༄༅། །ཕྱི་ལོ་ ༢༠༢༤ ཟླ་ ༩ ཚེས་ ༡༥ རེས་གཟའ་ཉི་མའི་ཉིན་སྦེལ་ཇམ་སྐུ་ཚབ་དོན་ཁང་ནས་སྦེལ་ཇམ་བོད་ཀྱི་ཆོས་རིག་འཛིན་སྐྱོང་ཁང་གི་འཇམ་དབྱངས་བློ་འཕེལ་བོད་ཀྱི་སྐད་ཡིག་དང་རིག་གཞུང་གི་སློབ་གྲྭ་དང་། སྦེལ་ཇམ་བོད་རིགས་ཚོགས་པའི་སློབ་གྲྭ་ཤེས་རབ་སྣང་བྱེད་སློབ་ཁག་གཉིས་ཀྱི་དགེ་རྒན་ལས་ཕ་མ་དང་སློབ་ཕྲུག་རྒན་པ། གཞན་ཡང་སྦེལ་ཇམ་གྱི་གཞོན་སྐྱེས་དོན་གཉེར་ཅན་ཁག་ཅིག་བཅས་ཁྱོན་བོད་མི་བརྒྱ་སྐོར་ཞིག་ལ་སྦར་སིལ་དུ་ཉིན་གཅིག་གི་རིང་གཤམ་གསལ་བརྗོད་གཞི་ཁག་གཉིས་ཀྱི་ཐོག་ལ་གཏམ་བཤད་ལས་རིམ་གོ་སྒྲིག་གནང་ཡོད།
དེ་ཡང་མཛད་རིམ་གྱི་ཐོག་མར་སྦེལ་ཇམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ནས་དགེ་སློབ་ཕ་མ་ཡོངས་ལ་འཚམས་འདྲི་དང་འབྲེལ། ཐེངས་འདིའི་གསུང་བཤད་ཀྱི་ལས་རིམ་གོ་སྒྲིག་གནང་དགོས་པའི་གལ་གནད་དང་། གསུང་བཤད་གནང་མཁན་དགེ་བཤེས་ལྷག་རྡོར་ལགས་ཀྱི་ལོ་རྒྱུས་སྙིང་བསྡུས་ངོ་སྤྲོད་གནང་།
དེ་རྗེས་རྡ་ས་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ནས་ཞོགས་པ་ཕྱག་ཚོད་ ༡༠ པ་ནས་ ༡༢ བར་ལ་ནང་ཆོས་ནང་གསལ་ཚེ་འདི་དང་ཕྱི་མའི་བདེ་སྐྱིད་སྒྲུབ་ཐབས་དང་། ཉིན་རྒྱབ་ཕྱག་ཚོད་ ༢ པ་ནས་ ༤ པ་བར་ལ་སཱིའི་ཤེས་ཡོན་ལ་རྟེན་ནས་ཚེ་འདིའི་བདེ་སྐྱིད་སྒྲུབ་སྟངས་བཅས་ཀྱི་སྐོར་ལ་གསུང་བཤད་གནང་ཡོད། མཇུག་ཏུ་དགེ་སློབ་ཁྲོད་ནས་དོགས་དྲི་ཁག་ཅིག་ཕུལ་ལན་འདེབས་གསལ་བཤད་གནང་ཐོག ཐེངས་འདིའི་གསུང་བཤད་ཀྱི་ལས་རིམ་ནང་ཚང་མས་ཐུགས་སྣང་ཆེན་པོས་ཆ་ཤས་གང་ལེགས་བཞེས་གནང་སོང་།
ཐེངས་འདིའི་ཉིན་གྲངས་གཅིག་གི་གསུང་བཤད་ལས་རིམ་སྐབས་ཚོགས་ཁང་གྲ་སྒྲིག་གིས་གཙོས་ཞུ་སྒོ་ཁག་ཚང་མ་སློབ་ཁག་གཉིས་ནས་མཐུན་འགྱུར་གནང་བར་སྦེལ་ཇམ་སྐུ་ཚབ་དོན་ཁང་ནས་ཐུགས་རྗེ་ཆེ་ཞུས་ཡོད་པ་དང་། ལས་རིམ་ནང་སྦེལ་ཇམ་སྐུ་ཚབ་དོན་གཅོད་ལྷན་དུ་དོན་ཁང་གི་དྲུང་ཆེ་འཕྲིན་ལས་དབང་འདུས་ལགས་ལྷན་བཅར་ཞུས་ཡོད་པ་བཅས།། 
