༄༅། །ཕྱི་ལོ་ ༢༠༢༤ ཟླ་བ་ ༡༠ ཚེས་ ༢༦ ཉིན་ཉི་འོང་སྐུ་ཚབ་དོན་ཁང་གིས་གོ་སྒྲིག་ཞུས་པའི་ཟླ་གྲངས་གསུམ་རིང་གི་བོད་ཀྱི་སྐད་ཡིག་དང་རིག་གཞུང་འཛིན་གྲྭ་ལེགས་པར་མཇུག་སྒྲིལ་ཡོད་པ་རེད།
དེ་ཡང་བོད་ཀྱི་སྐད་ཡིག་དང་རིག་གཞུང་འཛིན་གྲྭའི་མཇུག་བསྡོམས་མཛད་སྒོའི་ཐོག་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ཟླ་གྲངས་གསུམ་རིང་གི་བོད་ཀྱི་སྐད་ཡིག་དང་རིག་གཞུང་འཛིན་གྲྭའི་དམིགས་ཡུལ་གཙོ་བོ་ནི། ཉི་འོང་མི་མང་ལ་བོད་ཀྱི་སྐད་ཡིག་དང་། ལོ་རྒྱུས། ཆོས་རིག་སྐོར་གོ་རྟོགས་སྤེལ་རྒྱུ་དང་ཆབས་ཅིག བོད་ཀྱི་ཆབ་སྲིད་ཀྱི་དཀའ་རྙོག་སྐོར་དྲིལ་བསྒྲགས་ཞུ་རྒྱུ་ཡིན་པ་གསུངས་ཡོད།
དེ་ནས་ཉི་འོང་སྐུ་ཚབ་དོན་ཁང་གི་དྲུང་ཆེ་བཀྲ་ཤིས་དབྱངས་འཛོམས་ལགས་ཀྱིས་དྲྭ་ཐོག་དང་དངོས་སུ་བཅར་མཁན་ཚོགས་བཅར་བ་རྣམས་ནས་བོད་ཀྱི་སྐད་ཡིག་དང་། རིག་གཞུང་ལ་དོ་སྣང་བྱས་ཏེ་སློབ་གཉེར་གནང་བར་ཐུགས་རྗེ་ཆེ་ཞུས་པ་དང་འབྲེལ། ཚོགས་བཅར་བ་རྣམས་ནས་ཟླ་གྲངས་གསུམ་རིང་གི་བོད་ཀྱི་སྐད་ཡིག་དང་རིག་གཞུང་འཛིན་གྲྭ་གྲུབ་འབྲས་ལྡན་པའི་ངང་མཇུག་སྒྲིལ་བར་འཚམས་འདྲི་དང་། འབྱུང་འགྱུར་མུ་མཐུད་བོད་ཀྱི་སྐད་ཡིག་དང་རིག་གཞུང་ལ་སློབ་གཉེར་གནང་ཆེད་རྒྱ་གར་རམ་ཉི་འོང་སོགས་ཀྱི་ནང་དྲྭ་ཐོག་འཛིན་གྲྭར་མཉམ་ཞུགས་གནང་གལ་ཆེ་བའི་སྐོར་གསུངས་ཡོད།
སྤྱིར་ཟླ་གྲངས་གསུམ་རིང་གི་བོད་ཀྱི་སྐད་ཡིག་དང་རིག་གཞུང་འཛིན་གྲྭའི་སྐབས་ཚོགས་བཅར་བ་རྣམས་ལ་བོད་ཟས་རྩམ་པ་དང་། དེ་ལས་པག་གཡོ་སྟངས། དེ་བཞིན་བོད་ཀྱི་སྐད་ཡིག ལོ་རྒྱུས་སོགས་ཀྱི་སྐོར་སློབ་སྟོན་གནང་ཡོད། འདི་ལོའི་འཛིན་གྲྭའི་ནང་ཉི་འོང་དང་སོག་པོའི་མི་སེར་ ༡༤ མཉམ་ཞུགས་གནང་ཞིང་། ཚོགས་བཅར་བ་རྣམས་ནས་བོད་ཀྱི་ཆོས་དང་རིག་གཞུང་སྐོར་རྒྱུས་ལོན་སློབ་གཉེར་བྱ་རྒྱུའི་གོ་སྐབས་བྱུང་བར་དགའ་ཚོར་ཆེེན་པོ་བྱུང་ཚུལ་གསུངས་ཡོད་པ་རེད། ཟླ་གྲངས་གསུམ་རིང་གི་འཛིན་གྲྭ་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱི་ལམ་སྟོན་འོག་དོན་ཁང་གི་དྲུང་ཆེ་བཀྲ་ཤིས་དབྱངས་འཛོམས་ལགས་དང་། ཚེ་ལྷ་ལགས་ཀྱིས་སློབ་ཁྲིད་གནང་ཡོད་པ་བཅས།། 
