༄༅། །ཕྱི་ལོ་ ༢༠༢༤ ཟླ་བ་ ༡༠ ཚེས་ ༢༣ རེས་གཟའ་ལྷག་པ་ཉིན་བལ་ཡུལ་རྒྱལ་འཕགས་ས་གནས་འགོ་འཛིན་དྲུང་གཞོན་ཀརྨ་བཟོད་པ་འཕྲིན་ལས་ལགས་དང་། ཚབ་གསར་དྲུང་གཞོན་བཀྲ་ཤིས་རྡོ་རྗེ་ལགས་རྣམ་གཉིས་དབར་དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༣༠ ཡོལ་ཙམ་ལ་ས་གནས་འགོ་འཛིན་གྱི་བདག་གཉེར་འོག་ཡོད་པའི་གལ་ཆེའི་ཡིག་སྣོད་ཁག་དང་། ལས་ཁུངས་ཀྱི་ཅ་དངོས་རིགས་རེ་རེ་བཞིན་རྩིས་སྤྲོད་གནང་ཡོད་པ་མ་ཟད། རྩིས་དྲུང་དང་ལས་བྱེད་རྣམས་ཀྱི་འགན་འཁུར་འོག་ཡོད་པའི་ཡིག་འཕེལ་དང་འཛིན་ཆས་དང་། དེ་བཞིན་རྩིས་པའི་བཟོས་པའི་རྩིས་ཁྲ་ཁག་དང་དངུལ་ཁང་གི་ཡིག་ཆ་ཁག་ལ་གཟིགས་ཞིབ་དང་རྩིས་ལེན་རྩིས་སྤྲོད་གནང་ཡོད།
ཉིན་རྒྱབ་འཕགས་པ་ཤིང་ཀུན་ས་གནས་སུ་ཆེད་ཕེབས་ཀྱི་ཁ་ཐོར་ས་གནས་ངོ་སྤྲོད་དང་ས་གནས་ཁག་ཅིག་ལ་གཟིགས་ཞིབ་གནང་ཡོད། ཕྱི་ཚེས་ ༢༤ ཉིན་གྱི་སྔ་དྲོ་ཚོད་ ༡༠ པའི་ཐོག་བལ་ཡུལ་རྒྱལ་ས་དང་འཕགས་ཤིང་ས་གནས་གཉིས་ཀྱི་ས་གནས་འཐུས་ཚོགས་ཀྱི་ཚོགས་གཙོ་དང་། ས་གནས་རང་བདེན་ཚོགས་ཆུང་གི་ཚོགས་གཙོ། འཕགས་ཤིང་རྣམ་རྒྱལ་འབྲིང་རིམ་སློབ་གྲྭའི་སློབ་སྤྱི། སྤྱི་མི། རྒྱ་དཔོན་རྣམ་པ། ལས་བྱེད་བཅས་ཚང་འཛོམས་ཐོག་ས་གནས་འགོ་འཛིན་གསར་རྙིང་དབར་ཞབས་སྟེགས་བརྗེ་ལེན་གནང་རྗེས་ས་གནས་འགོ་འཛིན་གསར་རྙིང་གཉིས་ནས་གསུང་བཤད་དང་། ནང་སྲིད་སྐུ་ཚབ་སྤྲོད་དཔང་ནས་རྩིས་སྤྲོད་ལེན་ཀྱི་གནས་སྟངས་གསལ་བཤད་གནང་ཡོད། མཛད་སྒོའི་མཇུག་བསྡོམས་སུ་ས་གནས་འཐུས་ཚོགས་ཀྱི་ཚོགས་གཙོ་ནས་ཐུགས་རྗེ་ཆེའི་གསུང་བཤད་གནང་གྲུབ་རྗེས་མཛད་སྒོ་གྲོལ་ཡོད་པ་བཅས། །
