༄༅། །ཕྱི་ལོ་ ༢༠༢༤ ཟླ་བ་ ༡༠ ཚེས་ ༡༨ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་གར་བྱང་ཤར་འབྲས་ལྗོངས་མངའ་སྡེའི་ནང་ཡོད་པའི་ར་ཝང་ལ་ཀུན་ཕན་གླིང་བོད་མིའི་གཞིས་ཆགས་སུ་འཚམས་གཟིགས་དང་མང་ཚོགས་ལ་གསུང་བཤད་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཀུན་ཕན་གླིང་བོད་མིའི་གཞིས་ཆགས་སུ་ཕེབས་འབྱོར་སྐབས་ས་གནས་འགོ་འཛིན་གཙོས་པའི་ས་གནས་ཀྱི་གཞུང་དང་གཞུང་ཁོངས་མ་ཡིན་པའི་ཚོགས་སྡེ་ཁག་གི་སྐུ་ཚབ། སཾ་བྷོ་ཊ་ཉིན་སློབ་ཀྱི་དགེ་ལས་སློབ་ཕྲུག་རྣམས་ནས་ཕེབས་བསུ་དང་སྦྲགས། ཐུབ་བསྟན་དར་རྒྱས་གླིང་དགོན་པར་གནས་གཟིགས་དང་དགེ་འདུན་པ་ལྷན་མཇལ་མོལ་གནང་རྗེས་སཾ་བྷོ་ཊ་ཉིན་སློབ་ཏུ་གཟིགས་སྐོར་གནང་ཡོད། སྐབས་དེར་དཔལ་ལྡན་སྲིད་སྐྱོང་མཆོག་ནས་སློབ་གྲྭའི་དགེ་ལས་སློབ་ཕྲུག་རྣམས་ལ་གསུང་བཤད་གནང་སྐབས་སྤྱི་ཚོགས་ནང་ཤེས་ཡོན་དང་བཟང་སྤྱོད་གཉིས་ཟུང་དུ་སྦྲེལ་ཏེ་སྤྱི་ཚོགས་ཀྱི་ཞབས་ཞུ་སྒྲུབ་དགོས་པའི་ལམ་སྟོན་གནང་།
སློབ་གྲྭའི་གཟིགས་སྐོར་གྲུབ་མཚམས་དཔལ་ལྡན་སྲིད་སྐྱོང་མཆོག་གིས་སླེ་ལུང་དགོན་དང་། ས་གནས་འཕྲོད་བསྟེན་སྨན་ཁང་། ས་གནས་འཐུས་ཚོགས་ཀྱི་ཚོགས་ཁང་། ས་གནས་འགོ་འཛིན་དང་རང་བདེན་ཚོགས་ཆུང་གི་ལས་ཁུངས་སུ་གཟིགས་སྐོར་དང་། ས་གནས་ཀྱི་འཐུས་མི་དང་ལྷན་དུ་ས་གནས་སུ་དཀའ་ངལ་ཇི་ཡོད་སེལ་ཐབས་སྐོར་ཚོགས་འདུ་བསྐོང་ཚོགས་གནང་ཡོད། ཚོགས་འདུ་གྲུབ་རྗེས་ཀུན་ཕན་གླིང་བོད་མིའི་གཞིས་ཆགས་ཀྱི་རྒྱལ་ཡུམ་ཆེན་མོ་ཚོགས་ཁང་དུ་གཞིས་མི་མང་ཚོགས་ཚང་འཛོམས་ཀྱི་ཐོག་མར་ས་གནས་འགོ་འཛིན་བསྟན་འཛིན་ལེགས་བཤད་ལགས་ཀྱིས་ཕེབས་བསུ་དང་སྦྲགས་ལས་བསྡོམས་སྙན་སྒྲོན་ཞུས་ཤིང་། དེ་ནས་དཔལ་ལྡན་སྲིད་སྐྱོང་མཆོག་གིས་གཞིས་མི་མང་ཚོགས་ལ་གསུང་བཤད་གནང་།
