༄༅། །ཕྱི་ལོ་ ༢༠༢༤ ཟླ་བ་ ༡༠ ཚེས་ ༢༣ ཉིན་དྷ་སྟེང་བོད་ཕྲུག་ཁྱིམ་སྡེ་དབུ་བརྙེས་ཏེ་ལོ་ངོ་ ༦༤ འཁོར་བའི་དུས་དྲན་སྲུང་བརྩི་གཟབ་རྒྱས་ཞུས་ཡོད།

དེ་ཡང་གོང་ཚེས་ཉིན་གྱི་སྔ་དྲོ་ ༨།༤༥ ཐོག་མཛད་སྒོའི་སྐུ་མགྲོན་གཙོ་བོར་༸སྐྱབས་རྗེ་བཀའ་བློན་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག་དང་། དམིགས་བསལ་སྐུ་མགྲོན་དུ་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག བོད་མིའི་སྒྲིག་འཛུགས་ཀྱི་དཔལ་ལྡན་སྲིད་ཚབ་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག དེ་བཞིན་སྐུ་མགྲོན་དུ་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག ཁྲིམས་ཞིབ་པ་གཞན་བསྟན་འཛིན་ལུང་རྟོགས་མཆོག  འོས་བསྡུ་ལས་ཁང་གི་འགན་འཛིན་བློ་བཟང་ཡེ་ཤེས་ལགས། ལས་བྱེད་འདེམས་བསྐོ་ལྷན་ཁང་གི་ཚོགས་གཙོ་ཀརྨ་ཡེ་ཤེས་ལགས། སྤྱི་ཁྱབ་རྩིས་ཞིབ་ལས་ཁང་གི་རྩིས་ཞིབ་སྤྱི་ཁྱབ་པ་ལྷག་པ་རྒྱལ་མཚན་ལགས། བོད་མི་མང་སྤྱི་འཐུས་རྒྱུན་ལས་རྣམ་པ།   བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་དྲུང་ཆེ་རྣམ་པ། དེ་བཞིན་དྷ་ས་ཁུལ་གྱི་གཞུང་དང་གཞུང་ཁོངས་མིན་པའི་ཚོགས་པ་ཁག་གི་སྐུ་ཚབ་རྣམ་པ། སྦྱིན་བདག་དང་སྐུ་མགྲོན་རྣམ་པ། བོད་ཁྱིམ་སློབ་གྲྭ་གཞན་ཁག་ནས་ཕེབས་པའི་དགེ་ལས་སློབ་ཕྲུག་རྣམ་པ། མི་མང་བཅས་ལྷན་འཛོམས་ཀྱི་ཐོག་མར་ཚང་མ་སྐུ་བཞེངས་ཐོག་བོད་རྒྱལ་ཁབ་དང་མི་རིགས་དོན་དུ་རང་སྲོག་བློས་གཏོང་གནང་མཁན་རྒྱལ་གཅེས་པ་རྣམས་ལ་རྗེས་དྲན་ཆེད་ངག་བཅད་གུས་འདུད་སྐར་མ་གཅིག་ཞུས་བསྟུན་རྔ་རོལ་དང་བཅས་འཕགས་བོད་གཉིས་ཀྱི་རྒྱལ་གླུ་བླངས།དེ་ནས་བོད་ཁྱིམ་སྤྱི་ཁྱབ་གཙོ་འཛིན་བསོད་ནམས་སྲི་གཅོད་ལགས་ཀྱིས་ཕེབས་བསུའི་གསུང་བཤད་དང་འབྲེལ་ལས་བསྡོམས་སྒྲོགས་སྦྱང་ཞུས་རྗེས་བོད་དོན་རྒྱབ་སྐྱོར་ཚོགས་པ་ཐོག་མར་དབུ་འཛུགས་གནང་མཁན་ཇར་མ་ནི་རྒྱལ་སྤྱིའི་བོད་དོན་ལས་འགུལ་ཁང་གི་སློབ་དཔོན་ཆེན་མོ་སྐུ་ཞབས་ (Dr.Andersson) ལགས་ནས་གསུང་བཤད་གནང་རྗེས་དཔལ་ལྡན་སྲིད་ཚབ་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས་གསུང་བཤད་གནང་དོན། བོད་ཕྲུག་ཁྱིམ་སྡེ་དབུ་བརྙེས་ཏེ་ལོ་ངོ་ ༦༤ འཁོར་བའི་དུས་དྲན་སྲུང་བརྩི་མཛད་སྒོ་སྲུང་བརྩི་གནང་གི་ཡོད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་ལྟར། ༸སྐུའི་གཅེན་མོ་དམ་པ་ཚེ་རིང་སྒྲོན་མ་ལགས་ཀྱི་དབུ་འཛུགས་གནང་ནས་དགེ་ལས་མང་དག་ཅིག་གིས་སྐུ་ལས་བསྐྱོན་ཡོད། སྐབས་དེར་བོད་མི་སྐྱབས་བཅོལ་བ་ཚོར་ས་མཚམས་ཁག་ཏུ་ལམ་ལས་སུ་འགྲོ་བ་སོགས་དཀའ་ངལ་ཆེན་པོ་ཞིག་འཕྲད་བཞིན་པའི་སྐབས་སུ་བོད་ཕྲུག་ཚོ་གསོ་སྐྱོང་གནང་རྒྱུའི་འགན་བཞེས་པ་རེད།ཕྲུ་གུ་སློབ་ལོ་སོན་རིམ་བཞིན་སློབ་གྲྭ་ཁག་ཏུ་བཏང་གནང་བ་རེད། ༸སྐུའི་གཅེན་མོ་ཚེ་རིང་སྒྲོལ་མ་ལགས་དགོངས་པ་རྫོགས་རྗེས་བཀའ་ཟུར་རྗེ་བཙུན་པདྨ་མཆོག་གིས་འགན་བཞེས་ཏེ་དྷ་ས་བོད་ཕྲུག་ཁྱིམ་སྡེ་འདི་ཉིད་རྒྱ་སྐྱེད་ཆེན་པོ་ཞིག་བཏང་སྟེ་བོད་ཁྱིམ་འདི་ཉིད་བོད་ཕྲུག་གི་ཤེས་ཡོན་གྱི་བསྟི་གནས་རླབས་ཆེན་ཞིག་ཆགས་ཡོད།

