༄༅། །ཕྱི་ལོ་ ༢༠༢༤ ཟླ་བ་ ༡༠ ཚེས་ ༠༢ ཉིན་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་མ་སུ་རི་བོད་ཁྱིམ་སློབ་གྲྭ་དང་། མ་སུ་རི་སཾ་བྷོ་ཊ་གཏན་ཉིན་སློབ་གྲྭ་གཉིས་སུ་འཚམས་གཟིགས་དང་སློབ་ཁག་གཉིས་ཀྱི་དགེ་ལས་སློབ་ཕྲུག་རྣམས་ལ་གསུང་བཤད་གནང་ཡོད། དེ་ཡང་གོང་ཚེས་ཉིན་གྱི་སྔ་དྲོ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་སྡེ་ར་ལྡུན་ནས་མ་སུ་རིར་ཕེབས་ཐོན་གྱིས་སྔ་དྲོ་ཆུ་ཚོད་བཅུ་པ་ཙམ་ལ་མ་སུ་རི་བོད་ཁྱིམ་སློབ་གྲྭར་ཕེབས་འབྱོར་སྐབས་མ་སུ་རི་བོད་ཁྱིམ་སློབ་གྲྭའི་སྤྱི་ཁྱབ་དྲུང་ཆེ་བསྟན་འཛིན་ཕྱོགས་གླང་ལགས་དང་། མ་སུ་རི་སཾ་བྷོ་ཊ་གཏན་སློབ་ཀྱི་སློབ་སྤྱི་བཟང་པོ་རིག་འཛིན་ལགས་གཙོས་པའི་སློབ་གྲྭ་གཉིས་ཀྱི་དགེ་ལས་སློབ་ཕྲུག་ནས་རྔ་གླིང་རོལ་ཆ་དང་བཅས་ཕེབས་བསུ་གཟབ་རྒྱས་ཞུས་ཡོད།
དེ་རྗེས་མ་སུ་རི་བོད་ཁྱིམ་སློབ་གྲྭའི་ཚེ་རིང་སྒྲོལ་མ་ཚོགས་ཁང་དུ་བོད་སློབ་གཉིས་ཀྱི་དགེ་ལས་དང་འཛིན་རིམ་དགུ་པ་ཡན་གྱི་བོད་རིགས་སློབ་ཕྲུག་ཚང་འཛོམས་ཀྱི་ཐོག་མར་མ་སུ་རི་བོད་ཁྱིམ་སློབ་གྲྭའི་སྤྱི་ཁྱབ་དྲུང་ཆེ་ནས་ཕེབས་བསུའི་གསུང་བཤད་དང་འབྲེལ། སློབ་གྲྭའི་ལས་བསྡོམས་སྙན་སྒྲོན་དང་། དེ་ནས་མ་སུ་རི་སཾ་བྷོ་ཊ་གཏན་ཉིན་སློབ་གྲྭའི་སློབ་སྤྱི་བཟང་པོ་རིག་འཛིན་ལགས་ནས་སློབ་གྲྭའི་ལས་བསྡོམས་སྙན་སྒྲོན་ཞུས་གྲུབ་བསྟུན། དཔལ་ལྡན་སྲིད་སྐྱོང་མཆོག་གིས་དགེ་ལས་སློབ་ཕྲུག་རྣམས་ལ་གསུང་བཤད་གནང་ཡོད། དེ་ཡང་དཔལ་ལྡན་སྲིད་སྐྱོང་མཆོག་གིས་མི་རབས་གསར་པ་གསོ་སྐྱོང་བྱེད་མཁན་དགེ་རྒན་རྣམས་ཡིན་དུས་མཐུན་རྐྱེན་བཟང་ངན་ལ་མ་ལྟོས་པར་མི་ཚེ་ཧྲིལ་པོའམ་ལོ་མང་རིང་དགེ་རྒན་གྱི་ཞབས་ཞུ་སྒྲུབ་པར་ཐུགས་རྗེ་ལེགས་འབུལ་ཞུས་པ་དང་སྦྲགས། བོད་ཀྱི་ཁ་དཔེར་རེ་བ་བཟང་ས་ནས་བརྒྱབ། གྲ་སྒྲིག་སྡུག་ས་ནས་བྱེད་ཅེས་པའི་དཔེ་ལྟར། རེ་བ་བཟང་ས་བོད་ཀྱི་གནད་དོན་སེལ་བ་ཐུབ་རྒྱུ་དེ་ཡིན་ནའང་། དེའི་ཆེད་དུ་གྲ་སྡུག་ས་ནས་བྱེད་དགོས་པས་བོད་མི་རྣམས་བཙན་བྱོལ་དུ་གྱར་རྗེས་མི་རབས་རྒན་པ་རྣམས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དཀྱེལ་ཆེའི་དབུ་ཁྲིད་ལམ་སྟོན་འོག་ཤར་སྐྱོད་ཀྱིས་བོད་ཀྱི་རང་དབང་འཐབ་རྩོད་ཆེད་སྐུ་ལས་སྐྱོན་ཡོད་ཅིང། ད་ལམ་མི་རབས་རྒན་པ་རྣམས་རིམ་བཞིན་མེད་པར་འགྱུར་བཞིན་ཡོད་སྟབས། འབྱུང་འགྱུར་བོད་རིགས་གཞོན་སྐྱེས་རྣམས་ནས་བོད་ཀྱི་རང་དབང་འཐབ་རྩོད་རྒྱུན་སྐྱོང་དགོས་པ་དང་། དེའི་ཆེད་ད་ལྟ་ནས་སེམས་ནང་གྲ་སྒྲིག་དང་སོ་སོའི་ལས་འགན་ངོ་འཕྲོད་དགོས་སྐོར་ལམ་སྟོན་གནང་།
དེ་བཞིན་ཁོང་གིས་བོད་ཕྲུག་རྣམས་ལ་རང་ཉིད་བོད་པ་ཡིན་པའི་སྤོབས་པ་དང་ལ་རྒྱ་དགོས་ཤིང་། དེའི་ཆེད་དུ་བོད་ཀྱི་ལོ་རྒྱུས་དང་། བོད་ཀྱི་གནད་དོན་ཤེས་རྟོགས་དགོས་རྒྱུ་གལ་ཆེན་པོ་ཡིན་པ་གསུངས་པའི་ཁར། བོད་ཀྱི་འདས་པའི་ལོ་རྒྱུས་ཀྱི་འཕེལ་རིམ་དང་། བོད་ཀྱི་སྐད་ཡིག་གི་རིན་ཐང་དང་གལ་གནད། བོད་དང་རྒྱ་ནག་དཀའ་རྙོག་དང་ལོ་རྒྱུས་ཀྱི་འཕེལ་རིམ་ངོ་སྤྲོད་གནང་བ་མ་ཟད། གཞོན་སྐྱེས་རྣམས་ནས་ལོ་རྒྱུས་ལ་དོ་སྣང་དང་སློབ་སྦྱོང་བྱེད་དགོས་པ་གསུངས།
དེ་དང་འབྲེལ་ཏེ་ཁོང་གིས་བཀའ་ཤག་ངོས་ནས་དབུ་མའི་ལམ་ལ་གདེང་འཇོག་ཡོང་སླད་ལོ་རྒྱུས་ཐོག་བོད་དེ་རང་བཙན་རྒྱལ་ཁབ་ཅིག་ཡིན་པའི་གནས་བབ་ལ་ངོས་འཛིན་ཐོབ་ཐབས་འབད་རྩོལ་ཞུ་གི་ཡོད་པ་དང་། ཐབས་བྱུས་དེའི་ཆེད་དུ་ཨ་རིའི་གྲོས་ཚོགས་སུ་ཉན་ཞིབ་དང་ཞུ་གཏུག་རིམ་པ་གནང་རྗེས་བོད་རྒྱའི་རྩོད་རྙོག་སེལ་ཐབས་ཁྲིམས་འཆར་ཞིག་གྲོས་ཚོགས་གོང་འོག་བརྒྱུད། ཉེ་ལམ་ཨ་རིའི་སྲིད་འཛིན་ནས་མཚན་རྟགས་བཀོད་དེ་ཁྲིམས་ཡིག་ཏུ་གཏན་འབེབས་གནང་ཡོད་པ་གསུངས།
