༄༅། །ཕྱི་ལོ་ ༢༠༢༤ ཟླ་བ་ ༡༠ ཚེས་ ༠༡ ཉིན་རྒྱ་ནག་མི་མང་སྤྱི་མཐུན་རྒྱལ་ཁབ་གསར་འཛུགས་ཀྱི་ཉིན་མོ་དང་བསྟུན་ཨོ་གླིང་སྐུ་ཚབ་དོན་ཁང་དང་། རྒྱ་གཞུང་འོག་སྡུག་སྦྱོང་མྱོང་བཞིན་པའི་ནིའུ་ཛི་ལེནྜ་དང་ཨོ་གླིང་མི་མང་གི་མཐུན་ཚོགས་བཅས་མཉམ་སྦྲེལ་ཚོགས་པ་བཅས་ནས་སིཌ་ནི་གྲོང་ཁྱེར་ཚོགས་ཁང་དུ་ངོ་རྒོལ་གྱི་ལས་འགུལ་ཞིག་སྤེལ་ཡོད།
དེ་ཡང་ཨོ་གླིང་སྐུ་ཚབ་དོན་གཅོད་ཀརྨ་སེང་གེ་ལགས་དང་། རྒྱ་རིགས་འབྲེལ་མཐུད་པ་ཟླ་བ་བཟང་མོ་ལགས་རྣམ་གཉིས་ཕེབས་ཏེ་མཉམ་ཞུགས་པ་རྣམས་དང་ལྷན་ཐུག་འཕྲད་དང་བཀའ་མོལ་གནང་ཡོད།
སྐབས་དེར་དཔར་རིས་འགྲེམས་སྟོན་དང་། ཞི་བའི་ངོ་རྒོལ་བཅས་སོགས་ཀྱི་སྒོ་ནས་མི་མང་རྣམས་ལ་རྒྱ་ནག་སྲིད་གཞུང་གིས་རྒྱ་ནག་མང་གཙོ་འཐབ་རྩོད་པ་དང་། ཧོང་ཀོང་མི་རིགས། བོད་མི། དེ་བཞིན་རླུང་སྒོམ་སྒྲུབ་ཉམས་ལེན་པ་རྣམས་ལ་མནར་གཅོད་གཏོང་བཞིན་པའི་སྐོར་གོ་རྟོགས་སྤེལ་ཡོད།
ལས་འགུལ་དེའི་སྣེ་ཁྲིད་པ་སློབ་དཔོན་ཕེང་ལགས་ཀྱིས་གཙོ་སྐྱོང་གནང་ཞིང་། རྒྱ་ནག་གིས་དེ་རིང་གི་ཉིན་མོ་དེ་བཞིན་རྒྱལ་ཡོངས་སྟོན་ཀའི་ཉིན་མོ་ཞེས་སུང་བརྩི་ཞུ་བཞིན་པ་ནི་ཁྲིམས་འགལ་གྱི་རང་བཞིན་ཡིན་པ་ངོ་སྤྲོད་གནང་རྗེས། ཨོ་གླིང་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཟླ་བ་བཟང་མོ་ལགས་ཀྱིས་བོད་ནང་དུ་རྒྱ་ནག་གཞུང་གིས་བོད་ཀྱི་སྐད་ཡིག་དང་། རིག་གཞུང་བཅས་རྩ་མེད་གཏོང་ཆེད་གཏན་སློབ་ཁག་གསར་འཛུགས་དང་། བོད་པའི་སློབ་གྲྭ་སྒོ་རྒྱག་བཅུག་པ་སོགས་ནན་བརྗོད་གནང་ཡོད།
དེ་ནས་རྒྱ་ནག་གི་ཕྱི་འབྲེལ་སྐུ་ཚབ་ཟུར་པ་ཆེན་ཡོང་ལིན་ལགས་ཀྱིས་རྒྱ་ནག་དམར་ཤོག་སྲིད་གཞུང་དབང་སྒྱུར་བྱས་པའི་སྐབས་ནས་བཟུང་མི་གྲངས་ལས་འདས་པའི་ཚེ་སྲོག་ཤོར་བའི་སྐོར་འགྲེལ་བརྗོད་གནང་བ་མ་ཟད། ཨོ་གླིང་སྲིད་གཞུང་ལ་འགྲོ་བ་མིའི་ཐོབ་ཐང་ལ་རྡོག་རོལ་གཏོང་མཁན་རྒྱ་ནག་གཞུང་གི་འབྲེལ་ཡོད་ལས་བྱེད་ཚོར་ཉེས་ཆད་གཅོད་པར་ (Magnitsky Act) ཞེས་པའི་ཁྲིམས་ལག་བསྟར་གནང་དགོས་པའི་འབོད་སྐུལ་ཞུས་འདུག
གཞན་ཡང་རྩ་རླུང་སྒོམ་སྒྲུབ་པའི་མགྲིན་ཚབ་པ་ཇོན་ཌེ་ལར་ལགས་ཀྱིས་རྩ་རླུང་སྒོམ་སྒྲུབ་ཉམས་ལེན་པ་ཚོའི་དབང་པོ་རྣམས་ཁྲིམས་འགལ་ཐོག་ནས་བཏོན་པའི་སྐོར་དང་། ཧོང་ཀོང་གི་ཇེ་ནི་ཆེན་ལགས་ཀྱིས་རྒྱ་ནག་རྒྱལ་ཡོངས་བདེ་འཇགས་ཁྲིམས་ལུགས་ཀྱི་འོག་ནས་འགྲོ་བ་མིའི་ཐོབ་ཐང་ལ་གཏོར་བཤིག་ཚབས་ཆེན་གཏོང་བཞིན་པའི་སྐོར་གསུང་བཤད་གནང་ཡོད།
དེ་མཚུངས་ཨ་གླིང་དང་བླངས་བོད་དོན་ཞུ་གཏུག་ལས་འགུལ་ཁང་ཡང་མཉམ་ཞུགས་གནང་བ་དང་སྦྲགས། མི་མང་རྣམས་ལ་བོད་ནང་དུ་རྒྱ་གཞུང་གིས་གཏན་འཇགས་སློབ་གྲྭ་མང་དུ་གཏོང་བཞིན་པའི་ཛ་དྲག་གནས་སྟངས་སྐོར་གོ་རྟོགས་སྤེལ་ཐུབ་པ་བྱུང་ཡོད། སྐབས་དེར་ཨོ་གླིང་དང་བླངས་བོད་དོན་ཞུ་གཏུག་ལས་འགུལ་ཁང་གི་ཚོགས་མི་བསྟན་འཛིན་མཆོག་རབ་ལགས་ནས་གསུང་བཤད་གནང་།
མཐར་ཨོ་སྟྲེ་ལི་ཡའི་སྲིད་གཞུང་གིས་འགྲོ་བ་མིའི་ཐོབ་ཐང་རྡོག་རོལ་གཏོང་མཁན་རྒྱ་ནག་གཞུང་གི་འབྲེལ་ཡོད་ཚོར་ (Magnitsky Act) ཁྲིམས་ལག་བསྟར་བྱས་ཏེ་ཉེས་ཆད་གཅོད་དགོས་པའི་སྤྱི་མོས་ཀྱི་འབོད་སྐུལ་ཞུས་ཡོད་པ་བཅས།།
