༄༅། །ཕྱི་ལོ་ ༢༠༢༤ ཟླ་ ༠༩ ཚེས་ ༣༠ ཉིན་བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་ཁྱབ་ཁོངས་བོད་ཀྱི་སྲིད་བྱུས་ཉམས་ཞིབ་ཁང་དང་། སྦེང་ལོར་ཏཱ་ལའི་བླ་མ་མཐོ་རིམ་སློབ་གཉེར་ཁང་བར་མོས་མཐུན་གན་རྒྱ་བཞག་སྟེ། མ་འོངས་པར་བོད་རིག་པ་དང་འབྲེལ་བའི་མུ་མཐུད་མཉམ་རུབ་གནང་རྒྱུའི་མོས་མཐུན་བྱུང་ཡོད།
དེ་ཡང་བོད་ཀྱི་སྲིད་བྱུས་ཉམས་ཞིབ་ཁང་གི་ཚོགས་ཁང་དུ་མོས་མཐུན་གན་རྒྱའི་མཛད་སྒོ་ཚོགས་པ་དང་། སྐབས་དེར་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་གཞོན་པ་ཛམ་ལྷ་བསྟན་པ་རྒྱལ་མཚན་ལགས་ཀྱིས་ཕེབས་བསུའི་གསུང་བཤད་གནང་རྗེས་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་ཀྱིས་མཉམ་ལས་འདིའི་གལ་གནད་དང་། འབྱུང་འགྱུར་སྒྲིག་འཛུགས་གཉིས་ཀའི་ཉམས་ཞིབ་པ་རྣམས་ལ་གོ་སྐབས་བསྐྲུན་རྒྱུ་ཡིན་པའི་སྐོར་འགྲེལ་བརྗོད་གནང་། དེ་བཞིན་བོད་ཀྱི་སྲིད་བྱུས་ཉམས་ཞིབ་ཁང་དང་རྒྱ་གར་གྱི་སྒྲིག་འཛུགས་དང་རྒྱལ་སྤྱིའི་སློབ་གླིང་བཅས་དང་ལྷན་དུ་མོས་མཐུན་གན་རྒྱ་འཇོག་འཆར་ཡོད་པའི་སྐོར་གསུངས། དེ་ནས་ཏཱ་ལའི་བླ་མ་མཐོ་སློབ་ཀྱི་སློབ་སྤྱི་འབུམ་རམས་པ་བསྟན་འཛིན་པ་སངས་ལགས་ནས་མོས་མཐུན་གན་རྒྱ་དང་འབྲེལ་ཏེ་ཤེས་ཡོན་དང་། ཉམས་ཞིབ། མཉམ་ལས་ཀྱི་ལས་གཞི་ཁག་གལ་ཆེན་ཡིན་པ་ནན་བརྗོད་གནང་ཡོད།
གཉིས་མོས་ཀྱི་གན་རྒྱ་དེར་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་དང་། ཏཱ་ལའི་བླ་མ་མཐོ་སློབ་ཀྱི་སློབ་སྤྱི་འབུམ་རམས་པ་བསྟན་འཛིན་པ་སངས་ལགས་གཉིས་ཀྱི་བར་མཚན་རྟགས་བཀོད་གནང་ཡོད། དེ་བཞིན་མོས་མཐུན་གན་རྒྱ་དེའི་དམིགས་ཡུལ་ནི་ཤེས་ཡོན་བརྗེ་རེས་དང་། མཉམ་འབྲེལ་ཞིབ་འཇུག་གི་ལས་འཆར། སྦྱོང་བརྡར། མཐུན་གྲོགས་ལྟ་བུའི་མཉམ་ལས་གོང་འཕེལ་གཏོང་རྒྱུ་དང་། དགེ་རྒན་དང་སློབ་ཕྲུག་བརྗེ་རེས་ཀྱི་ལས་འཆར་བཟོ་རྒྱུ། ཤེས་ཡོན་གྱི་ཚོགས་འདུ་དང་བགྲོ་གླེང་གོ་སྒྲིག་གནང་རྒྱུ། བོད་རིག་པའི་ཞིབ་འཇུག་གི་དཔྱད་རྩོམ་སོགས་ཀྱི་ལས་གཞི་ཁག་གོང་སྤེལ་བྱེད་རྒྱུ་དེ་ཡིན།
བསྐྱར་གསོ་གནང་བའི་མོས་མཐུན་གན་རྒྱ་དེ་བཞིན་ཕྱི་ལོ་ ༢༠༢༤ ཟླ་ ༠༩ ཚེས་ ༣༠ ནས་དངོས་སུ་ལག་བསྟར་འགོ་འཛུགས་ཀྱིས་དུས་ཡུན་ལོ་ལྔ་བར་ཡིན་པ་དང་། སླད་ཕྱིན་ཕན་ཚུན་མོས་མཐུན་གཞིར་བཞག་གིས་ཕར་འགྱངས་གནང་སྲིད་པ་བཅས།།
