༄༅། །བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་གོ་སྒྲིག་འོག་རྒྱ་གར་གྱི་གྲོང་ཁྱེར་སྦེང་ལོར་ཁུལ་གྱི་གཙུག་ལག་སློབ་གཉེར་ཁང་དང་མཐོ་སློབ་ཁག་ཅིག་ཏུ་བོད་དོན་གོ་རྟོགས་སྤེལ་མུས་ལྟར། ཕྱི་ལོ་ ༢༠༢༤ ཟླ་བ་ ༡༠ ཚེས་ ༢༡ ཉིན་ཕྱི་དྲིལ་བོད་དོན་ཞུ་གཏུག་ཚན་པའི་འགན་འཛིན་འབྲུག་བསྟན་སྐྱིད་ལགས་དང་། བོད་ཀྱི་སྲིད་བྱུས་ཉམས་ཞིབ་ཁང་གི་ཁོར་ཡུག་ཉམས་ཞིབ་པ་བདེ་ཆེན་དཔལ་མོ་ལགས་གཉིས་ནས་སེནྚ་ཇོ་སབ་གཙུག་ལག་སློབ་གཉེར་ཁང་དུ། བོད་ཀྱི་གལ་གནད་དང་། བོད་ནང་གི་འགྲོ་བ་མིའི་ཐོབ་ཐང་གི་གནས་བབ། ཅེས་པའི་བརྗོད་གཞིའི་ཐོག་གོ་རྟོགས་སྤེལ་ཡོད།
དེ་ཡང་འབྲུག་བསྟན་སྐྱིད་ལགས་ནས་རང་ཉིད་ཆུང་དུས་བོད་ནས་བཙན་བྱོལ་དུ་བྲོས་བྲོལ་དུ་ཡོང་བའི་ཉམས་མྱོང་གཞི་ལ་བཞག་ནས་སྐྱབས་བཅོལ་བོད་མི་བརྒྱ་ཕྲག་མང་པོ་རྒྱའི་བཙན་དབང་འོག་ནས་རྒྱ་གར་དུ་བཙན་བྱོལ་དུ་ཡོང་གི་ཡོད་པའི་བརྒྱུད་རིམ་ངོ་སྤྲོད་གནང་བ་དང་སྦྲགས། བོད་མིའི་སྒྲིག་འཛུགས་ཀྱི་ལས་དོན་བྱེད་ཕྱོགས་དང་། བོད་ནང་གི་འགྲོ་བ་མིའི་ཐོབ་ཐང་གི་གནས་བབ་དང་འབྲེལ་ཏེ། རྒྱ་ནག་གཞུང་གིས་བོད་ནང་མི་སེར་སྤེལ་ཡུལ་གྱི་གཏན་འཇགས་སློབ་གྲྭར་བོད་ཕྲུག་བཙན་འཇུག་བྱེད་བཞིན་པ་དང་། ༸ཀུན་གཟིགས་པཎ་ཆེན་རིན་པོ་ཆེ་གཙོས་པའི་བོད་མིའི་ཆབ་སྲིད་བཙོན་པའི་གནས་སྟངས། བོད་ཀྱི་ཆོས་དང་རིག་གནས་སློབ་སའི་བསྟི་གནས་ཁང་རྣམས་བཙན་ཤེད་ཀྱིས་སྒོ་རྒྱག་བཞིན་པའི་ཛ་དྲག་གནས་སྟངས་གསལ་བཤད་གནང་ཡོད།
བདེ་ཆེན་དཔལ་མོ་ལགས་ནས་རྒྱ་དཀར་ནག་བར་ཡར་ཀླུང་གཙང་ཆུ་དང་འབྲེལ་བའི་ཆབ་སྲིད། ཅེས་པའི་བརྗོད་གཞིའི་ཐོག་གསུང་བཤད་གནང་བའི་སྐབས་ལོ་རྒྱུས་ཐོག་ནས་བོད་དེ་རྒྱ་དཀར་ནག་བར་དུ་བར་གནས་རྒྱལ་ཁབ་ཀྱི་ངོ་བོར་གནས་ཡོད་ནའང་། རྒྱ་ནག་གིས་བོད་བཙན་བཟུང་བྱས་རྗེས་རྒྱ་གར་གྱི་ས་མཚམས་སུ་རྒྱ་ནག་གི་སྟོབས་ཤུགས་སླེབས་པ་མ་ཟད། བོད་ཀྱི་གཙང་ཆུ་རྣམས་ཆབ་སྲིད་ཀྱི་ཁེ་ཕན་ཆེད་བེད་སྤྱོད་ཀྱིས་ལྷོ་ཤར་ཨེ་ཤི་ཡའི་རྒྱལ་ཁབ་ཁག་གི་བདེ་འཇགས་ལ་དོ་ཕོག་གཏོང་བཞིན་ཡོད་སྐོར་འགྲེལ་བརྗོད་གནང་ཡོད།
དེ་བཞིན་ཕྱི་ཚེས་ ༢༢ ཉིན་ཁོང་རྣམས་ནས་ཇེན་གཙུག་ལག་སློབ་གཉེར་ཁང་དང་། ཝེཊ་མཐོ་སློབ། (V.E.T First Grade College) ཕྱི་ཚེས་ ༢༣ ཉིན་སུ་ར་ན་མཐོ་སློབ། (Surana College) བཅས་ཀྱི་དགེ་ལས་སློབ་གཉེར་བ་རྣམས་ལ་བོད་དོན་ཆབ་སྲིད་ཀྱི་དཀའ་རྙོག་དང་། བོད་ནང་གི་ཛ་དྲག་གནས་སྟངས། བོད་ཀྱི་ཁོར་ཡུག་གི་གལ་གནད་སོགས་ཀྱི་སྐོར་གསུང་བཤད་དང་ཚོགས་བཅར་བའི་དོགས་དྲི་ཁག་ལ་ལན་འདེབས་གསལ་བཤད་གནང་ཡོད།
སྤྱིར་སྦེང་ལོར་ནང་གི་བོད་དོན་གོ་རྟོགས་ལས་འགུལ་དེ་ལ་བརྟེན་ནས་བོད་ཀྱི་ཆབ་སྲིད་དང་། རིག་གཞུང་། ཁོར་ཡུག་གི་གལ་གནད་སྐོར་གོ་རྟོགས་སྤེལ་རྒྱུའི་གལ་ཆེའི་སྡིངས་ཆ་ཞིག་བསྐྲུན་ཡོད་པ་དང་། རྒྱ་གར་གྱི་ན་གཞོན་དང་སློབ་གཉེར་སྡེ་ཁག་དབར་གྲོས་མོལ་དང་གོ་རྟོགས་ཡར་རྒྱས་གཏོང་བར་ཕན་ཐོགས་བྱུང་ཡོད། རྒྱ་གར་གྱི་ན་གཞོན་འགའ་ཤས་ཀྱིས་བོད་དང་ད་ལྟའི་གནད་དོན་སྐོར་ཕྲན་བུ་ཤེས་ཀྱི་ཡོད་ནའང་། མང་པོ་ཞིག་ལ་མཚོན་ན། ལས་འགུལ་འདི་བརྒྱུད་བོད་ཀྱི་གནད་དོན་སྐོར་གོ་རྟོགས་གསལ་པོ་ཡོང་བར་ཕན་ཐོགས་ཆེན་པོ་བྱུང་ཡོད།
ཐེངས་འདིའི་བོད་དོན་གོ་རྟོགས་ལས་འགུལ་ནང་ཕྱི་དྲིལ་བོད་དོན་ཞུ་གཏུག་ཚན་པའི་ལས་བྱེད་རིན་ཆེན་ལགས་དང་། ཚེ་བརྟན་སྒྲོལ་མ་ལགས་ཀྱང་མཉམ་བཅར་ཞུས་ཡོད་པ་བཅས།། 
