༄༅། །ཧི་མ་ཅལ་མངའ་གཞུང་གི་ཤིང་ནགས་ལས་ཁུངས་ཀྱིས་གོ་སྒྲིག་ཞུ་བཞིན་པའི་རྩེད་རིགས་འགྲན་ཚོགས་དབུ་བཙུགས་ཞུས་ཏེ་ལོ་ངོ་ཉེ་ལྔ་འཁོར་བ་རྗེས་དྲན་སླད། ཕྱི་ལོ་ ༢༠༢༤ ཟླ་བ་ ༩ ཚེས་ ༢༩ ནས་ཕྱི་ཟླ་ ༡༠ ཚེས་ ༡ བར་ཉིན་གསུམ་རིང་དུས་སྟོན་ཞིག་གོ་སྒྲིག་ཞུས་ཡོད། དུས་སྟོན་གོ་སྒྲིག་ཚོགས་ཆུང་ནས་དུས་སྟོན་གྱི་དབུ་འབྱེད་མཛད་སྒོ་དང་མཇུག་བསྡོམས་མཛད་སྒོར་བོད་ཀྱི་ཟློས་གར་ཚོགས་པ་ནས་བོད་ཀྱི་སྲོལ་རྒྱུན་ཞབས་གཞས་འཁྲབ་སྟོན་ཡོང་བའི་མགྲོན་འབོད་བྱུང་དོན་ལྟར། སྒྱུ་རྩལ་སློབ་ཁྲིད་འགན་འཛིན་གྱི་སྣེ་ཁྲིད་འོག་སྒྱུ་རྩལ་བ་ཁག་གཅིག་ནས་བོད་ཀྱི་ཐུན་མོང་མ་ཡིན་པའི་རིག་གཞུང་གཞས་སྣ་གཟིགས་འབུལ་ཞུས་ཡོད། སྐབས་དེར་སྐུ་མགྲོན་གཙོ་བོ་ཧི་མ་ཅལ་མངའ་གཞུང་གི་ཤིང་ནགས་ལས་ཁུངས་ཀྱི་ (CPS Forests Govt of H.P) སྐུ་ཞབས་སུ་རེནྡར་སིངྒ་ཋཱཀུར་མཆོག་དང་། གཞན་ཡང་གནད་ཡོད་མི་སྣ་དང་གཟིགས་མོར་ཕེབས་པའི་ཡུལ་མིས་གཙོས་པའི་ཕྱི་ནང་གི་རྒྱ་ཆེའི་མང་ཚོགས་ནས་ཚད་མཐོའི་ཡིད་རང་བསྔགས་བརྗོད་གནང་ཡོད།

དེ་བཞིན་སྟབས་ཅིག་དོན་གཅིག་ཏུ་སྐབས་དེར་ཀང་ར་རྫོང་ཁོངས་སུ་ཡུལ་སྐོར་སྤྲོ་འཆམ་པ་བསྐོང་འགུགས་སླད་ཀང་ར་རྫོང་དཔོན་ལས་ཁུངས་ཀྱི་གོ་སྒྲིག་འོག་ཀང་ར་རྫོང་གི་དགའ་སྟོན་ (Carnival) འདུ་འཛོམས་ཆེན་མོ་བསྐོང་ཚོགས་ཞུས་ཡོད་པའི་དགའ་སྟོན་གོ་སྒྲིག་ཚོགས་ཆུང་ནས་མགྲོན་འབོད་བྱུང་དོན་ལྟར། ཕྱི་ལོ་ ༢༠༢༤ ཟླ་བ་ ༩ ཚེས་ ༢༨ ཉིན་གྱི་དབུ་འབྱེད་མཛད་སྒོ་དང་། ཕྱི་ལོ་ ༢༠༢༤ ཟླ་བ་ ༡༠ ཚེས་ ༡ ཉིན་བཅས་ཉིན་གཉིས་རིང་བོད་ཀྱི་ཟློས་གར་ཚོགས་པའི་སྒྱུ་རྩལ་བ་རྣམས་ནས་བོད་ཀྱི་རིག་གཞུང་གཞས་སྣ་ཁག་གཅིག་གཟིགས་འབུལ་ཞུས་ཡོད། སྐབས་དེར་གཟིགས་མོར་ཕེབས་པའི་གནད་ཡོད་སྐུ་མགྲོན་གྱིས་གཙོས་པའི་རྒྱ་ཆེའི་མང་ཚོགས་ནས་དགའ་བསུའི་ཐལ་སྒྲ་བསྒྲགས་ཏེ་ཐུགས་རྗེ་ཆེ་ཞུ་གནང་ཡོད།

ད་ལན་བོད་མིའི་སྒྲིག་འཛུགས་ཀྱི་བསྟི་གནས་ཆགས་ཡུལ་ཀང་ར་རྫོང་ཁོངས་སུ་གཉེར་བཞིན་པའི་དུས་སྟོན་གཉིས་འཛོམས་ཀྱི་འདུ་འཛོམས་ཁྱད་པར་ཅན་འདིའི་ནང་བོད་ཀྱི་ཟློས་གར་ཚོགས་པ་ནས་ས་གནས་ཀྱི་གནད་ཡོད་དཔོན་རིགས་དང་། མི་མང་ལ་བོད་ཀྱི་ཐུན་མོང་མ་ཡིན་པའི་རིག་གཞུང་འཁྲབ་སྟོན་གཟིགས་འབུལ་ཞུས་ཐུབ་པ་དེས་གནས་ཡུལ་མངའ་སྡེ་གཞུང་མང་གཉིས་དང་བོད་མིའི་དབར་གྱི་འབྲེལ་བ་སྔར་བས་དམ་ཟབ་གོང་སྤེལ་རྒྱུན་སྐྱོང་ཐུབ་རྒྱུར་ཕན་ཐོགས་ཆེ་ཆེ་ཞིག་བྱུང་ཡོད་པ་བཅས། །