༄༅། །བོད་ཀྱི་ཟློས་གར་ཚོགས་པ་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་དགོངས་གཞིའི་ལམ་སྟོན་འོག་བོད་ཀྱི་ཐུན་མོང་མ་ཡིན་པའི་སྲོལ་རྒྱུན་རིག་གཞུང་རྒྱུན་འཛིན་དང་གོང་སྤེལ་གཏོང་རྒྱུར་དམིགས་ཏེ་གསར་འཛུགས་ཞུས་པའི་སྒྱུ་རྩལ་བསྟི་གནས་ཁང་ཞིག་ཡིན་པ་བཞིན། སློབ་གཉེར་ཁང་འདི་ནས་ད་བར་སྒྱུ་རྩལ་སློབ་མ་ལྔ་བརྒྱ་ལྷག་དང་ཟློས་དགེ་བརྒྱ་ཡས་མས་གསོ་སྐྱོང་ཞུས་དང་ཞུ་མུས་ཡིན།
འདི་གའི་སྒྱ་རྩལ་བ་རྣམས་ནས་རང་རང་གི་རྣམ་དཔྱོད་དང་སྒྱུ་རྩལ་གྱི་བྱང་ཚད་ལ་གཞིགས་ཏེ་བོད་ཀྱི་འཁྲབ་སྟོན་གྱི་རིག་གཞུང་སྲུང་སྐྱོབ་བྱུ་རྒྱུའི་འགན་འཁྲི་འཁུར་མུས་ཡིན་ཞིང་།སྒྱུ་རྩལ་པ་རྣམས་ནས་བོད་དོན་དྲིལ་བསྒྲགས་དང་བོད་ཀྱི་རིག་གཞུང་གོང་མཐོར་གཏོང་སླད་ཕྱི་རྒྱལ་ཡུལ་གྲུ་ཁག་ནང་འཁྲབ་སྟོན་སྐོར་སྐྱོད་ཞུ་རྒྱུའི་གོ་སྐབས་ཕུལ་དང་འབུལ་བཞིན་ཡོད། ད་བར་ཕྱི་རྒྱལ་ཡུལ་གྲུ་ཁག་བཞི་བཅུ་ལྷག་གི་ནང་བོད་ཀྱི་ཟློས་གར་ཚོགས་པའི་འཁྲབ་སྟོན་པ་རྣམས་ནས་སྐོར་བསྐྱོད་ཞུ་ཐུབ་པ་བྱུང་ཡོད།
སྒྱུ་རྩལ་བསྟི་གནས་ཁང་འདི་ནས་བོད་ཀྱི་ཡུལ་ལུང་ཁག་གི་གཞས་སྣ་དང་། བཟོ་ཞིང་འབྲོག་གསུམ་གྱི་ལས་རྩོལ་བྱེད་སྟངས་ཀྱི་ཞབས་གཞས། བོད་ཀྱི་ལྷ་མོའི་སྒྱུ་རྩལ་དང་རོལ་ཆའི་རྣམ་གྲངས་སྤྱི་ལ་ཆེད་ལས་རང་བཞིན་གྱི་སློབ་ཁྲིད་ཞུ་མུས་ཡིན་པ་ལྟར། ད་ལན་འདི་ག་བོད་ཀྱི་ཟློས་གར་ཚོགས་པར་སྒྱུ་རྩལ་སློབ་གཉེར་བ་གསར་འཇུག་ཞུ་རྒྱུའི་གསལ་བསྒྲགས་འབུལ་བཞིན་པ་ལགས་ན། བོད་ཀྱི་ཟློས་གར་སྒྱུ་རྩལ་ཐོག་དོ་དབྱིངས་དང་དོན་གཉེར་གྱི་བསམ་པ་ལྡན་པའི་རང་རིགས་ན་གཞོན་ཁྲོད་གཤམ་གསལ་གྱི་ཆ་རྐྱེན་ཚང་རིགས་ནས་འདི་གའི་སློབ་གཉེར་བ་གསར་བསྡུའི་ཁོངས་ཞུགས་བློ་མཆིས་ཚེ་ཕྱི་ལོ་ ༢༠༢༥ ཟླ་ ༡ ཚེས་ ༣༡ འགྱངས་མེད་རང་ཉིད་ཀྱི་འཚང་སྙན་དང་དགོས་མཁོའི་ཡིག་ཆ་ཁག་འདི་ག་བོད་ཀྱི་ཟློས་གར་ཚོགས་པའི་སྤྱི་ཁྱབ་ཡིག་ཚང་དུ་ཆབས་འབུལ་ཞུ་དགོས།
བོད་ཀྱི་ཟློས་གར་ཚོགས་པའི་སློབ་གཉེར་བའི་སློབ་གནས་རིམ་པ།
༡། ཟློས་གར་གཞི་རིམ་གོང་མ་ལོ་བཞི།
༢། ཟློས་གར་ཉེ་བའི་གཙུག་ལག་རབ་འབྱམས་པ་ལོ་གསུམ།
༣། ཟློས་གར་གཙུག་ལག་རབ་འབྱམས་པ་ལོ་གཉིས།
དགོས་ངེས་ཆ་རྐྱེན།
༡། བོད་ཀྱི་ཟློས་གར་སྒྱུ་རྩལ་ལ་དོ་དབྱིངས་དང་སྤྲོ་སྣང་ལྡན་པའི་སྒོ་ནས་སློབ་གཉེར་བྱ་འདུན་ཡོད་པ།
