༄༅། །ཕྱི་ལོ་ ༢༠༢༤ ཟླ་བ་ ༩ ཚེས་ ༢༨ རེས་གཟའ་སྤེན་པའི་ཉིན་ཨ་རིའི་མལ་སི་ཆུ་སི་བོད་རིགས་སྤྱི་མཐུན་ཚོགས་པའི་གོ་སྒྲིག་འོག་བོད་དོན་ལ་རྒྱབ་སྐྱོར་གཡོ་བ་མེད་པ་གནང་མཁན་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ཇིམ་མེག་གྷོ་ཝན་ (Jim McGovern) མཆོག་ལ་ཐུགས་རྗེ་ཆེ་ཞུའི་མཛད་སྒོ་ཞིག་ཚོགས་ཡོད།
དེ་ཡང་ཨ་རིའི་མལ་སི་ཆུ་སི་ (Massachusetts) ས་གནས་བོད་རིགས་སྤྱི་མཐུན་ཚོགས་པས་སྤྱི་ནོར་༸གོང་ས་༸སྐྱབས་མགོན་ཆེན་པོ་དང་། བོད་དང་བོད་མིར་ལོ་མང་རིང་ཤ་ཚ་ཆེན་པོའི་རྒྱབ་སྐྱོར་གནང་མཁན། དེ་བཞིན་ཉེ་ལམ་ཨ་རིའི་སྲིད་གཞུང་ནས་གཏན་འབེབས་གནང་བའི་བོད་རྒྱའི་རྩོད་རྙོག་སེལ་བའི་ཁྲིམས་ཡིག་འདི་ཉིད་གྲོས་ཚོགས་སུ་འདོན་སྤེལ་གནང་མཁན་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ཇིམ་མེག་གྷོ་ཝན་མཆོག་ལ་ཐུགས་རྗེ་ཆེ་ཞུའི་མཛད་སྒོ་ཞིག་ཚོགས་ཡོད། 
མཛད་སྒོའི་ཐོག་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེེན་པ་ཚེ་རིང་མཆོག་གིས་བརྙན་ལམ་བརྒྱུད་གྲོས་ཚོགས་འཐུས་མི་སྐུ་ཞབས་ཇིམ་མེག་གྷོ་ཝན་མཆོག་ལ་འཚམས་འདྲི་དང་འབྲེལ། གྲོས་ཚོགས་འཐུས་མི་ཁོང་གིས་བློས་གཏོང་ཆེན་པོས་བོད་དོན་ལ་རྒྱབ་སྐྱོར་གཡོ་བ་མེད་པ་བཞིན་པར་བཀའ་དྲིན་ཆེ་ཞུས་འདུག
ས་གནས་བོད་མི་དང་གནད་ཡོད་མི་སྣ་ཁག་གཅིག་མཉམ་འཛོམས་གནང་བའི་མཛད་སྒོ་དེའི་ཐོག་ལྷོ་བྱང་ཨ་རིའི་ཁུལ་གྱི་བོད་མི་མང་སྤྱི་འཐུས་དོན་གྲུབ་ཚེ་རིང་ལགས་དང་། བྱང་ཨ་རིའི་སྐུ་ཚབ་དོན་གཅོད་འབུམ་རམས་པ་རྣམ་རྒྱལ་ཆོས་གྲུབ་ལགས། རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་བསྟན་ཆོས་རྒྱ་མཚོ་ལགས། ས་གནས་བོད་རིགས་སྤྱི་འཐུས་ཚོགས་པའི་ཚོགས་གཙོ་ཚུལ་ཁྲིམས་སྐལ་བཟང་ལགས། བོད་མི་མང་སྤྱི་འཐུས་ཟུར་པ་དང་མཛད་སྒོ་གོ་སྒྲིག་ཚོགས་ཆུང་གི་ཚོགས་མི་ཤར་གླིང་བསྟན་འཛིན་ཟླ་སྒྲོན་ལགས་བཅས་ཀྱིས་གྲོས་ཚོགས་འཐུས་མི་སྐུ་ཞབས་ཇིམ་མེག་གྷོ་ཝན་མཆོག་ལ་ཐུགས་རྗེ་ཆེ་ཞུའི་གསུང་བཤད་གནང་ཡོད་པ་རེད།
