༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། བོད་མི་མང་སྤྱི་འཐུས་བཀྲ་ཤིས་དོན་གྲུབ་ལགས་དང་། སྤྱི་འཐུས་རིག་འཛིན་ལྷུན་གྲུབ་ལགས་རྣམ་གཉིས་ལས་གྲུབ་པའི་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ནས་ཡུ་རོབ་རྒྱལ་ཁབ་སྦེལ་ཇམ་གྱི་རྒྱལ་ས་སྦར་སིལ་ནང་བོད་དོན་ཞུ་སྐུལ་གནང་བཞིན་ཡོད་པ་ལྟར། ཕྱི་ཟླ་ ༡༠ ཚེས་ ༢ ཉིན་སྔ་དྲོ་སྤྱི་འཐུས་རྣམ་པས་ལི་ཐུ་ནི་ཡའི་ཡུ་རོོབ་གྲོས་ཚོགས་འཐུས་མི་ལྕམ་སྐུ་ར་ས་ ཇུཀ་ནི་ཝི་ནི་ (Rasa Jukneviciene) མཆོག་དང་། སི་པན་གྱི་ཡུ་རོབ་གྲོས་ཚོགས་འཐུས་མི་ཌེ་ན་རི་བྷ་གྷི་ནར་མཆོག་གི་ལས་བྱེད་གཙོ་བོ། ཡུ་རོབ་གྲོས་ཚོགས་འཐུས་མི་སྐུ་ཞབས་པི་ཊི་རསེ་ ཨ་སེ་ཊི་རེ་ཝི་སི་ཡས་ (Petras Austrevicius) མཆོག་བཅས་རིམ་པར་མཇལ་འཕྲད་ཀྱིས་བོད་དོན་གནས་བབ་སྤྱི་དང་། ཉེ་ཆར་བོད་ནང་གི་གནས་སྟངས་ཛ་དྲག་ཇི་ཆགས་སྐོར་ངོ་སྤྲོད་ཞིབ་ཕྲ་ཞུས་འདུག་པ་དང་། དགོང་དྲོ་སྦར་སིལ་ཐེ་ཝན་གཞུང་ཚབ་ཁང་ནས་མགྲོན་འབོད་ལྟར། སྤྱི་འཐུས་རྣམ་པ་གཉིས་ཐེ་ཝན་རྒྱལ་ཁབ་ཉིན་མོ་སྲུང་རྩིའི་མཛད་སྒོར་ཕེབས་ཏེ། གཞུང་ཚབ་རོཡེ་ ལི་ (Roy Lee) མཆོག་དང་ལྷན་མཇལ་འཕྲད་ཀྱིས་འཚམས་འདྲིའི་མཛད་སྒོར་རྟེན་འབྲེལ་ཞུས་གནང་འདུག་པ་བཅས། །
