༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་སྲིད་འཛིན་ཟུར་པ་སྐུ་ཞབས་ཇི་མི་ཀཱར་ཊར་མཆོག་དགུང་གྲངས་བརྒྱ་ཐམ་པར་ཕེབས་པའི་འཁྲུངས་སྐར་ལ་འཚམས་འདྲི་མཛད་ཡོད།
དེ་ཡང་༸མགོན་པོ་མཆོག་གིས། ཁྱེད་ཀྱི་འཁྲུངས་སྐར་ཉིན་ཁྱེད་རང་གི་ནང་མི་དང་ལྷན་དགའ་སྤྲོའི་ངང་སྲུང་བརྩི་ཞུ་ཐུབ་པའི་སྨོན་ལམ་ཡོད། ཁྱེད་ཀྱིས་ད་བར་མི་ཚེ་དོན་དང་ལྡན་པ་ཞིག་སྐྱེལ་ཡོད་པ་དང་། ཁྱེད་ཀྱིས་མཛད་རྗེས་བཟང་པོར་རྗེས་སུ་ཡི་རང་ཞུ་གི་ཡོད། ཁྱེད་ཀྱིས་ལོ་མང་རིང་མུ་མཐུད་ནས་གཞན་ལ་ཕན་པའི་ཐུགས་ཁུར་གནང་བ་ནི། ང་ཚོ་ཚང་མར་མིག་དཔེ་བཟང་པོ་ཞིག་བསྟན་ཡོད་ལ། ངོས་ཀྱིས་ཁྱེད་ལ་སེམས་གཏིང་ནས་ཐུགས་རྗེ་ཆེ་ཞུ་རྒྱུ་ཡིན། ཞེས་འཁོད་ཡོད།
