༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ ཟླ་ ༩ ཚེས་ ༡༡ ནས་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བརྒྱད་པ་འཚོགས་བཞིན་ཡོད་པ་ལྟར། དེ་རིང་ཟླ་ ༩ ཚེས་ ༡༤ ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དབུ་བཞུགས་ཐོག་གྲོས་ཚོགས་ཚོགས་དུས་བརྒྱད་པའི་ལས་ཉིན་བཞི་པ་ཚོགས་གནང་སོང་།
དེ་ཡང་སྔ་དྲོ་ཐོག་མར་ཤེས་རིག་ལས་ཁུངས་མ་ལག་དང་བཅས་པའི་ཕྱི་ལོ་ ༢༠༢༣་་་༢༤ ལོའི་ལོ་འཁོར་ལས་བསྡོམས་ཐོག་སྤྱི་ཡོངས་བགྲོ་གླེང་གནང་ཞིང་། སྐབས་དེར་སྤྱི་འཐུས་རྣམ་པས་བོད་མིའི་སློབ་གྲྭ་ཁག་གི་འདི་ལོའི་འཛིན་རིམ་བཅུ་གཉིས་ཀྱི་ཡིག་རྒྱུགས་གྲུབ་འབྲས་རྒྱ་གར་གཞུང་གི་སློབ་གྲྭ་གཞན་ཁག་ལས་འབུར་དུ་ཐོན་པར་བསྔགས་བརྗོད་དང་། ཕྱི་རྒྱལ་ལ་ཡོད་པའི་གཟའ་མཇུག་སློབ་གྲྭའི་སློབ་ཕྲུག་རྣམས་ལ་ཟབ་སྦྱོང་གི་གོ་སྐབས་གནང་ཐབས་དང་། རིན་མེད་དཔེ་དེབ་འགྲེམས་སྤེལ། ཁེ་ན་ཊར་རྟེན་གཞི་བྱས་པའི་ཀརྨ་བསོད་ནམས་དར་རྒྱས་གླིང་དུ་ཕྱི་རྒྱལ་ལ་བཞུགས་པའི་བོད་ཕྲུག་རྣམས་ལ་ཕན་རླབས་ཆེ་བའི་བོད་ཀྱི་སྐད་ཡིག་གི་ཟབ་སྦྱོང་གནང་བཞིན་པར་བསྔགས་བརྗོད། ཤེས་རབ་དགའ་ཚལ་སློབ་གླིང་ནང་སློབ་ཕྲུག་འཛུལ་ཞུགས་བྱ་རྒྱུའི་ལོ་ཚད་སྐོར།
དགོན་སྡེ་གྲྭ་ཚང་གི་སློབ་གྲྭ་ཁག་ལ་བོད་ཡིག་སློབ་དེབ་རིན་མེད་ཐོག་འགྲེམས་སྤེལ་ཡོང་ཐབས། བོད་ཡིག་དགེ་རྒན་གྱི་འོས་སྦྱོང་སྐོར། ཨ་རིའི་མི་ནི་སོ་ཊའི་མངའ་སྡེའི་ནང་གསར་འཛུགས་བྱེད་འཆར་ཡོད་པའི་བོད་པའི་དམིགས་བསལ་སློབ་གྲྭ་ (Charter School) གནའ་དེང་ཤེས་ཡོན་བསྟི་གནས་ཁང་གི་ལས་གཞིར་བསྔགས་བརྗོད། བོད་ཕྲུག་ཁྱིམ་སྡེའི་སློབ་གྲྭའི་དགེ་ལས་རྣམས་ཀྱི་གསོལ་ཕོགས་ཀྱི་གནས་སྟངས། དགེ་རྒན་རྣམ་པར་སྦྱོང་བརྡར་སྤྲོད་རྒྱུ་གལ་ཆེན་པོ་ཡིན་པ། བོད་པའི་ཤེས་ཡོན་བསྟི་གནས་ཁག་ནས་བསླབ་ཐར་སོན་པའི་སློབ་ཕྲུག་རྣམས་ལ་ལས་ཀའི་གོ་སྐབས་བསྐྲུན་ཐབས། དགོས་མཁོར་དམིགས་པའི་སློབ་ཡོན་གྱི་ལས་གཞི་སྤེལ་དགོས་གལ། ཧི་མ་ཅལ་མངའ་སྡེའི་གཞུང་གི་ཁྱབ་ཁོངས་སྨན་པའི་མཐོ་སློབ་ཁག་གི་ནང་བོད་པའི་སློབ་ཕྲུག་ཆེད་དམིགས་བསལ་ས་མིག་ཟུར་བཅད་གནང་བར་ཐུགས་རྗེ་ཆེ་ཞུས་པ། བལ་ཡུལ་ནང་གི་སློབ་གྲྭ་ཁག་ལ་གཟིགས་ཞིབ་དགོས་པ། བོད་ཀྱི་ཐ་སྙད་གཅིག་གྱུར་གྱི་གཏན་འབེབས་གནང་དགོས་པ་སོགས་ཀྱི་ཐོག་དོགས་འདྲི་དང་། དགོངས་ཚུལ་ཕུལ་བར། དཔལ་ལྡན་སྲིད་སྐྱོང་མཆོག་གིས་ལན་འདེབས་གསལ་བཤད་ཞིབ་ཕྲ་གནང་ཡོད་པ་བཅས། །
