༄༅། །ཕྱི་ལོ་ ༢༠༢༤ ཟླ་བ་ ༠༩ ཚེས་ ༡༡ ཉིན་བྱང་ཨ་རིའི་གྲོང་ཁྱེར་མི་ནི་སོ་ཊའི་ནང་གསར་འཛུགས་གནང་འཆར་ཡོད་པའི་དམིགས་བསལ་སློབ་གྲྭ་གནའ་དེང་ཤེས་ཡོན་བསྟི་གནས་ཁང་གི་འགན་འཛིན་ལྷན་ཚོགས་ནས་གསར་འགོད་གསལ་བསྒྲགས་སྤེལ་དོན་ལྟར། མི་ནི་སོ་ཊའི་ཤེས་རིག་ལས་ཁུངས་ནས་ས་གནས་བོད་མི་རྣམས་ཀྱིས་རེ་སྐུལ་ཞུས་པ་བཞིན། ས་གནས་སུ་བོད་ཀྱི་སྐད་དང་རིག་གཞུང་སློབ་སྤེལ་བྱ་ཡུལ་བོད་མིའི་སློབ་གྲྭ་ཞིག་གསར་འཛུགས་ཆོག་མཆན་གནང་འདུག
དེ་ཡང་ས་གནས་སུ་གསར་འཛུགས་གནང་འཆར་ཡོད་པའི་གནའ་དེང་ཤེས་ཡོན་བསྟི་གནས་ཁང་དེ་ནི། མི་ནི་སོ་ཊ་གནས་སྡོད་བོད་མི་རྣམས་ཀྱིས་ཕྱི་རྒྱལ་དུ་འཚར་བཞིན་པའི་བོད་ཕྲུག་རྣམས་ལ་བོད་ཀྱི་སྐད་དང་རིག་གཞུང་མི་ཉམས་རྒྱུན་འཛིན་སླད་སློབ་སྤེལ་བྱ་རྒྱུར་དམིགས་ཏེ་དབུ་འཛུགས་ཞུས་པ་ཞིག་ཡིན་པ་དང་། བོད་སློབ་དེའི་ནང་དུ་བོད་ཀྱི་སྐད་དང་རིག་གཞུང་། དེང་རབས་ཤེས་ཡོན། དེ་མ་ཟད་ཆོས་ལུགས་ལ་མ་བརྟེན་པའི་བཟང་སྤྱོད་ཀྱང་སློབ་ཁྲིད་གནང་རྒྱུ་ཡིན་འདུག
གསར་འགོད་གསལ་བསྒྲགས་ནང་། བོད་སློབ་དེ་ཉིད་ཀྱི་མཚན་བྱང་དུ། གནའ་དེང་ཤེས་ཡོན་བསྟི་གནས་ཁང་། ཞེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྩལ་གནང་ཡོད་པར་བཀའ་དྲིན་རྗེས་དྲན་ཞུས་འདུག་པ་མ་ཟད། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། བྱང་ཨ་རིའི་སྐུ་ཚབ་དོན་ཁང་ནས་ལམ་སྟོན་མཐུན་གྲོགས་དང་། དེ་བཞིན་ལས་གཞི་དེར་དངོས་ཤུགས་བརྒྱུད་གསུམ་ནས་རྒྱབ་སྐྱོར་གནང་མཁན་ཡོངས་ལ་ཐུགས་རྗེ་ཞུས་འདུག
ནུབ་ཕྱོགས་ཡུལ་གྲུ་ཁག་ཏུ་བོད་མི་རྣམས་རིམ་བཞིན་འཚོ་བའི་ཆེད་གནས་སྤོ་བྱེད་བཞིན་པའི་དུས་ཀྱི་འགྱུར་བ་དང་བསྟུན་ནས། བྱང་ཨ་རིའི་མི་ནི་སོ་ཊར་དེང་རབས་ཤེས་ཡོན་ལྷན་དུ་བོད་ཀྱི་རིག་གཞུང་སློབ་ཁྲིད་བྱ་སའི་སློབ་གྲྭ་དེ་ལྟ་བུའི་ཞིག་གསར་འཛུགས་གནང་བ་དེ་ནི། ནུབ་ཕྱོགས་རྒྱལ་ཁབ་ནང་བོད་ཀྱི་རིག་གཞུང་སློབ་སྤེལ་གནང་སའི་སློབ་གྲྭ་ཐོག་མ་ཆགས་ཀྱི་ཡོད། གསར་འགོད་གསལ་བསྒྲགས་ནང་གསལ་ལྟར་ན། ཕྱི་ལོ་ ༢༠༢༥ ལོའི་སྟོན་དུས་ནས་འཛིན་རིམ་བཞི་པ་བར་གྱི་སློབ་མ་སློབ་འཇུག་བྱ་རྒྱུ་དང་། རིམ་བཞིན་འཛིན་རིམ་བརྒྱད་པ་བར་སྤར་འཆར་ཡོད་པ་དང་། སློབ་གྲྭ་དེར་སློབ་ཡོན་ཕུལ་དགོས་ཀྱི་མེད་པ་གསལ་འདུག །