མཛད་སྒོའི་ཐོག་གྲོས་ཚོགས་འཐུས་མི་སྐུ་ཞབས་ཇིམ་མེག་གྷོ་ཝན་མཆོག་གིས་འགྲོ་བ་མིའི་ཐོབ་ཐང་དང་། ཞི་བདེ། སྙིང་སྟོབས་སྐོར་གསུང་ཞིང་། བོད་མིའི་སེམས་ཤུགས་ནི་རིན་ཐང་བྲལ་བའི་འཛམ་གླིང་འགྱུར་བ་གཏོང་ཐུབ་པའི་ནུས་པ་ལྡན་ཡོད་སྐོར་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུ་ཁྲིད་རྣམ་པ་དང་། ལས་འགུལ་བ། བོད་དོན་རྒྱབ་སྐྱོར་བ་བཅས་ལ་མཇལ་ཁའི་སྐབས་སྩལ་བའི་བཀའ་སློབ་ལམ་སྟོན་ལ་སེམས་འགུལ་ཆེན་པོ་ཐེབས་ཡོད་པ་གསལ་འདོན་གནང་འདུག་མ་ཟད། སྐུ་ཞབས་ཇིམ་མེག་གྷོ་ཝན་མཆོག་གིས་ཁོང་རང་ཉིད་ལ་བོད་ཀྱི་ཐུན་མོང་མ་ཡིན་པའི་རིག་གཞུང་ལས་མཆེད་པའི་བརྩེ་སེམས་དང་། གུས་ཞབས་བཅས་ཀྱི་བློ་སྐྱེད་ཟབ་མོ་ཐོབ་ཚུལ་སྐོར་དང་འབྲེལ། རྩོད་རྙོག་དང་འཚེ་བའི་བྱ་སྤྱོད་སྤེལ་བཞིན་པའི་གོ་ལ་འདི་བཞིན་སྔར་ལམ་འཆམ་མཐུན་དང་བདེ་སྐྱིད་ལྡན་པ་ཞིག་བསྐྲུན་རྒྱུར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དབུ་ཁྲིད་ལམ་སྟོན་དང་། བོད་ཀྱི་ཐུན་མོང་མ་ཡིན་པའི་རིག་གཞུང་དེ་དག་ཉེ་བར་མཁོ་བ་ཞིག་ཡིན་པའི་གལ་གནད་སྐོར་གསུང་འདུག ལྷག་པར་སྐུ་ཞབས་ཁོང་གིས་ཨ་རིའི་གྲོས་ཚོགས་སུ་བོད་དོན་ལ་མུ་མཐུད་རྒྱབ་སྐྱོར་གནང་རྒྱུའི་ཆོད་སེམས་བརྟན་པོ་ཡོད་སྐོར་གསུང་པ་དང་། སྤྱི་ཚོགས་དང་། རྒྱལ་ཁབ། འཛམ་གླིང་ཁྱོན་ཡོངས་སུ་བཟང་ཕྱོགས་ཀྱི་འགྱུར་བ་གཏང་དགོས་ན། བསམ་བློ་གཅིག་མཐུན་དང་བཟང་པོའི་མི་རྣམས་མཉམ་རུབ་ཀྱི་སྒོ་ནས་འགྱུར་བ་གཏང་དགོས་པའི་ལམ་སྟོན་གནང་འདུག
ཐེངས་འདིའི་མཛད་སྒོའི་ཐོག་གྲོས་ཚོགས་འཐུས་མི་སྐུ་ཞབས་ཇིམ་མེག་གྷོ་ཝན་མཆོག་ལ་ཐུགས་རྗེ་ཆེ་ཞུ་མཚོན་ཆེད་རྒྱ་བོད་གཉིས་ཐ་དད་ཡིན་པར་མཚོན་པའི་བོད་བོད་ཡུལ་ན་སྐྱིད། རྒྱ་རྒྱ་ཡུལ་ན་སྐྱིད་ཅེས་དེ་སྔ་ཆོས་རྒྱལ་ཁྲི་རལ་སྐབས་བཞེངས་པའི་རྒྱ་བོད་དབར་གྱི་རྡོ་རིང་འདིའི་འདྲ་གཟུགས་ཤིག་འབུལ་ལམ་ཞུས་ཡོད་པ་རེད། །
