོགས་མི་རྣམས་ལ་འཚམས་འདྲི་དང་ཚོགས་མི་གསར་རྙིང་གཉིས་ལ་མགུལ་དར་གཡོག་སྟེ་ས་གནས་སུ་བོད་དོན་གོ་རྟོགས་དང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་རྣམས་མི་མང་ལ་མུ་མཐུད་ནས་སྤེལ་ཆེད་ཚོགས་མི་གསར་པ་རྣམས་དང་ལྷན་འབྱུང་འགྱུར་མཉམ་ལས་གནང་རྒྱུའི་དམིགས་ཡུལ་ཡོད་སྐོར་གསུངས།
སྐབས་དེར་ལས་ཁྱུར་བོད་རིགས་ཚོགས་པའི་ཚོགས་གཙོ་བསྟན་འཛིན་ཤེས་རབ་ལགས་ཀྱིས་སྐུ་ཚབ་དོན་ཁང་དང་། བོད་རིགས་ཚོགས་པས་རོགས་སྐྱོར་གནང་བར་བཀའ་དྲིན་ཆེ་ཞུས་པ་དང་། ལོ་གཉིས་ཀྱི་དུས་ཡུན་ནང་ཚོགས་ཆུང་གིས་གོ་སྒྲིག་གནང་བའི་ལས་འགུལ་ཁག་གི་སྐོར་སྙན་སེང་ཞུས། གསར་འདེམས་ཚོགས་གཙོ་རྡོ་རྗེ་ལགས་ཀྱིས་བོད་རིགས་ཚོགས་པས་ཁོང་དང་ཚོགས་མི་རྣམས་ལ་ཡིད་ཆེས་གནང་བར་ཐུགས་རྗེ་ཆེ་ཞུས་པ་དང་། བོད་མིའི་འཐབ་རྩོད་ཀྱི་ལས་དོན་ཆེད་ནུས་པ་གང་ཡོད་འདོན་རྒྱུའི་ཁས་ལེན་གནང་ཡོད།
གསར་དུ་བདམས་ཐོན་བྱུང་བའི་སྐབས་བཅུ་གསུམ་པའི་ཉི་འོང་བོད་རིགས་ཚོགས་པའི་ཚོགས་མི་ཁོངས་ནས་ཚོགས་གཙོར་རྡོ་རྗེ་ལགས་དང་། ཚོགས་མིར་བློ་གྲོས་རྒྱ་མཚོ་ལགས། བསྟན་འཛིན་ཚེ་རིང་ལགས། ཀརྨ་རྒྱ་མཆོ་ལགས། བསྟན་འཛིན་བརྩོན་འགྲུས་ལགས་བདམས་ཐོན་བྱུང་ཡོད་པ་བཅས།།