དེ་ཡང་དཔལ་ལྡན་སྲིད་སྐྱོང་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་དག་པའི་དབུ་ཁྲིད་ལམ་སྟོན་དང་མི་རབས་རྒན་པ་རྣམས་ཀྱི་ལྷག་བསམ་ལྡན་པའི་ཞབས་ཞུ་གནང་བ་ལ་བརྟེན་ནས་བཙན་བྱོལ་ནང་དུ་སྒྲིག་འཛུགས་ལྡན་པའི་བོད་མིའི་སྤྱི་ཚོགས་ཚགས་ཚུད་སྲ་བརྟན་བཙུགས་ཐུབ་པ་བྱུང་ཡོད་ལ། ལྷག་པར་བོད་མིའི་སྒྲིག་འཛུགས་ངོས་ནས་བོད་རྒྱའི་དཀའ་རྙོག་ཞི་འགྲིག་ཡོང་ཐབས་སུ་དབུ་མའི་ལམ་གྱི་སྲིད་བྱུས་གཞིར་བཞག་ཐོག་འཚེ་བ་མེད་པའི་ལམ་ནས་བོད་དོན་འཐབ་རྩོད་གནང་གི་ཡོད་གསལ་བཤད་གནང་ཡོད།
དེ་བཞིན་ཁོང་གིས་ཇི་སྲིད་བོད་དོན་བདེན་མཐའ་མ་སེལ་བར་དུ་བཙན་བྱོལ་བོད་མི་རྣམས་ནས་བོད་མིའི་ངོ་བོ་མཚོན་པའི་སྐད་དང་རིག་གཞུང་རྒྱུན་འཛིན་བྱ་རྒྱུར་འབད་རྩོལ་ཧུར་སྐྱེད་དགོས་ཤིང་། བོད་ནང་དུ་རྒྱ་ནག་གཞུང་གི་དྲག་གནོན་འོག་བོད་རིགས་གཞོན་སྐྱེས་རྣམས་ལ་བོད་ཀྱི་ཆོས་དང་རིག་གཞུང་སྐད་ཡིག་སྦྱོང་བར་དམ་བསྒྲགས་ཆེན་པོ་བྱེད་ཀྱི་ཡོད་པ་མ་ཟད། བོད་ཀྱི་སྐད་ཡིག་སྦྱོང་སའི་སྒེར་གཉེར་སློབ་གྲྭ་ཁག་རིམ་བཞིན་བཙན་པོས་སྒོ་བརྒྱབ་སྟེ། བོད་ཕྲུག་རྣམས་མི་སེར་སྤེལ་ཡུལ་གཏན་འཇགས་སློབ་གྲྭར་བཙན་ཤེད་ཀྱི་བཅུག་གི་ཡོད་པ་གསལ་བཤད་གནང་རྗེས་ཐེངས་འདིའི་གཞུང་འབྲེལ་ཕྱོགས་ཕེབས་དེ་བཞིན་བཀའ་ཤག་སྐབས་བཅུ་དྲུག་པའི་ལས་ཡུན་ནང་གི་ཕྱོགས་ཕེབས་གཉིས་པ་ཡིན་པ་དང་། བཙན་བྱོལ་ནང་བོད་མི་རྣམས་འཛམ་གླིང་ཡུལ་གྲུ་གང་སར་འགྲམས་ཡོད་སྟབས། ས་གནས་ཚང་མར་གཟིགས་སྐོར་ཐེངས་གཉིས་གནང་རྒྱུ་དམ་བཅས་པ་བཞིན་གཞུང་འབྲེལ་ཕྱོགས་ཕེབས་གཉིས་པ་དབུ་འཛུགས་ཀྱིས་གཞུང་དང་མི་མང་བར་གྱི་འབྲེལ་ལམ་དམ་གཟབ་གཏང་རྒྱུའི་འབད་རྩོལ་གནང་གི་ཡོད་པ་གསུངས་ཡོད།
