༄༅། །ཁྲིམས་ཞིབ་པ་ཟུར་པ་དང་། བཀའ་ཟུར་ཞེ་བོ་བློ་བཟང་དར་རྒྱས་མཆོག་ཕྱི་ལོ་ ༢༠༢༤ ཟླ་བ་ ༡༠ ཚེས་ ༢༣ ཉིན་ཨ་རིར་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་ཐོན་པར་དཔལ་ལྡན་བཀའ་ཤག་ནས་བློ་ཕམ་དང་སྦྲགས། དམ་པ་ཉིད་ཀྱིས་སྐུ་ཚེ་ཧྲིལ་པོ་བོད་བསྟན་སྲིད་དང་མི་རིགས་ཀྱི་ཆེད་དུ་སྲི་ཞུ་གང་ལེགས་བསྒྲུབས་པར་རྗེས་སུ་ཡི་རང་དང་རྗེས་དྲན་ཞུ་ཕྱིར་དང་། ཚེ་རབས་ཕྲེང་བར་བྱས་བསགས་སྡིག་སྒྲིབ་བྱང་ཞིང་དག་ནས་མངོན་མཐོ་ངེས་ལེགས་ཀྱི་གོ་འཕང་མགྱོགས་ནས་མྱུར་དུ་འཐོབ་པའི་སྨོན་ལམ་གསོལ་འདེབས་ཞུ་ཕྱིར། ཕྱི་ལོ་ ༢༠༢༤ ཟླ་བ་ ༡༠ ཚེས་ ༢༥ ཉིན་རྒྱབ་ཆུ་ཚོད་ ༢ ཐོག་གངས་སྐྱིད་སྲིད་སྐྱོང་ཚོགས་ཁང་དུ་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པས་དབུས་ལྷན་ཁང་ཁག་གི་དྲུང་ཆེ་ཆུང་རྣམ་པ། དེ་བཞིན་སྲི་ཞུའི་ལས་བྱེད་བཅས་ཚང་འཛོམས་ཐོག་བཀའ་དྲུང་ཆུ་སྐྱ་སྦྲ་གཉིས་ཚེ་རྒྱལ་ལགས་ཀྱིས་དམ་པ་ཁོང་གི་ལོ་རྒྱུས་སྒྲོགས་སྦྱང་གནང་རྗེས་བསྔོ་སྨོན་གསུང་འདོན་དང་། དམ་པ་ཁོང་ལ་མྱ་ངན་གུས་འདུད་དང་གདུང་སེམས་མཉམ་སྐྱེ་མཚོན་སླད་ཉིན་རྒྱབ་ཆུ་ཚོད་ ༣ ནས་དབུས་ཀྱི་ལས་ཁུངས་ཁག་ལས་མཚམས་བཞག་ཡོད།ཞེ་བོ་བློ་བཟང་དར་རྒྱས་མཆོག་ནི། ཕྱི་ལོ་ ༡༩༣༢ ལོར་གཞིས་རྩེ་རྫོང་ཤངས་རྣམ་གླིང་དུ་འཁྲུངས་ཤིང༌། དགུང་ལོ་ཆུང་དུས་གཟིམ་ཤག་དང་ལྷ་ས་ཉ་རོང་ཤར་སློབ་གྲྭ་རུ་སྔར་སྲོལ་བོད་ཡིག་སློབ་སྟངས་ཀྱིས་སྙན་སུམ་སོགས་རིག་གནས་ལ་སློབ་གཉེར་གནང༌། དགུང་ལོ་ཉི་ཤུར་ཕེབས་སྐབས་གཞུང་ཞབས་ཁོངས་འཛུལ་ཞུགས་ཀྱིས་ཕྱི་ལོ་ ༡༩༥༣ ལོར་ཤངས་རྒྱ་མཚོའི་གཞིས་སྡོད་དང་། ཕྱི་ལོ་ ༡༩༥༤ ལོར་ལྷུན་རྩེ་རྫོང་སྡོད། ཕྱི་ལོ་ ༡༩༥༦ ལོར་ལྷོ་ཁ་སྤྱི་ཁྱབ་རིམ་པའི་དོན་གཅོད་ཁང་གི་ཞིང་འབྲོག་ཚན་པའི་འགན་འཛིན་གཞོན་པ། ཕྱི་ལོ་ ༡༩༥༨ ལོར་གྱོད་ཞིབ་ལས་ཁུངས་ཀྱི་ལས་བྱ་བཅས་ཀྱི་མཛད་ཁུར་རིམ་པར་བཞེས་པ་དང་། ཕྱི་ལོ་ ༡༩༥༩ ལོར་རྒྱ་དམར་གྱིས་འཛིན་བཟུང་ཐོག་ཀན་སུའུ་ཅིའུ་ཆོན་དང་། ལྷ་ས་གྲ་བཞི་སོགས་སུ་ལོ་བཅོ་ལྔའི་རིང་བཙོན་འཇུག་བྱས། ཕྱི་ལོ་ ༡༩༧༤ ལོར་བཙོན་གྲོལ་རྗེས་ལས་མིའི་རུ་ཁག་ཟེར་བའི་གྲས་སུ་བཅུག ཕྱི་ལོ་ ༡༩༧༨ ལོར་རྒྱ་ནག་ཞན་ཡང་མི་རིགས་སློབ་གྲྭའི་དགེ་རྒན་གནང༌བ་དང་། ཕྱི་ལོ་ ༡༩༨༢ ལོར་ལས་བསྒྱུར་གྱིས་བོད་ལྗོངས་སློབ་གྲྭ་ཆེན་མོའི་དགེ་རྒན་གྱི་ཕྱག་ལས་གནང་།