དེ་མ་ཟད་ཁོང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་ཡང་སྲིད་དང་འབྲེལ་ཏེ། མ་འོངས་པར་རྒྱ་ནག་གཞུང་གིས་༸གོང་ས་མཆོག་གི་ཡང་སྲིད་ངོས་འཛིན་གནང་སྒོར་ཐེ་བྱུས་བྱེད་ངེས་ཡིན་སྟབས། དེ་ལ་གདོང་ལེན་ཆེད་༸གོང་ས་མཆོག་གི་སྐུའི་ཡང་སྲིད་ངོས་འཛིན་གནང་རྒྱུའི་སྐུ་དབང་མགོན་པོ་མཆོག་ཁོ་ནར་ཡོད་པར་ངོས་འཛིན་ཆེད་བོད་མི་རྣམས་ནས་གྲོས་ཆོད་གཏན་འབེབས་དང་། དེ་མ་ཟད་ཧི་མ་ལ་ཡའི་བོད་རིགས་དང་བོད་བརྒྱུད་ནང་བསྟན་གྱི་རྗེས་འབྲང་བ། རྒྱལ་སྤྱིའི་སྤྱི་ཚོགས་ནས་དེ་དོན་གྲ་སྒྲིག་དང་གྲོས་ཆོད་སོགས་གཏན་འབེབས་འོང་རྒྱུར་འབད་རྩོལ་གནང་གལ་ཆེ་བའི་སྐོར་གྲོས་བཏོན་བ་མ་ཟད། དེ་ལྟ་བུའི་གྲོས་ཆོད་རྣམས་ཆོས་རིག་ལས་ཁུངས་ནས་ཕྱོགས་བསྒྲིགས་ཀྱིས་མ་འོངས་པར་ཐབས་བྱུས་ལྡན་པའི་ཐོག་ནས་རྒྱ་ནག་གཞུང་ལ་སྐུའི་ཡང་སྲིད་དང་འབྲེལ་བའི་གནད་དོན་ཐོག་ཐབས་བྱུས་ལྡན་པའི་ཐོག་ནས་གདོང་ལེན་གནང་ཐུབ་ཚུལ་གསུངས།
དེ་མཚུངས་ཁོང་གིས་གློག་སྟོན་བརྙན་རིས་ (Power Point) བརྒྱུད་བོད་མཐོ་སྒང་གི་ས་བབ་ཆགས་ཚུལ་དང་། བོད་དེ་འཛམ་བུ་གླིང་དང་ཨེ་ཤི་ཡའི་ཁོར་ཡུག་དང་ས་ཁམས་ཆབ་སྲིད་ལ་གལ་གནད་ཆེ་ཚུལ། བོད་ཀྱི་ཆོས་དང་རིག་གཞུང་གིས་འགྲོ་བ་མི་རིགས་ལ་ཕན་བདེ་སྒྲུབ་ཚུལ་སོགས་ཀྱི་སྐོར་འགྲེལ་བརྗོད་གནང་རྗེས་སློབ་གཉེར་བ་ཁག་ཅིག་གི་དོགས་དྲིར་ལན་འདེབས་གསལ་བཤད་གནང་ཡོད།
ཉིན་རྒྱབ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་མ་སུ་རི་སཾ་བྷོ་ཊ་གཏན་ཉིན་སློབ་གྲྭར་འཚམས་གཟིགས་སུ་ཕེབས་ཏེ། དེར་འདུས་དགེ་ལས་དང་རྒྱ་གར་གྱི་སློབ་ཕྲུག་གཙོ་བོར་གྱུར་བའི་སློབ་གཉེར་བ་རྣམས་ལ་ཨིན་སྐད་ཐོག་གསུང་བཤད་གནང་།
