༄༅། །བོད་མིའི་སྒྲིག་འཛུགས་ཕྱི་དྲིལ་བོད་ཀྱི་འགྲེམས་སྟོན་ཁང་ནས་རྒྱ་གར་ནང་དུ་བོད་དང་རྒྱ་གར་གྱི་ལོ་རྒྱུས་ཀྱི་འབྲེལ་ལམ་སྐོར་གོ་རྟོགས་སྤེལ་ཆེད། རྒྱ་གར་གྱི་གྲོང་ཁྱེར་ཝཱ་རཱ་ཎ་སཱི་དང་། རྒྱ་གར་གྱི་མངའ་སྡེ་གུཇ་རཱཏ་ནང་གི་གཙུག་ལག་སློབ་གཉེར་ཁང་ཁག་ཅིག་ཏུ་འཕགས་བོད་ཀྱི་གནའ་དེང་གི་འབྲེལ་བ། ཞེས་པའི་པར་རིས་འགྲེམས་སྟོན་གནང་ཡོད།
དེ་ཡང་ཕྱི་ལོ་ ༢༠༢༤ ཟླ་བ་ ༠༩ ཚེས་ ༢༣ ནས་ ༢༥ བར་འགྲེམས་སྟོན་དང་པོ་དེ་ཝཱར་ཎ་དབུས་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་དུ་གནང་ཞིང་། སྐབས་དེར་གཙུག་ལག་སློབ་གཉེར་ཁང་གི་ཉེ་བའི་རིགས་བདག་དབང་ཕྱུག་རྡོ་རྗེ་ནེ་གི་ལགས་དང་། རིགས་དྲུང་འབུམ་རམས་པ་སུ་ནི་ཏ་ཅནྡྲ་ལགས་གཉིས་ནས་དབུ་འབྱེད་གནང་རྗེས་གཙུག་ལག་སློབ་ཁང་གི་དགེ་ལས་སློབ་གཉེར་བ་རྣམས་ནས་འགྲེམས་སྟོན་ལ་ལྟ་ཞིབ་གནང་ཡོད་པ་རེད།
ཕྱི་ཚེས་ ༢༦ ཉིན་ཝཱ་རཱ་ཎ་སཱིར་རྟེན་གཞི་བྱས་པའི་མ་ཧཱཏྨཱ་གཱནྡྷི་ཀཱ་ཤཱི་བི་དྷཱ་པཱིཋ་ནང་གི་དགེ་ལས་སློབ་གཉེར་བ་རྣམས་ལ་དེ་མཚུངས་ཀྱི་འགྲེམས་སྟོན་གནང་ཞིང་། སྐབས་དེར་སློབ་གྲྭའི་དཔལ་འབྱོར་འགན་འཛིན་དང་རིགས་དྲུང་གཞོན་པ་གཉིས་ནས་འགྲེམས་སྟོན་དབུ་འབྱེད་གནང་བ་དང་འབྲེལ། སློབ་གྲྭའི་དགེ་ལས་སློབ་གཉེར་བ་རྣམས་ནས་འགྲེམས་སྟོན་ལ་ལྟ་སྐོར་གནང་ཡོད།
དུས་མཚུངས་བོད་ཀྱི་འགྲེམས་སྟོན་ཁང་ནས་ཕྱི་ལོ་ ༢༠༢༤ ཟླ་བ་ ༠༩ ཚེས་ ༢༩ ནས་ཟླ་བ ༡༠ ཚེས་ ༠༡ བར གུཇ་རཱཏ་ནང་རྟེན་གཞི་བྱས་པའི་མ་ཧཱ་རཱ་ཇཱ་ས་ཡཱ་ཇཱི་རཱབ་གཙུག་ལག་སློབ་གཉེར་ཁང་དུ་འགྲེམས་སྟོན་དང་སྦྲགས་ཟབ་སྦྱོང་གནང་ཞིང་། ཟབ་སྦྱོང་ནང་དུ་ས་གནས་གཞོན་ནུ་ལྷན་ཚོགས་ཀྱི་ཚོགས་གཙོ་ཚུལ་ཁྲིམས་ཉི་མ་ལགས་དང་། ཚོགས་གཞོན་ཉི་མ་ཚེ་རིང་ལགས། དྲུང་ཡིག་བདེ་ཆེན་བཟང་མོ་ལགས་ཐེ་བའི་བོད་ཕྲུག་ཁག་ཅིག་མཉམ་ཞུགས་གནང་ཡོད། དེ་རྗེས་ཕྱི་ཚེས་ ༠༡ ཉིན་མ་ཧཱ་རཱ་ཇཱ་ས་ཡཱ་ཇཱི་རཱབ་གཙུག་ལག་སློབ་གཉེར་ཁང་གི་ཁོར་ཡུག་ནང་དུ་འཕགས་བོད་ཀྱི་གནའ་དེང་གི་འབྲེལ་ལམ་སྐོར་འགྲེམས་སྟོན་གནང་ཞིང་། དེར་གཙུག་ལག་སློབ་གཉེར་ཁང་གི་དགེ་ལས་སློབ་ཕྲུག་རྣམས་ནས་དོ་སྣང་ཆེན་པོ་གནང་ཡོད།
ཕྱི་ཚེས་ ༠༤ ཉིན་པ་རུལ་གཙུག་ལག་སློབ་གཉེར་ཁང་གི་ཚོགས་གཞོན་གི་རི་ཏི་ཀ་པ་ཀྲེལ་ལགས་དང་། རིགས་སྡེ་འགན་འཛིན་ར་ཇེནྡྲ་པ་རེག་ལགས། ཉེ་བའི་སློབ་དཔོན་ཆེན་མོ་ཀ་ཏེན་དེ་སའི་ལགས་ནས་པ་རུལ་གཙུག་ལག་སློབ་ཁང་ནང་དུ་འཕགས་བོད་ཀྱི་འབྲེལ་ལམ་སྐོར་གྱི་འགྲེམས་སྟོན་དབུ་འབྱེད་གནང་ཞིང་། སྐབས་དེར་གཙུག་ལག་སློབ་གཉེར་ཁང་དུ་སློབ་གཉེར་བ་སྤྱི་དང་། ལྷག་པར་སྤྱི་ཚོགས་ཚན་རིག་གི་སློབ་གཉེར་བ་རྣམས་ནས་དོ་སྣང་ཆེན་པོ་གནང་ཡོད་པ་བཅས།། 
