༄༅། །ཕྱི་ལོ་ ༢༠༢༤ ཟླ་བ་ ༡༠ ཚེས་ ༡༨ ཉིན་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་གོ་སྒྲིག་འོག རྒྱ་གར་ལྷོ་ཕྱོགས་སྦེང་ལོར་གྲོང་ཁྱེར་དུ་རྟེན་གཞི་བྱས་པའི་ཏཱ་ལའི་བླ་མ་མཐོ་རིམ་སློབ་གཉེར་ཁང་དུ་བོད་ཀྱི་གལ་གནད་ཅེས་པའི་བརྗོད་གཞིའི་ཐོག་གསུང་བཤད་ལས་རིམ་ཞིག་གོ་སྒྲིག་ཞུས་ཡོད།
དེ་ཡང་གསུང་བཤད་ལས་རིམ་ཐོག་བོད་ཀྱི་སྲིད་བྱུས་ཉམས་ཞིབ་ཁང་གི་ཁོར་ཡུག་ཉམས་ཞིབ་པ་བདེ་ཆེན་དཔལ་མོ་ལགས་དང་། ཕྱི་དྲིལ་བོད་དོན་ཞུ་གཏུག་ཚན་པའི་འགན་འཛིན་འབྲུག་བསྟན་སྐྱིད་ལགས་གཉིས་ནས་བོད་ཀྱི་ཁོར་ཡུག་དང་ཆབ་སྲིད་ཀྱི་གལ་གནད་སྐོར་གསུང་བཤད་གནང་ཡོད། དེ་ཡང་བདེ་ཆེན་དཔལ་མོ་ལགས་ཀྱིས་བོད་ནས་ཐོན་པའི་གཙང་ཆུ་རྣམས་ནི་ཨེ་ཤི་ཡའི་མི་འབོར་འབུམ་ཕྲག་མང་པོའི་འཚོ་རྟེན་ཆགས་ཡོད་པ་དང་། བོད་ཀྱི་ཁོག་ཡུག་གཏོར་སྐྱོན་ལ་བརྟེན་ནས་གཤམ་འོག་གི་ས་ཁུལ་དུ་ཆུ་རུད་སོགས་ཀྱི་ཉེན་ཁ་ཡོང་བཞིན་ཡོད་པ་གསལ་སྟོན་གནང་ཡོད།
ཕྱི་དྲིལ་བོད་དོན་ཞུ་གཏུག་ཚན་པའི་འགན་འཛིན་འབྲུག་བསྟན་སྐྱིད་ལགས་ཀྱིས་བོད་དོན་ཆབ་སྲིད་དང་། བོད་ཀྱི་རིག་གཞུང་གི་གལ་གནད་སྐོར་གསུང་བཤད་གནང་ཞིང་། ཁོང་གིས་ད་ལྟ་རྒྱ་གཞུང་གིས་བོད་ཀྱི་ཆོས་དང་རིག་གཞུང་ངོ་བོ་དང་བཅས་པ་རྩ་མེད་གཏང་རྒྱུའི་ངན་བྱུས་འདིང་བཞིན་པའི་དུས་སྐབས་སུ་བོད་མི་རྣམས་ནས་བོད་ཀྱི་ཆོས་རིག་རྒྱུན་འཛིན་བྱ་རྒྱུར་འགན་འཕར་མ་ཁུར་དགོས་པ་དང་། བོད་མིའི་སྒྲིག་འཛུགས་ངོས་ནས་རྒྱལ་སྤྱིའི་སྡིངས་ཆའི་སྟེང་དུ་བོད་ནང་གི་གནས་སྟངས་མཚོན་པའི་བོད་དོན་བདེན་པའི་འཐབ་རྩོད་སྐོར་ཞུ་གཏུག་གནང་བཞིན་ཡོད་པ་གསལ་སྟོན་གནང་ཡོད།
གསུང་བཤད་ལས་རིམ་འདི་བརྒྱུད་བོད་རིགས་གཞོན་སྐྱེས་རྣམས་ནས་རང་འགན་རང་ཁུར་ལྡན་པའི་ཐོག་བོད་དོན་འཐབ་རྩོད་སྐོར་གོ་རྟོགས་དང་དྲིལ་བསྒྲགས་བྱ་རྒྱུར་སྐུལ་དེད་བཏང་ཡོད་པ་མ་ཟད། ཞུ་གཏུག་ཆེད་དགོས་ངེས་གནས་ཚུལ་མཁོ་སྤྲོད་གནང་རྗེས་ཚོགས་བཅར་བ་རྣམས་ཀྱི་དོགས་དྲི་ཇི་ཡོད་ལ་གསུང་བཤད་པས་འདྲི་ལན་གནང་སྟེ་གསུང་བཤད་ལས་རིམ་མཇུག་སྒྲིལ་ཡོད་པ་རེད།
མཐའ་དོན་ཏཱ་ལའི་བླ་མ་མཐོ་རིམ་སློབ་གཉེར་ཁང་གི་སློབ་སྤྱི་པ་སངས་ཚེ་རིང་ལགས་ཀྱིས་བོད་རིགས་སྤྱི་བོ་གནམ་བསྟན་ཡོངས་ལ་བོད་དོན་འཐབ་རྩོད་ཀྱི་འགན་ཁུར་ཡོད་པས། རྒན་གཞོན་ཚང་མས་རང་ནུས་གཞིར་བཟུང་བོད་ཀྱི་འཐབ་རྩོད་རྒྱུན་གནས་ཐུབ་པར་འབད་རྩོལ་གནང་དགོས་པའི་ལམ་སྟོན་གནང་། ཚོགས་འདུའི་ཐོག་ཏཱ་ལའི་བླ་མ་མཐོ་རིམ་སློབ་གཉེར་ཁང་དང་འགྲོ་ཕན་བོད་ཀྱི་སྨན་རྩིས་ཁང་གི་དགེ་ལས་སློབ་ཕྲུག་ཁྱོན་ ༢༠༠ མཉམ་ཞུགས་གནང་ཡོད་པ་བཅས།། 