དེ་བཞིན་དཔལ་ལྡན་སྲིད་སྐྱོང་མཆོག་གིས་དེང་སྐབས་བོད་མི་མང་དག་ཅིག་ནུབ་ཕྱོགས་རྒྱལ་ཁབ་ཁག་ཏུ་གནས་སྤོ་བཞིན་ཡོད་ནའང་། ཕྱི་རྒྱལ་ཁག་ཏུ་བྱིས་པ་རྣམས་ལ་བོད་ཀྱི་ངོ་བོ་མཚོན་པའི་སྐད་དང་རིག་གཞུང་སློབ་ཁྲིད་བྱ་བར་དཀའ་ངལ་འཕྲད་ཀྱི་ཡོད་པ་མ་ཟད། བྱིས་པའི་ལྟ་སྤྱོད་ས་གནས་ཀྱི་རིག་གཞུང་གི་ཤུགས་རྐྱེན་འོག་ཤོར་དུས་ཕྱི་རྒྱལ་དུ་གནས་སྤོ་རྒྱུའི་འཆར་གཞིར་དོགས་པ་བྱེད་མཁན་ཡང་ཡོད་པ་གསུངས། དེ་དང་འབྲེལ་ཏེ་སྲིད་སྐྱོང་མཆོག་གིས་བཙན་བྱོལ་ནང་ཡོད་པའི་བོད་མི་རྣམས་ཕན་ཚུལ་ལྟ་བ་ལངས་ཕྱོགས་ཕྲན་བུ་མི་འདྲ་བ་ཡོད་མིན་ལ་མ་ལྟོས་པར། འཆམ་མཐུན་རྡོག་རྩ་ཆིག་སྒྲིལ་ཐོག་ནས་བོད་ཀྱི་རྩ་དོན་ཐོག་ཧུར་སྐྱེད་གནང་ན། ནམ་ཞིག་བོད་ཀྱི་བདེན་པའི་མཐའ་སེལ་ངེས་ཡིན་པ་གསུངས་ཡོད་པ་རེད།
དཔལ་ལྡན་སྲིད་སྐྱོང་མཆོག་ལྷན་དུ་ནང་སྲིད་དྲུང་འཕར་བཀྲ་ཤིས་བདེ་སྐྱིད་ལགས་དང་། ནང་སྲིད་འབྲེལ་ལས་དབུ་མ་འཕྲིན་ལས་ལགས། ས་གནས་འགོ་འཛིན་བསྟན་འཛིན་ལེགས་བཤད་ལགས་ལྷན་བཅར་ཞུས་ཡོད།
སྤྱིར་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་༸རྒྱལ་ཚབ་སྐུ་ཕྲེང་དང་པོ་༸དྲུང་གཽ་ཤྲཱི་དཔལ་འབྱོར་དོན་གྲུབ་སྐུ་བལྟམས་ནས་མི་ལོ་ ༦༠༠ འཁོར་བའི་དུས་ཆེན་མཛད་སྒོར་མགྲོན་འབོད་གནང་དོན་ལྟར། ཕྱི་ཚེས་ ༡༧ ཉིན་མཛད་སྒོར་ཕེབས་ཞུགས་ཀྱིས་གསུང་བཤད་གནང་ཡོད་ལ། ཕྱི་ཚེས་ ༡༨ ཉིན་སྔ་དྲོ་རྒྱ་གར་བྱང་ཤར་འབྲས་ལྗོངས་མངའ་སྡེའི་ནང་རྟེན་གཞི་བྱས་པའི་གདན་ས་དཔལ་ཆེན་ཆོས་གླིང་དུ། ༧སྐྱབས་མགོན་རྒྱལ་བའི་རྒྱལ་ཚབ་གཽ་ཤྲཱི་རིན་པོ་ཆེ་མཆོག་ལ་གདན་ས་རུམ་བཏེག་སློབ་ཟུར་ཚོགས་པས་བརྟན་བཞུགས་བསྟར་འབུལ་ཞུ་རྒྱུའི་མཛད་སྒོར་ལྷན་ཞུགས་གནང་ཡོད། ཕྱི་ཚེས་ ༡༩ ཉིན་དཔལ་ལྡན་སྲིད་སྐྱོང་མཆོག་བྷག་ཊོག་ར་གནམ་ཐང་ནས་ལྡི་ལིར་མཁའ་གྲུ་བརྒྱུད་ཕེབས་ཐོན་གནང་ཡོད་པ་བཅས།། 
