༄༅། །ཕྱི་ལོ་ ༢༠༢༤ ཟླ་བ་ ༡༠ ཚེས་ ༡༠ ཉིན་ལྷོ་ཨ་རིའི་སྐུ་ཚབ་དོན་ཁང་གི་མཐུན་འགྱུར་འོག་བ་རཱ་ཛིལ་གྱི་གྲོང་ཁྱེར་ས་ཧུ་པ་ཧོ་ལོ་རུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཙན་བྱོལ་དུ་ཆིབས་བསྒྱུར་བསྐྱངས་པའི་མཛད་པ་དང་འབྲེལ་བའི་དངོས་བྱུང་གློག་བརྙན། བོད་ནམ་ཡང་མ་བརྗེད། ཅེས་པ་གཟིགས་འབུལ་ཞུ་འགོ་ཚུགས་ཡོད།
དེ་ཡང་མགོན་པོ་མཆོག་གི་མཛད་པ་དང་འབྲེལ་བའི་དངོས་བྱུང་གློག་བརྙན་དེ་ཉིད་བ་རཱ་ཛིལ་ནང་ཕྱི་ཟླ་ ༡༠ ཚེས་ ༣༡ ནས་ (Apple TV+, YouTube Movies,Google Play) མཉེན་ཆས་བརྒྱུད་གཟིགས་འབུལ་ཞུ་འགོ་འཛུགས་རྒྱུ་ཡིན་པ་ལྟར། འབྱུང་འགྱུར་ལོ་གཅིག་ནང་དུ་འཛམ་གླིང་རྒྱལ་ཁབ་ ༡༢༠ ལྷག་ནང་སྐད་ཡིག་འདྲ་མིན་དུ་བསྒྱུར་ཏེ་གཟིགས་འབུལ་ཞུ་རྒྱུ་རེད་འདུག་ལ། རྒྱ་གར་ནང་དུ་རྗེས་ལོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༩༠ ཕེབས་པའི་འཁྲུངས་སྐར་དང་བསྟུན་ནས་གཟིགས་འབུལ་ཞུ་རྒྱུ་རེད་འདུག
བ་རཱ་ཛིལ་ནང་དུ་གློག་བརྙན་གཟིགས་འབུལ་དབུ་འབྱེད་མཛད་སྒོ་དང་བསྟུན་ནས་ཨོསྟྲི་ཡཱའི་ཡུལ་སྐོར་བ་ཧན་རིག་ཧེ་རར་ (Heinrich Harrer) ལགས་ཀྱིས་བོད་ས་མ་ཤོར་གོང་དུ་བརྒྱབ་པའི་པར་རིས་འགྲེམས་སྟོན་གནང་ཡོད་ཅིང་། ཁོང་གི་པར་མང་པོ་ཞིག་དངོས་བྱུང་གློག་བརྙན་དེའི་ནང་བསྟན་ཡོད་ལ། གློག་བརྙན་བཟོ་སྐྲུན་པ་ཇེན་པོལ་མར་ཊི་ན་ཛ་ (Jean-Paul Martinez) ལགས་ཀྱིས་པར་རིས་དེ་དག་གི་གལ་གནད་སྐོར་གསལ་སྟོན་གནང་ཡོད། དེ་བཞིན་མཛད་སྒོའི་ཐོག་འབྲས་སྤུངས་བློ་གསལ་གླིང་གྲྭ་ཚང་གི་དགེ་འདུན་པ་ཁག་ཅིག་ནས་སྤྱན་རས་གཟིགས་ཀྱི་དཀྱིལ་འཁོར་བཞེངས་རྒྱུ་མཚོན་པའི་ཞལ་འདོན་གསུང་འདོན་གནང་ཡོད།
མཛད་སྒོའི་ནང་ས་གནས་ཀྱི་སྙན་གྲགས་ཅན་གྱི་མི་སྣ་དང་། གསར་འགོད་པ། གཞས་པ་ (Tierry de Araújo Paixão da Costa) གློག་བརྙན་འཁྲབ་སྟོན་པ་ (João