༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། བོད་མི་མང་སྤྱི་འཐུས་བཀྲ་ཤིས་དོན་གྲུབ་ལགས་དང་། སྤྱི་འཐུས་རིག་འཛིན་ལྷུན་གྲུབ་ལགས་རྣམ་གཉིས་ལས་གྲུབ་པའི་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ནས་ཡུ་རོབ་རྒྱལ་ཁབ་སྦེལ་ཇམ་གྱི་རྒྱལ་ས་སྦར་སིལ་ནང་བོད་དོན་ཞུ་སྐུལ་གནང་འགོ་འཛུགས་པ་ལྟར། ཕྱི་ཟླ་ ༩ ཚེས་ ༣༠ བོད་དོན་ཞུ་སྐུལ་ཉིན་གཉིས་པའི་ཐོག་སྤྱི་འཐུས་རྣམ་པས་སྦེལ་ཇམ་གྲོས་ཚོགས་འོག་མའི་འཐུས་མི་ལྕམ་སྐུ་ཨེལསེ་ ཝན་ ཧོབ་ (Els Van Hoof, Member of the Chamber of Representatives of Belgium) མཆོག་དང་། སྦེལ་ཇམ་གྲོས་ཚོགས་གོང་མའི་འཐུས་མི་སྐུ་ཞབས་ཀར་ ཝན་ ལོ་ཝི་ (Karl Vanlouwe, Member of the Senate of Belgium) མཆོག ཕྱི་སྲིད་ལས་ཁུངས་ཀྱི་ལས་བྱེད་སོགས་མཇལ་འཕྲད་ཀྱིས་བོད་དོན་ཞུ་སྐུལ་གནང་ཡོད་པ་རེད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠།༠༠ པའི་ཐོག་སྦར་སིལ་སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས་དང་། དོན་ཁང་གི་ཡུ་རོབ་གྲོས་ཚོགས་བོད་དོན་ཞུ་གཏུག་འབྲེལ་ཡོད་ལས་བྱེད་བསྟན་འཛིན་ཕུན་ཚོགས་ལགས་རྣམ་གཉིས་དང་ལྷན་བོད་དོན་ཞུ་སྐུལ་སྐོར་བཀའ་བསྡུར་དང་། ཉིན་གུང་ཆུ་ཚོད་ ༡༢།༠༠ ཐོག་སྦེལ་ཇམ་གྲོས་ཚོགས་འོག་མའི་འཐུས་མི་ལྕམ་སྐུ་ཨེལསེ་ ཝན་ ཧོབ་ (Els Van Hoof) མཆོག་དང་ལྷན་མཇལ་འཕྲད་ཀྱིས་བོད་དོན་གནས་བབ་སྤྱི་དང་། བྱེ་བྲག་ཏུ་ཉེ་བའི་ཆར་བོད་ནང་ལག་བསྟར་བྱེད་བཞིན་པའི་རྒྱ་དམར་གཞུང་གི་སྲིད་བྱུས་སྐོར་སྙན་གསན་དང་སྦྲགས། བོད་དོན་ཐོག་མུ་མཐུད་རྒྱབ་སྐྱོར་སྔར་ལྷག་ཡོང་བ་ཞུས་གནང་འདུག
ཕྱི་དྲོ་ཆུ་ཚོད་ ༣།༣༠ ཐོག་ཡུ་རོབ་ཕྱི་སྲིད་ལས་ཁུངས་ཀྱི་འབྲེལ་ཡོད་ལས་བྱེད་ཁག་ཅིག་དང་ལྷན་མཇལ་འཕྲད་གནང་ཞིང་། སྐབས་དེར་ཁོང་རྣམ་པས་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱིས་ཐུགས་སྣང་དགོས་པའི་ཕྱི་ལོ་ ༢༠༢༤ ཟླ་ ༩ ཚེས་ ༢༤ ཉིན་གྱི་ཡུ་རོབ་མཉམ་འབྲེལ་གྱི་བསྒྲགས་གཏམ་ནང་བོད་ནང་གི་ཛ་དྲག་གནས་སྟངས་སྐོར་དང་ཆབ་སྲིད་བཙོན་པ་འགའ་ཞིག་གི་མཚན་དཔེ་མཚོན་ཚུལ་དུ་དངོས་སུ་གསལ་བཀོད་གནང་བའི་ཡིག་ཆ་དོན་ཚན་བཞི་པའི་སྐོར་དང་། ཡུ་རོབ་མཉམ་འབྲེལ་གྱིས་བོད་དོན་ཐོག་མུ་མཐུད་ཐུགས་སྣང་དང་རྒྱབ་སྐྱོར་གནང་གི་ཡོད་པ་གསུངས་འདུག་པར། བོད་མི་མང་སྤྱི་འཐུས་རྣམ་པ་གཉིས་ནས་བསྒྲགས་གཏམ་ནང་བོད་ནང་གི་གནས་སྟངས་འབུར་བཏོན་ཞིབ་གླེང་གནང་བར་ཐུགས་རྗེ་ཆེ་ཞུས་པ་དང་སྦྲགས་མུ་མཐུད་བོད་ནང་གི་ཛ་དྲག་གནས་སྟངས་ཐོག་ཐུགས་སྣང་དང་བོད་དོན་འཐབ་རྩོད་ལ་རྒྱབ་སྐྱོར་ཡོང་བ་ཞུས་གནང་འདུག
ཕྱི་དྲོ་ཆུ་ཚོད་ ༥ པར་སྦེལ་ཇམ་གྲོས་ཚོགས་གོང་མའི་འཐུས་མི་སྐུ་ཞབས་ཀར་ ཝན་ ལོ་ཝི་ (Karl Vanlouwe) མཆོག་དང་ཁོང་གི་ཕྱག་རོགས་ལྷན་མཇལ་འཕྲད་ཀྱིས་བོད་ནང་གི་ད་ལྟའི་ཛ་དྲག་གནས་སྟངས་དང་། བོད་དོན་འཐབ་རྩོད་སྐོར་བཀའ་བསྡུར་ལྷུགས་པོ་བྱུང་འདུག་པ་དང་། དེ་ནས་ཆུ་ཚོད་ ༦།༠༠ པར་སྦར་སིལ་སྐུ་ཚབ་དོན་ཁང་ནང་གཞུང་འབྲེལ་མིན་པའི་རྒྱལ་སྤྱིའི་ཚོགས་སྡེ་ཁག་ལས་སྦར་སིལ་རྒྱལ་སྤྱིའི་བོད་དོན་ལས་འགུལ་ཁང་གི་སྲིད་བྱུས་དང་ཞུ་གཏུག་ལས་བྱེད་མེ་ལ་ནི་ (Melanie) ལགས་དང་། རླུང་རྟ་ཚོགས་པའི་ལས་འགུལ་བ་ཧན་ ཝན་ཌེ་ནཱ་བྷེ་ལེ་ (Han Vandenabeele) ལགས་རྣམ་པ་གཉིས་དང་ལྷན་གཞི་རིམ་མི་མང་ནང་བོད་དོན་གོ་རྟོགས་ཀྱི་ལས་འགུལ་སྤེལ་མུས་དང་མུ་མཐུད་ནུས་པ་ཇེ་ཆེར་ཡོང་ཐབས་བཅས་ཀྱི་སྐོར་བཀའ་བསྡུར་ལྷུགས་པོ་བྱུང་ཡོད་པ་བཅས། །
