༄༅། །ཕྱི་ལོ་ ༢༠༢༤ ཟླ་བ་ ༡༠ ཚེས་ ༠༢ ཉིན་རྒྱ་གར་གཙོས་པའི་འཛམ་གླིང་ཡུལ་གྲུ་མང་པོར་བདག་ཉིད་ཆེན་པོ་གཱཾདྡྷཱིའི་འཁྲུངས་སྐར་སྲུང་བརྩི་གཟབ་རྒྱས་ཞུ་གི་ཡོད་པ་ལྟར་བོད་མིའི་སྒྲིག་འཛུགས་ངོས་ནས་ཀྱང་རྒྱ་གར་གྱི་མེས་པོ་དམ་པ་གཱཾདྡྷཱི་མཆོག་ལ་མངོན་བསྟོད་གུས་བརྩི་མཚོན་ཆེད་གངས་སྐྱིད་སྲི་ཟློག་མཆོད་རྟེན་མདུན་དུ་དམ་པ་ཁོང་གི་འཁྲུངས་སྐར་སྲུང་བརྩི་ཞུས་ཡོད་པ་རེད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩:༣༠ ཐོག་བོད་མིའི་སྒྲིག་འཛུགས་ཀྱི་བསྟི་གནས་གངས་ཅན་སྐྱིད་གཤོངས་ཀྱི་སྲི་ཟློག་མཆོད་རྟེན་མདུན་དུ་དཔལ་ལྡན་སྲིད་ཚབ་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་དང་། ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག སྤྱི་ཁྱབ་རྩིས་ཞིབ་ལས་ཁང་གི་རྩིས་ཞིབ་སྤྱི་ཁྱབ་པ་ལྷག་པ་རྒྱལ་མཚན་ལགས། ལྷན་ཁང་ཁག་གི་དྲུང་ཆེ་ཆུང་གཙོས་པའི་དྲུང་ལས་ཡན་གྱི་སྲི་ཞུའི་ལས་བྱེད་རྣམ་པ། གསར་འགོད་པ་བཅས་ཚང་འཛོམས་ཐོག་མཛད་གཙོ་རྣམ་པས་བདག་ཉིད་ཆེན་པོ་གཱཾདྡྷཱིའི་སྐུ་པར་ལ་གུས་བཀུར་མེ་ཏོག་སྒྲོན་འབུལ་གནང་སྟེ་མཛད་སྒོ་དབུ་འཛུགས་ཞུས་ཡོད།
དེ་རྗེས་དཔལ་ལྡན་སྲིད་ཚབ་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས་གསར་འགོད་པར་གསུང་དོན། དེ་རིང་ནི་རྒྱ་གར་གྱི་མེས་པོ་དམ་པ་གྷན་ངྷི་མཆོག་སྐུ་འཁྲུངས་ནས་ལོ་ ༡༥༥ འཁོར་བའི་འཁྲུངས་སྐར་སྲུང་བརྩི་ཞུ་གནང་གི་ཡོད། བདག་ཉིད་ཆེན་པོ་གྷན་ངྷི་མཆོག་གི་འཁྲུངས་སྐར་འདི་བཞིན་འཛམ་གླིང་ནང་འཚེ་མེད་ཞི་བའི་ཉིན་མོ་ཞེས་སྲུང་བརྩི་ཞུ་ཡི་ཡོད། དེ་བཞིན་རྒྱ་གར་རྒྱལ་ཡོངས་སུ་བདག་ཉིད་ཆེན་པོ་གྷན་དྷི་མཆོག་གི་འཁྲུངས་སྐར་སྲུང་བརྩི་ཞུ་ཡི་ཡོད། ལྷག་པར་སློབ་གྲྭ་ཁག་གི་ནང་མེས་པོ་དམ་པ་གྷན་ངྷི་མཆོག་གི་འཁྲུངས་སྐར་སྲུང་བརྩི་ཞུ་རྒྱུ་ནི་ཧ་ཅང་གལ་ཆེན་པོ་བརྩི་གནང་གི་ཡོད། སྐབས་དེར་བདག་ཉིད་ཆེན་པོ་གྷན་ངྷི་མཆོག་གི་ལྟ་གྲུབ་འཚེ་མེད་ཞི་བ་དང་། དྲང་བདེན། བཟང་སྤྱོད། དཀའ་ངལ་ཅི་འདྲ་ཞིག་འཕྲད་ཀྱང་འཚེ་མེད་ཞི་བའི་ངང་ནས་གདོང་ལེན་བྱེད་སྟངས་ཐད་ལ་གཏམ་བཤད་ཀྱི
དེ་ནས་གངས་སྐྱིད་སྲི་བཟློག་མཆོད་རྟེན་མདུན་ཐང་དུ་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་། སྲི་ཞུ་བ་དྲུང་གཞོན་ཡན་གྱི་ལས་བྱེད་སོགས་ལ་མངར་ཟས་འདེགས་འབུལ་ཞུས་ཏེ་རྒྱ་གར་གྱི་མེས་པོ་དམ་པ་གྷན་ངྷི་མཆོག་གི་འཁྲུངས་སྐར་གྱི་མཛད་སྒོ་སྲུང་བརྩི་གཟབ་རྒྱས་ཞུས་གནང་ཡོད་བཅས།།