Signorelli) སོགས་ནས་དོ་སྣང་ཆེན་པོ་གནང་སྟེ། མཉམ་ཞུགས་གནང་ཡོད། ༸གོང་ས་མཆོག་གི་མཛད་པ་དང་འབྲེལ་བའི་གློག་བརྙན་དེ་ནི་མགོན་པོ་མཆོག་བཙན་བྱོལ་དུ་ཆིབས་བསྒྱུར་སྐྱོང་རིམ་ཙམ་མ་ཡིན་པར། བོད་ཀྱི་ཆོས་དང་། རིག་གཞུང་། སྒྱུ་རྩལ་གསལ་སྟོན་བྱས་པ་བརྒྱུད་འཛམ་གླིང་གི་སྡིངས་ཆའི་སྟེང་དུ་བོད་ཀྱི་གནད་དོན་དྲིལ་བསྒྲགས་གསལ་སྟོན་བྱས་ཡོད། ལས་རིམ་དེ་དག་འབྲེལ་ཏེ་ཚོགས་བཅར་བ་རྣམས་ནས། ཞི་བདེའི་ལྗོན་ཤིང་། ཞེས་པ་སློབ་གྲྭ་ལྔའི་ནང་བསྣམས་ཏེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཞི་བདེའི་བཀའ་སློབ་ལམ་སྟོན་རྣམས་སློབ་སྟོན་ཞུ་གི་ཡོད།
སྤྱིར་ཨིན་ཡུལ་སྙིང་རྗེའི་གློག་བརྙན་ཚོགས་པ་དང་བ་རཱ་ཛིལ་ཁ་ས་སེ་ཝ་ (Casa Seva) ཞེས་པའི་ཚོགས་པ་གཉིས་ཀྱི་འབོད་སྐུལ་ལྟར། འབྲས་སྤུངས་བློ་གསལ་གླིང་གི་དགེ་འདུན་པ་ཁག་ཅིག་ནས་ཕྱི་ལོ་ ༢༠༢༤ ཟླ་བ་ ༩ ཚེས་ ༤ ནས་ ༡༧ བར་ཀོ་ལོམ་བྷི་ཡའི་རྒྱལ་ས་བྷོ་གོ་ཏར་ (Bogotá) ཆོས་ཕྱོགས་ཀྱི་བྱེད་སྒོ་ཁག་ཅིག་སྤེལ་ཡོད། སྐབས་དེར་ལྷོ་ཨ་རི་སྐུ་ཚབ་དོན་གཅོད་འཇིགས་མེད་ཚེ་རིང་ལགས་མཉམ་བཅར་གནང་བའི་ཐོག དགེ་འདུན་པ་རྣམས་ནས་དཀྱིལ་འཁོར་གཉིས་བཞེངས་པ་དང་། ཞི་བདེ་ཆེད་དུ་དམ་པའི་རོལ་དབྱངས་དང་གསུང་ཆོག་གི་མཛད་སྒོ་ཐེངས་གསུམ་བཅས་བརྒྱུད་བོད་ཀྱི་རིག་གཞུང་དང་ནང་པའི་ཉམས་ལེན་མཚོན་པར་བྱས་ཡོད། དེ་བཞིན་རྡོ་རྗེ་འཇིགས་བྱེད་ཆོས་ཚོགས། བླ་བཟོད་པ་རིན་པོ་ཆེའི་ཆོས་ཚོགས། (Biblioteca Pública Julio Mario Santo Domingo), (Universidad Externado de Colombia), (Universidad El Bosque – Biblioteca) བཅས་སུ་བོད་བརྒྱུད་ནང་བསྟན་གྱི་སྲོལ་རྒྱུན་དང་། སྒྱུ་རྩལ། མཚན་ཉིད་རིག་པའི་སྐོར་གསུང་བཤད་གནང་ཡོད།
ཆོས་ཕྱོགས་ཀྱི་བྱེད་སྒོ་འདི་དག་ནི་ལྷོ་ཨ་རིའི་སྐུ་ཚབ་དོན་ཁང་དང་། ཨ་ཊི་ལན་ཊའི་བློ་གསལ་གླིང་ཆོས་ཚོགས། བྷོ་གོ་ཏའི་རྡོ་རྗེ་འཇིགས་བྱེད་ཆོས་ཚོགས་བཅས་མཉམ་འབྲེལ་གྱིས་གོ་སྒྲིག་ཞུས་ཤིང་། དེའི་ནང་དགེ་བཤེས་བློ་བཟང་ཀུན་མཁྱེན་ལགས་དང་། ཨི་ས་བྷེ་ལ་ཁ་རོ་ (Isabela Caro) ལགས། ཁི་ལོ་ཌི་ཡ་བྷོ་ནི་ཏོ་ (Claudia Bonito) ལགས། ཌོ་རི་སི་ཧུ་ལི་ཡོ་(Doris Julio) ལགས། དང་བླངས་པ་བཅས་ཀྱིས་ཕྱག་རོགས་གནང་ཡོད་པ་བཅས།། 