དེ་ཡང་ཐོག་མར་སློབ་སྤྱི་བཟང་པོ་རིག་འཛིན་ལགས་ཀྱིས་ཕེབས་བསུ་དང་སྦྲགས། སློབ་གྲྭའི་ལས་བསྡོམས་མདོ་ཙམ་སྙན་སྒྲོན་ཞུས་རྗེས་དཔལ་ལྡན་སྲིད་སྐྱོང་མཆོག་གིས་གསུང་བཤད་གནང་ཞིང་། སྐབས་དེར་དཔལ་ལྡན་སྲིད་སྐྱོང་མཆོག་གིས་རྒྱ་གར་གཞུང་གིས་བཀའ་དྲིན་ལ་བརྟེན་ནས་རྒྱ་གར་ནང་བོད་མིའི་སློབ་གྲྭ་ཁག་གསར་འཛུགས་ཐུབ་པ་བྱུང་ཡོད་པས། རྒྱ་གར་གཞུང་དམངས་གཉིས་ལ་ཐུགས་རྗེ་ལེགས་འབུལ་ཞུས་པ་དང་ཆབས་ཅིག བོད་མི་རྣམས་ནས་རྒྱ་གར་ནི་འཕགས་པའི་ཡུལ་དུ་ངོས་འཛིན་བྱེད་ཀྱི་ཡོད་པ་དང་། འཕགས་བོད་བར་ལོ་རྒྱུས་ཀྱི་འབྲེལ་བ་ཧ་ཅང་དམ་ཟབ་ཡོད་ཅིང་། ལྷག་པར་བོད་མི་རྣམས་ཀྱིས་ཉམས་ལེན་བྱེད་བཞིན་པའི་ནང་བསྟན་དེའང་རྒྱ་གར་ནས་བྱུང་བ་ཞིག་ཡིན་པ་མ་ཟད། ༸གོང་ས་མཆོག་གིས་མགོན་པོ་མཆོག་རྒྱ་གར་གྱི་གནའ་བོའི་ཤེས་རིག་གི་མགྲིན་ཚབ་པ་ཞིག་ཡིན་པར་གསུང་གི་ཡོད་སྐོར་འགྲེལ་བརྗོད་གནང་།
དེ་བཞིན་ཁོང་གིས་བོད་སློབ་ཁག་གི་ནང་བོད་མི་སློབ་ཕྲུག་གི་གྲངས་ཉུང་དུ་འགྲོ་གི་ཡོད་པ་དང་། བོད་སློབ་ཁག་ཅིག་ནང་རྒྱ་གར་གྱི་སློབ་ཕྲུག་གི་གྲངས་འཕར་གྱི་ཡོད་པས། བོད་མིའི་སྒྲིག་འཛུགས་ནས་རྒྱ་གར་གྱི་སློབ་ཕྲུག་རྣམས་ལ་མུ་མཐུད་ནས་ཤེས་ཡོན་མཁོ་སྤྲོད་གནང་བ་དེ་རྒྱ་གར་གཞུང་དམངས་གཉིས་ལ་ཐུགས་རྗེ་ལེགས་འབུལ་མཚོན་ཆེད་ཡིན་པ་གསུངས་པའི་ཐོག བར་ལམ་སློབ་ཕྲུག་གི་གྲངས་འབོར་ཉུང་དུ་འགྲོ་གི་ཡོད་པའི་གནས་བབ་དང་བསྟུན་ནས་སློབ་གྲྭ་ཁག་དུས་བསྟུན་ཟླ་སྒྲིལ་བྱ་དགོས་པའི་གནས་སྟངས་སུ་གྱར་ཡོད་པ་གསུངས། དེ་བཞིན་ཁོང་གིས་རྒྱ་གར་གྱི་སློབ་ཕྲུག་རྣམས་ལ་གཙོ་བོར་དམིགས་ཏེ། བོད་མཐོ་སྒང་གི་གལ་གནད་དང་། བོད་ཀྱི་ལོ་རྒྱུས་ཀྱི་འཕེལ་རིམ། འཕགས་བོད་ཀྱི་འབྲེལ་ལམ་སོགས་ཀྱི་སྐོར་གསུང་བཤད་གནང་རྗེས་སློབ་ཕྲུག་ཁག་ཅིག་གི་དོགས་དྲིར་ལན་འདེབས་གསལ་བཤད་གནང་ཡོད།
གསུང་བཤད་ལས་རིམ་གྲུབ་མཚམས་མ་སུ་རི་བོད་ཁྱིམ་སློབ་གྲྭས་བཙོང་འཆར་ཡོད་པའི་ས་ཆར་གཟིགས་ཞིབ་དང་། དེ་རྗེས་ས་གནས་བོད་མིའི་ཁྲོམ་རའི་དཀའ་ངལ་ཡོད་སྐོར་བདེ་སྡུག་ཞུས་པར་ས་ཚིགས་སུ་གཟིགས་ཞིབ་གནང་བར་ཕེབས་ཡོད་པ་བཅས།།