རྒྱ་ནག་གཞུང་གིས་བོད་མི་རིགས་ཀྱི་ངོ་བོ་དང་། རིག་གཞུང་། སྐད་ཡིག་བཅས་པ་རྩ་མེད་གཏོང་རྒྱུར་དམིགས་ཏེ། བོད་ནང་གི་བོད་ཕྲུག་རྣམས་རྒྱ་ནག་གཞུང་གིས་ཆེད་འཛུགས་བྱས་པའིི་གཏན་འཇགས་སློབ་གྲྭ་ཁག་ཏུ་བཙན་དབང་གི་སློབ་འཇུག་བྱེད་བཞིན་ཡོད་པའི་དུས་མཚམས་འདིར། བཙན་བྱོལ་བོད་ཕྲུག་རྣམས་ནས་རང་མི་རིགས་ཀྱི་རིག་གཞུང་དང་སྐད་ཡིག་མི་ཉམས་རྒྱུན་འཛིན་གྱིས་ཤེས་ཡོན་དང་བཟང་སྤྱོད་གཉིས་ལྡན་གྱི་བོད་མི་ཞིག་ཆགས་དགོས་པའི་ཐད་འབད་བརྩོན་གནང་དགོས་པ་གལ་ཆེན་པོ་ཡིན།  ལྷག་པར་ལོ་མང་ནས་བུ་ཕྲུག་ཁྱིམ་སྡེའི་ནང་དུ་སྐུ་ལས་ཚད་མེད་བསྐྱོན་མཁན་གྱི་༸སྐུའི་གཅེན་མོ་ཚེ་རིང་སྒྲོལ་མ་ལགས་དང་བཀའ་ཟུར་རྗེ་བཙུན་པདྨ་མཆོག་གཙོས་པའི་དགེ་ལས་ཡོངས་ལ་བོད་མིའི་སྒྲིག་འཛུགས་ཀྱི་ངོས་ནས་རྗེས་སུ་ཡི་རང་དང་བསྔགས་བརྗོད་ཡོད། ཅེས་སོགས་ཀྱི་གསུང་བཤད་གནང་རྗེས་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་གསུང་བཤད་གནང་བསྟུན་སྐུ་མགྲོན་གཙོ་བོ་༸སྐྱབས་རྗེ་བཀའ་བློན་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག་གིས་གསུང་བཤད་དང་བོད་ཁྱིམ་ལས་བྱེད་ཞབས་ལོ་ཉི་ཤུ་འཁོར་བའི་ལས་བྱེད་རྣམས་ལ་གཟེངས་བསྟོད་དང་། སྲིད་ཚབ་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས་ཤེས་ཡོན་གྱི་བྱ་དགའ་གནང་ཡོད།དེ་བཞིན་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་བོད་མིའི་སྒྲིག་འཛུགས་ཤེས་རིག་ལས་ཁུངས་ནས་རྡ་སྟེང་བོད་ཁྱིམ་གྱི་བུ་དང་བུ་མོའི་སློབ་མ་རྩེ་ཕུད་གཉིས་ལ་བུམ་སྐྱོན་གསུམ་བྲལ་གྱི་བྱ་དགའ་གནང་ཡོད།

མཐར་སློབ་ཕྲུག་རྣམས་ཀྱིས་གཞས་སྣ་འཁྲབ་སྟོན་དང་ལུས་རྩལ་སོགས་རྩེས་རྗེས་དྷ་སྟེང་བོད་ཁྱིམ་གྱི་ངེས་སྟོན་པ་འཛིན་ཚུལ་ཁྲིམས་རྡོ་རྗེ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་གྲོལ་ཡོད་པ་བཅས།།