༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། སྐབས་ ༡༧ པའི་བོད་མི་མང་སྤྱི་འཐུས་རྣམ་པ་ལོ་གཉིས་དང་ཕྱེད་ཕྱི་མའི་ནང་མང་ཚོགས་ལ་ཆབ་སྲིད་སོགས་ཀྱི་ལམ་སྟོན་དང་། བདེ་སྡུག་གཟིགས་ཞིབ་སླད་ཕེབས་རྒྱུའི་ལས་རིམ་ཡོད་པ་ལྟར། བོད་མི་མང་སྤྱི་འཐུས་དགེ་བཤེས་ལྷ་རམས་པ་གོ་བོ་བློ་བཟང་ཕན་བདེ་ལགས་དང་སྤྱི་འཐུས་རྒྱལ་ལྡོང་ཕུར་པ་རྡོ་རྗེ་ལགས་རྣམ་གཉིས་ཕྱི་ལོ་ ༢༠༢༤ ཟླ་ ༡༠ ཚེས་ ༧ ནས་ ༢༡ བར་རྒྱ་གར་བྱང་ཕྱོགས་ཤྲི་ན་གྷར་དང་། དཀར་འཁྱིལ། ལ་དྭགས་རྒྱལ་ས་སླེ། ཟངས་དཀར། ནུབ་ར། དུར་དུག བྱང་ཐང་ནུབ་མ་དང་། བཀག་གཞུང་། རྒོད་ཡུལ། ཧེན་ལེ། མ་ཁྱུ། བཅུ་མུར། སུམ་མདོ། ས་སྨད་བཅས་སུ་གཞུང་འབྲེལ་ས་བགོས་ཕྱོགས་བསྐྱོད་གནང་གཏན་ཁེལ་ཡོད།དེ་ཡང་སྤྱི་འཐུས་རྣམ་པ་གཉིས་ཕྱི་ཟླ་ ༡༠ ཚེས་ ༧ ཉིན་དྷ་ས་ནས་ཅན་དྷི་གྷར་བརྒྱུད་ཤྲི་ན་གྷར་ལ་ཕེབས་ཐོན་གནང་རྒྱུ་དང། ཕྱི་ཚེས་ ༨ ཉིན་ས་གནས་སུ་ལས་རིམ་བསྐྱང་རྒྱུ་དང་། ཕྱི་ཚེས་ ༩ ཉིན་ཤྲི་ན་གྷར་ནས་དཀར་འཁྱིལ་ལ་ཕེབས་ཐོན་གྱིས་ས་གནས་སུ་ལས་རིམ། ཕྱི་ཚེས་ ༡༠ ཉིན་དཀར་འཁྱིལ་ནས་ལ་དྭགས་རྒྱལ་ས་སླེ་རུ་ཕེབས་ཐོན་གནང་རྒྱུ། ཕྱི་ཚེས་ ༡༡ ནས་ ༡༣ བར་ལ་དྭགས་སླེ་དང་། ཟངས་དཀར། ནུབ་ར། དུར་དུག་བཅས་ལ་ལས་རིམ། ཕྱི་ཚེས་ ༡༤ ནས་ ༡༨ བར་ལ་དྭགས་བྱང་ཐང་ཁུལ་ལ་ལས་རིམ། ཕྱི་ཚེས་ ༡༩ ཉིན་ལ་དྭགས་རྒྱལ་ས་སླེ་ཁུལ་ལ་མུ་མཐུད་ལས་རིམ། ཕྱི་ཚེས་ ༢༠ ཉིན་ལ་དྭགས་རྒྱལ་ས་སླེ་ནས་རྒྱལ་ས་ལྡི་ལིར་ཕྱིར་ཕེབས་དང་། ཕྱི་ཚེས་ ༢༡ ཉིན་ལྡི་ལི་ནས་བཞུགས་སྒར་དྷ་སར་ཕྱིར་ཕེབས་གནང་རྒྱུ་ཡིན་པ་བཅས། །
