༄༅། །ཕྱི་ལོ་ ༢༠༢༤ ཟླ་བ་ ༠༩ ཚེས་ ༡༠ ཉིན་སྦེང་ལོར་གཙུག་ལག་ཁང་གི་བསླབ་པ་ཐར་སོན་གྱི་དགའ་སྟོན་མཛད་སྒོ་ཐེངས་ ༥༩ ཚོགས་ཤིང་།  སྐབས་དེར་སློབ་ཐོན་སློབ་ཕྲུག་གྲངས་ ༣༡༣༨༣ ལ་སློབ་ཐོན་གྱི་གཟེངས་རྟགས་ཕུལ་ཡོད་པ་རེད།

དེ་ཡང་སྦེང་ལོར་ཏཱ་ལའི་བླ་མ་མཐོ་སློབ་ནས་བོད་རིག་པའི་འབུམ་རམས་པ་ཐོན་མཁན་བོད་མི་བདུན་བྱུང་ཡོད་པའི་ཁྲོད་ཚེ་དབང་སྟོབས་ལགས་དང་། བློ་བཟང་སྙན་གྲགས་ལགས། བློ་བཟང་དངོས་གྲུབ་ལགས། དཀོན་མཆོག་ལགས། བསོད་ནམས་རྒྱལ་མཚན་ལགས་བཅས་ཡོད།སྦེང་ལོར་ཏཱ་ལའི་བླ་མ་མཐོ་སློབ་ནས་ཉེ་བའི་གཙུག་ལག་རབ་འབྱམས་པའི་སློབ་ཐོན་གྲངས་ ༦༡ ཡོད་པའི་ནང་ནས་སློབ་ཐོན་གྲངས་ ༢༩ ཉེ་བའི་གཙུག་ལག་རབ་འབྱམས་པ་དང་། ཚོང་ལས་འཛིན་སྐྱོང་རིག་པའི་ (BBA) སློབ་ཐོན་གྲངས་ ༡༢། ཚོང་ལས་རིག་པའི་ (B.Com) སློབ་ཐོན་གྲངས་ ༡༡། གློག་ཀླད་རིག་པ་ (BCA) ནས་སློབ་ཐོན་གྲངས་ ༩ བཅས་ལ་ཉེ་བའི་གཙུག་ལག་རབ་འབྱམས་པའི་ཕྱག་འཁྱེར་ཕུལ་ཡོད།

མཛད་སྒོའི་ཐོག་གཙུག་ལག་སློབ་གཉེར་ཁང་གི་རོགས་སྐྱོར་ལྷན་ཚོགས་ (UGC) གི་ཚོགས་གཞོན་དྰི་པག་ཀུ་མཱར་ལགས་དང་། མཐོ་རིམ་ཤེས་ཡོན་བློན་ཆེན་འབུམ་རམས་པ་སུ་དྷཱ་ཀར་ལགས་ནས་གསུང་བཤད་གནང་བ་དང་། ཉེ་བའི་རིགས་བདག་འབུམ་རམས་པ་ཇཱ་ཡ་ཀཱ་ར་ལགས་དང་། རིགས་དྲུང་ཤེག་ལཱ་ཐིབ་ལགས། སློབ་དཔོན་སི་རི་ནི་ཝས་ལགས། དེ་བཞིན་ཁེ་ལས་མཉམ་འབྲེལ་དང་སློབ་ཚོགས་ལྷན་ཚོགས་ནས་གཙོ་སྐྱོང་གནང་ཡོད། འདི་ལོར་ཏཱ་ལའི་བླ་མ་མཐོ་སློབ་ནས་འབུམ་རམས་པ་སློབ་ཐོན་གྲངས་ ༡༤༠ རྣམས་ལ་ཕྱག་འཁྱེར་ཕུལ་ཡོད།

བསླབ་པ་ཐར་སོན་གྱི་མཛད་སྒོ་དེ་བཞིན་སྦེང་ལོར་གཙུག་ལག་ཁང་དང་ཏཱ་ལའི་བླ་མ་མཐོ་སློབ་གཉིས་ཀྱི་སྤུད་ཚད་ལྡན་པའི་ཤེས་ཡོན་ཐོག་འབད་བརྩོན་གནང་བཞིན་ཡོད་པ་མཚོན་གྱི་ཡོད། སྐབས་དེར་ལྷོ་སྤྱི་འཇིགས་མེད་ཚུལ་ཁྲིམས་ལགས་དང་། ཏཱ་ལའི་བླ་མ་མཐོ་སློབ་ཀྱི་སློབ་སྤྱི་བསྟན་འཛིན་པ་སངས་ལགས་རྣམ་གཉིས་ཀྱང་ཕེབས་ཞུགས་གནང་ཡོད།

ཏཱ་ལའི་བླ་མ་མཐོ་སློབ་ནི་སྦེང་ལོར་གཙུག་ལག་ཁང་གི་ཡན་ལག་མཐོ་སློབ་ཞིག་ཡིན་པ་གང་ཞིག བོད་རིག་པའི་བསྟི་གནས་སུ་ངོས་འཛིན་ཐོབ་པའི་མཐོ་སློབ་ཞིག་ཀྱང་ཡིན། མཛད་སྒོ་དེའི་ཐོག་སློབ་མ་བསྟན་འཛིན་སྐལ་ལྡན་ལགས་ལ་ཚན་རིག་གི་ཉེ་བའི་གཙུག་ལག་རབ་འབྱམས་པའི་གསེར་གྱི་གཟེངས་རྟགས་ཕུལ་ཡོད་པ་བཅས།།