༄༅། །ཕྱི་ལོ་ ༢༠༢༤ ཟླ་བ་ ༡༠ ཚེས་ ༡༡ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ལཀ་སམ་བརྒ་རུ་ལྗང་ཁུ་ཚོགས་པ་ (Green Party of Luxemberg) དང་ལྷན་མཇལ་འཕྲད་གནང་ཡོད།

དེ་ཡང་ལཀ་སམ་བརྒ་དང་རྒྱ་ནག་བར་དཔལ་འབྱོར་གྱི་འབྲེལ་བ་ཤུགས་ཆེ་ཡོད་པ་དང་། གྲོས་ཚོགས་འཐུས་མི་ཕལ་མོ་ཆེས་དཔལ་ལྡན་སྲིད་སྐྱོང་མཆོག་དང་ཐུག་འཕྲད་གནང་བར་ཐེ་ཚོམ་བྱས་ཀྱང་། ཚོགས་པ་ལྗང་ཁུས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་མཆོག་དང་མཇལ་ཕྲད་ཀྱིས་གྲོས་མོལ་གནང་ཡོད།

ལཀ་སམ་བརྒ་གི་ཁྲིམས་ཞིབ་པ་ཟུར་པ་དང་། གྲོས་ཚོགས་འཐུས་མི་ལྕམ་སེམ་ཊེན་སེན་མཆོག་དང་། ལཀ་སམ་བརྒ་གྲོས་ཚོགས་འཐུས་མི་ (Chamber of Deputies)  སྐུ་ཞབས་ཇུ་ན་སྦར་ནཱཌ་ལགས་རྣམ་གཉིས་ཀྱིས་དཔལ་ལྡན་སྲིད་སྐྱོང་མཆོག་དང་ལྷན་ཚོགས་འདུ་བསྐོང་ཞིང་། སྐབས་དེར་དཔལ་ལྡན་སྲིད་སྐྱོང་མཆོག་གིས་ད་ལྟའི་བོད་ནང་གི་ཛ་དྲག་གནས་སྟངས་སྐོར་དང་། ལྷག་པར་རྒྱ་ནག་གཞུང་གིས་བོད་ནང་དུ་བོད་མི་རྣམས་ལ་དམ་བསྒྲགས་ཚབས་ཆེན་གཏོང་བཞིན་པ་ལ་བརྟེན་ནས་བོད་མི་རྣམས་ནས་ངོ་རྒོལ་མཚོན་ཆེད་རང་ལུས་མེར་སྲེག་བཏང་བ་སོགས་ཀྱི་སྐོར་འགྲེལ་བརྗོད་གནང་ཡོད། ཁོང་གིས་བོད་དེ་རྒྱ་ནག་གིས་བརྗོད་པ་བཞིན་སྤྱི་ཚོགས་རིང་ལུགས་ཀྱིས་ལྷ་ཡུལ་ཞིག་མིན་ཞེས་གསུངས།

དེ་རྗེས་དཔལ་ལྡན་སྲིད་སྐྱོང་མཆོག་ལ་ལཀ་སམ་བརྒ་གི་གསར་འགྱུར་ལས་ཁང་ (Luxemberg Times)  གི་རྩོམ་སྒྲིག་པ་ཀོར་ཌུ་ལ་ལགས་དང་། Tageblatt ཞེས་པའི་གསར་ཁང་གི་གསར་འགོད་པ་ཇུ་ལི་ཡན་ཌོར་ལགས་གཉིས་ཀྱིས་བཅར་འདྲི་ཞུས་པར་དང་ལེན་གནང་ཡོད།

ཕྱི་དྲོར་དཔལ་ལྡན་སྲིད་སྐྱོང་མཆོག་ལ་ (Les Amis du Tibet) ཀྱིས་དགོང་མོའི་གསོལ་ཚིགས་འདེགས་འབུལ་ཞུས་པ་མ་ཟད། ལྷན་ཚོགས་དེའི་ཚོགས་མི་རྣམས་ཀྱིས་དཔལ་ལྡན་སྲིད་སྐྱོང་མཆོག་ས་གནས་སུ་ཕེབས་པར་ཐུགས་རྗེ་ལེགས་འབུལ་དང་། ཁོང་རྣམས་ནས་བོད་དོན་ཐོག་མུ་མཐུད་ནས་རྒྱབ་སྐྱོར་གནང་རྒྱུའི་ཞལ་བཞེས་གནང་ཡོད་པ་བཅས།།