༄༅། །འདི་གར་ཆོས་རིག་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ ཟླ་བ་ ༡༡ ཚེས་ ༢༡ ཉིན་ཅོན་ཏ་ར་བོད་ཁྱིམ་སློབ་གྲྭ་དབུ་བརྙེས་ནས་མི་ལོ་ ༢༠ ཧྲིལ་པོ་འཁོར་བའི་དུས་ཆེན་གྱི་མཛད་སྒོའི་སྐུ་མགྲོན་གཙོ་བོར་ཆོས་རིག་དྲུང་ཆེ་བདུད་འདུལ་རྡོ་རྗེ་ལགས་མགྲོན་འབོད་གནང་བ་ལྟར་ཆེད་ཕེབས་ཀྱིས་གསུང་བཤད་གནང་ཡོད།

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༤༥ ཐོག་ལྷ་གཞུང་རྔོན་པའི་འདོན་སྤྱན་འབུལ་ཞུས་ཏེ། སློབ་གྲྭའི་སློབ་སྤྱི་ནས་དགའ་བསུའི་འཚམས་འདྲིའི་གསུང་བཤད་གནང་རྗེས་ཆོས་རིག་དྲུང་ཆེ་ནས་བོད་ཁྱིམ་ནང་ཁུལ་གྱི་རིགས་ལམ་འདུ་འཛོམས་ནང་མཉམ་ཞུགས་གནང་མཁན་སློབ་ཕྲུག་རྣམས་ལ་ཕྱག་འཁྱེར་དང་། བུམ་སྐྱོན་གསུམ་བྲལ་གྱི་སློབ་མ་རྩེ་ཕུད་གཉིས་ལ་ཕྱག་འཁྱེར། ཞབས་ལོ་ ༢༥ དང་ ༣༠ སོན་པའི་དགེ་ལས་རྣམས་ལ་ཕྱག་འཁྱེར་དང་བྱ་དགའ་གནང་རྗེས་བླང་དོར་གྱི་གསུང་བཤད་གནང་ཡོད།དེ་རྗེས་དགེ་ལས་སློབ་ཕྲུག་རྣམས་ནས་བོད་ཀྱི་ཐུན་མོང་མ་ཡིན་པའི་ལྷ་གཞུང་རྒྱ་བཟའ་བལ་བཟའི་རྣམ་ཐར་གཟིགས་འབུལ་དབུ་འཛུགས་གནང་། ཆུ་ཚོད་ ༡༢།༣༠ ཐོག་ཉིན་གུང་གསོལ་ཚིགས་གྲུབ་མཚམས་སློབ་གྲྭའི་བུ་དང་བུ་མོའི་སྡོད་ཁང་གི་བློ་གསར་བྱིས་པའི་སྣ་འདྲེན་ལས་གཞི་ (Smart Children Initiative Project (Young Learners Lounge) དབུ་འབྱེད་གནང་གྲུབ་མཚམས་ཆུ་ཚོད་ ༡།༣༠ ཐོག་ལྷ་གཞུང་མུ་མཐུད་གཟིགས་འབུལ་ཞུས། མཐར་སློབ་གྲྭའི་རིག་གཞུང་ཚོགས་གཙོ་ནས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་གྲོལ།

མཛད་སྒོའི་སྐུ་མགྲོན་དུ་བོད་མི་མང་སྤྱི་འཐུས་གསེར་རྟ་ཚུལ་ཁྲིམས་ལགས་དང་། བོད་ཁྱིམ་སྤྱི་ཁྱབ་གཙོ་འཛིན་བསོད་ནམས་སྲི་གཅོད་ལགས། བོད་ཁྱིམ་ཤེས་ཡོན་ངེས་སྟོན་པ། ས་གནས་འཐུས་ཚོགས་ཀྱི་ཚོགས་གཙོ་རྣམ་པ། ས་གནས་འགོ་འཛིན་རྣམ་པ། དགོན་སྡེ་ཁག་གི་སྐུ་ཚབ་རྣམ་པ། སློབ་གྲྭ་ཁག་གི་དབུ་འཛིན་དང་སློབ་སྤྱི་འགན་འཛིན་རྣམ་པ། དེ་བཞིན་ས་གནས་ཀྱི་གཞུང་དང་གཞུང་ཁོངས་མིན་པའི་ཚོགས་པ་ཁག་གི་སྐུ་ཚབ་ཁག་ཕེབས་ཡོད་པ་བཅས།།