༄༅། །ཕྱི་ལོ་ ༢༠༢༤ ཟླ་བ་ ༡༠ ཚེས་ ༠༩ ཉིན་བོད་མིའི་སྒྲིག་འཛུགས་སྤྱི་ཁྱབ་རྩིས་ཞིབ་ལས་ཁང་གི་གོ་སྒྲིག་འོག ཉེ་ལམ་གསར་དུ་བསྐོ་བཞག་བྱུང་བའི་ལས་བྱེད་རྣམས་ལ་དམིགས་ཏེ། རྩིས་ཞིབ་ལམ་སྟོན་མ་དེབ་དང་། སྒྲིག་གཞི། ཊེ་ལི་ཟབ་སྦྱོང་གནང་འགོ་བཙུགས་ཡོད།

ཟབ་སྦྱོང་གི་དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོར་སྤྱི་ཁྱབ་རྩིས་ཞིབ་ལས་ཁང་གི་རྩིས་ཞིབ་སྤྱི་ཁྱབ་པ་ལྷག་པ་རྒྱལ་མཚན་ལགས་ཕེབས་ཞུགས་ཀྱིས་ཟབ་སྦྱོང་དབུ་འབྱེད་དང་འབྲེལ་གསུང་བཤད་གནང་ཞིང་། ཁོང་གིས་སྐབས་དེར་སྒྲིག་འཛུགས་ནང་ཕྱི་གསལ་ནང་གསལ་དང་། ཡིད་ཆེས་འཕེར་བ་ཡོང་བར་རྩིས་ཞིབ་པ་རྣམས་ལ་ལས་འགན་ཆེན་པོ་ཡོད་པ་དང་། རྩིས་ཞིབ་པ་རྣམས་ནས་སྐྱོན་བཙལ་རྒྱུ་གཙོ་བོ་མ་ཡིན་པར་སྒྲིག་འཛུགས་སྲ་བརྟན་ཚགས་ཚུད་ཡོང་བར་ཞབས་འདེགས་ཞུ་རྒྱུ་དེ་ཡིན་པ་གསུངས་པའི་ཐོག ཚོགས་བཅར་བ་རྣམས་ནས་ཟབ་སྦྱོང་བརྒྱུད་གང་ཐུབ་བློ་སྐྱེད་ལེན་རྒྱུར་འབད་རྩོལ་གནང་དགོས་པའི་ལམ་སྟོན་གནང་ཡོད་པ་རེད།དེ་རྗེས་སྤྱི་ཁྱབ་རྩིས་ཞིབ་ལས་ཁང་གི་དྲུང་འཕར་འཕྲིན་ལས་ཆོས་འཕེལ་ལགས་ཀྱིས་ཟབ་སྦྱོང་གི་དམིགས་ཡུལ་དང་། བསླབ་གཞི། ཚོགས་ཐུན་ཁག་ངོ་སྤྲོད་གནང་རྗེས་ཟུང་དྲུང་དཀོན་མཆོག་དབང་འདུས་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་ཞིང་། སྐབས་དེར་ཁོང་གིས་ཟབ་སྦྱོང་ནང་དངོས་ཤུགས་བརྒྱུད་གསུམ་ནས་རོགས་སྐྱོར་གནང་མཁན་སྤྱི་དང་། ལྷག་པར་དུ་དཔལ་འབྱོར་ཐོག་རོགས་སྐྱོར་གནང་མཁན་(National Democratic Institute )རོགས་ཚོགས་ལ་ཐུགས་རྗེ་ལེགས་འབུལ་ཞུས་ཡོད།

ཉིན་གྲངས་བཅུ་རིང་ཟབ་སྦྱོང་བ་རྣམས་ལ་རྡ་རམ་ས་ལའི་འཛིན་སྐྱོང་སྦྱོང་བརྡར་བསྟི་གནས་ཁང་དུ་རྩིས་ཞིབ་བྱེད་ཕྱོགས་དང་། ཊེ་ལི་མཉེན་ཆས་བཀོལ་སྤྱོད་བྱེད་སྟངས། དངོས་ཐོ་བཀོད་ཐབས། དངོས་ཟོག་དང་ཞབས་ཞུའི་ཁྲལ་རིགས། ཊེ་ལི་བརྒྱུད་ནས་རྩིས་ཞིབ་བྱེད་ཕྱོགས་སོགས་ཀྱི་སྐོར་སློབ་སྟོན་གྱིས་གསར་ཞུགས་སྲི་ཞུའི་ལས་བྱེད་རྣམས་ཀྱི་རྩིས་ཞིབ་ནུས་རྩལ་ཡར་རྒྱར་གཏང་རྒྱུའི་དམིགས་ཚད་བཟུང་ཡོད། དེ་རྗེས་ཚོགས་བཅར་བ་རྣམས་བདེ་སྐྱིད་གླིང་ཡན་ལག་རྩིས་ཞིབ་ལས་ཁུངས། སྦེལ་ཀོབ་ཡན་ལག་རྩིས་ཞིབ་ལས་ཁུངས་བཅས་སུ་ཆེད་ཕེབས་ཀྱིས་དོན་དངོས་ཐོག་ནས་རྩིས་ཞིབ་བྱེད་སྟངས་མིག་སྟོན་བྱ་རྒྱུ་མ་ཟད། རྩིས་ཞིབ་བྱ་ཡུལ་ཁོར་ཡུག་མི་འདྲ་བ་རྒྱུས་ལོན་དང་། རྩིས་ཞིབ་ལག་ལེན་ཐོག་ཉམས་མྱོང་གསག་རྒྱུར་དམིགས་ཡུལ་བཟུང་ཡོད་པ་བཅས།།