༢། དང་བླངས་དཔྱ་དངུལ་ལག་དེབ་འབུལ་བབ་གཙང་འབུལ་ཟིན་པའི་ཤོག་ངོས་དང་པོ་དང་མཐའ་མའི་ངོ་བཤུས།
༣། རྒྱ་གར་དུ་གནས་སྡོད་ཆོག་པའི་སྐྱབས་བཅོལ་ལག་འཁྱེར་(R.C)གྱི་ངོ་བཤུས་དང་། དེ་མིན་རྒྱ་གར་གྱི་(Passport)ཡིན་ན་དེའི་ངོ་བཤུས།
༤། ཕྱི་ལོ་ ༢༠༢༥ ཟླ་ ༣ ཚེས་ ༡ ཉིན་རང་ལོ་ ༢༠ ལས་མ་བརྒལ་བ་དགོས།
༥། གཟུགས་ཐང་ལས་འཕེར་ཡིན་པའི་ཚད་ལྡན་སྨན་པའི་ངོས་སྦྱོར་སྟེང་དོ་བདག་གི་འདྲ་པར་སྨན་པའི་མཚན་རྟགས་ཡོད་པ།
༦། དམའ་མཐའི་ཤེས་ཚད་འཛིན་རིམ་བརྒྱད་པ་མཐར་སོན་པ་ཞིག་དགོས།
འདེམས་རྒྱུགས་ལས་རིམ།
༡། དོ་བདག་རང་ཉིད་ནས་གླུ་གཞས་དང་རོལ་ཆ། ཞབས་བྲོ་སོགས་འཁྲབ་སྟོན་བྱས་པའི་བརྙན་ཐུང་བཅོས་སྒྲིག་རིགས་གང་ཡང་བྱས་མེད་པ་སྐར་མ་ ༢ ལས་མ་བརྒལ་བ་ཞིག་གཤམ་གསལ་ཞལ་པར་ཨང་གྲངས་བརྒྱུད་སྐད་འཕྲིན་ནང་བསྐུར་རྒྱུ།
༢། དྲྭ་ཐོག་ལས་རིམ་ནས་སྔོན་འགྲོའི་འདེམས་སྒྲུག་བྱུང་རིགས་དངོས་གཞིའི་འདེམས་རྒྱུགས་བོད་ཀྱི་ཟློས་གར་དུ་བྱ་རྒྱུ།
ཐུགས་སྣང་།
༡། ལོ་བཞིའི་རིང་ཟློས་གར་གཞི་རིམ་གོང་མའི་ནང་རྨང་གཞིའི་སྦྱོར་བརྡར་རྐང་བྲོ་གླུ་གཞས་དང་གཏམ་བརྗོད། རོལ་ཆ། ལྷ་མོ། བོད་ཡིག་དང་ཨིན་ཡིག་སོགས་ཀྱི་སྦྱོང་བརྡར་སྤྲོད་རྒྱུ་དང་། དེ་ནས་རྒྱུགས་སྤྲོད་ཐོན་རིགས་ཟློས་གར་ཉེ་བའི་གཙུག་ལག་རབ་འབྱམས་པའི་མཐོ་རིམ་སློབ་སྦྱོང་གི་གོ་སྐབས་ཕུལ་ཏེ་གླ་ཕོགས་ཞུ་ལེན་ཆོག་རྒྱུ།
༢། ཟློས་གར་གཞི་རིམ་གོང་མ་ལོ་བཞིའི་རིང་ཟས་གོས་གནས་མལ་དང་སློབ་སྦྱོང་སོགས་རིན་མེད་ངང་མཐུན་འགྱུར་ཞུ་རྒྱུ་དང་། ཚོགས་པའི་སྒྲིག་གཞི་གཞིར་བཟུང་སྦྱོང་བརྡར་གྲུབ་རྗེས་ཞབས་ལོའི་དུས་ཡུན་མ་ཚང་གོང་དགོངས་ཞུ་བྱ་དགོས་བྱུང་ཚེ། དུས་ཡུན་དེ་དག་རིང་གི་སློབ་ཡོན་འགྲོ་གྲོན་ཆ་ཚང་གཏན་འབེབས་ལྟར་ཕྱིར་སློག་དགོས་རྒྱུ།
གོང་གསལ་ལག་འཁྱེར་དང་ཡིག་ཆ་ཁག་གི་ངོ་བཤུས་སྟེང་བོད་མིའི་སྒྲིག་འཛུགས་ཀྱི་ལས་བྱེད་ཟུང་དྲུང་ཡན་ནམ་ས་གནས་འགོ་འཛིན་དང་། སློབ་གྲྭའི་སློབ་སྤྱི་བཅས་གང་རུང་ནས་ངོ་བཤུས་ཡིག་ཆར་འཁྲུལ་མེད་དག་མཆན་མཚན་རྟགས་ངེས་པར་ཞུ་དགོས་པ་བཅས་ཀྱི་གསལ་བསྒྲགས་སུ།
གློག་འཕྲིན་ཁ་བྱང་། [email protected]
འབྲེལ་གཏུགས་ཁ་པར་ཨང་། 8894996646(WhatsApp)
བོད་ཀྱི་ཟློས་གར་ཚོགས་པའི་སྤྱི་ཁྱབ་ཡིག་ཚང་ནས། ཕྱི་ལོ་ ༢༠༢༤ ཟླ་ ༡༠ ཚེས་ ༩ ལ།།
