༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ ཟླ་ ༩ ཚེས་ ༡༡ ནས་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བརྒྱད་པ་འཚོགས་བཞིན་ཡོད་པ་ལྟར། དེ་རིང་ཟླ་ ༩ ཚེས་ ༡༣ ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་དཔལ་ལྡན་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་དབུ་བཞུགས་ཐོག་གྲོས་ཚོགས་ཚོགས་དུས་བརྒྱད་པའི་ལས་ཉིན་གསུམ་པ་ཚོགས་གནང་སོང་།

དེ་ཡང་སྔ་དྲོ་ཐོག་མར་དཔལ་འབྱོར་ལས་ཁུངས་མ་ལག་དང་བཅས་པའི་ཕྱི་ལོ་ ༢༠༢༣་་་༢༤ ལོའི་ལོ་འཁོར་ལས་བསྡོམས་ཐོག་སྤྱི་ཡོངས་བགྲོ་གླེང་གནང་ཞིང་། སྐབས་དེར་སྤྱི་འཐུས་རྣམ་པས་གངས་ལྗོངས་དཔལ་འབྱོར་ཞབས་ཞུ་ཁང་གི་ད་ལྟའི་གནས་བབ་དང་། བོད་མིའི་ཁྱད་ལས་དང་བླངས་ཞབས་ཞུའི་ལས་གཞིའི་ཕན་ཐོགས་དང་། དེ་བརྒྱུད་མི་རབས་རྒན་པ་དང་བླངས་ཞབས་ཞུར་འདོད་མོས་ཡོད་མཁན་རྣམས་ལ་གོ་སྐབས་བསྐྲུན་ཐུབ་ཐབས། དང་བླངས་དཔྱ་དངུལ་ལག་དེབ་བཟོ་འགྲེམས་ཀྱི་ལས་དོན་དུས་ཐུང་ནང་སྤེལ་ཐུབ་ཐབས། དཔལ་འབྱོར་ལས་ཁུངས་ཀྱི་འབྲེལ་ཡོད་ཚན་པའི་ལས་བྱེད་ཁག་ཅིག་ཨ་རི་སོགས་ཕྱིའི་རྒྱལ་ཁབ་ཁག་ཅིག་ནང་ཕེབས་ཏེ་དང་བླངས་དཔྱ་དངུལ་ལག་དེབ་གསར་བཟོ་སོགས་ཀྱི་ལས་དོན་ཚགས་ཚུད་སྤེལ་གནང་བར་བསྔགས་བརྗོད། དྲྭ་ཐོག་དཔྱ་དངུལ་འབུལ་རྒྱུའི་ལས་གཞིའི་གནས་སྟངས། བོད་མིའི་སྒྲིག་འཛུགས་ནས་རོགས་དངུལ་ཐད་ཀར་ལེན་ཆོག་རྒྱུའི་གནས་སྟངས་སྐོར། དྲྭ་ཐོག་ནས་འཛིན་སྐྱོང་ (E-governance) དང་། གློག་འཕྲུལ་ཡིག་ཚགས་ཀྱི་ལས་གཞིའི་སྐོར། སུད་ཚོང་བ་རྣམས་ལ་བུན་གཡར་སྤར་ཐུབ་ཐབས། བརྡ་འཕྲིན་སྲིད་བྱུས་ (Digital Policy) དགོས་གལ་ཆེན་པོ་ཡིན་པ་སོགས་ཀྱི་ཐོག་དོགས་འདྲི་དང་། དགོངས་ཚུལ་ཕུལ་བར་དཔལ་ལྡན་སྲིད་སྐྱོང་དང་། དཔལ་འབྱོར་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས་དྲྭ་རྒྱ་བརྒྱུད་ནས་དཔྱ་ཁྲལ་འབུལ་རྒྱུའི་ལས་གཞིར་བསྐྱར་ཞིབ་དགོས་པ་དང་། གློག་འཕྲུལ་ཡིག་ཚགས་ཀྱི་ལས་གཞིའི་ཐོག་རིམ་པ་དང་པོ་དབུས་ཀྱི་ལས་ཁུངས་ཁག་གི་ནང་ལག་བསྟར་འགྲོ་མུས་ཡིན་པ་དང་། མ་འོངས་པར་རིམ་པ་གཉིས་པ་དབུས་སའི་ལས་ཁུངས་དབར་གནང་འཆར་ཡོད་པ། གངས་ལྗོངས་དཔལ་འབྱོར་ཞབས་ཞུ་ཁང་གི་གནས་སྟངས་ཞིབ་ཕྲ། བོད་མིའི་སྒྲིག་འཛུགས་ཀམ་པུ་ཊར་སྡེ་ཚན་ངོས་ནས་བརྡ་འཕྲིན་སྲིད་བྱུས་ཀྱི་ཟིན་བྲིས་ཤིག་བཟོ་བཞིན་ཡོད་པ་སོགས་ཞིབ་ཕྲ་གསུངས་གནང་རྗེས། དཔལ་འབྱོར་ལས་ཁུངས་ཀྱི་སྤྱི་ཡོངས་ལས་བསྡོམས་ཐོག་བགྲོ་གླེང་མཇུག་བསྒྲིལ་གནང་སོང་།དེ་རྗེས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཤེས་རིག་ལས་ཁུངས་མ་ལག་དང་བཅས་པའི་ཕྱི་ལོ་ ༢༠༢༣་་་༢༤ ལོའི་ལོ་འཁོར་ལས་བསྡོམས་སྙིང་བསྡུས་སྙན་སྒྲོན་གནང་བ་དང་། སྤྱི་འཐུས་རྒྱུན་ལས་ཀྱིས་ཤེས་རིག་ལས་ཁུངས་མ་ལག་དང་བཅས་པའི་ཕྱི་ལོ་ ༢༠༢༣་་་༢༤ ལོའི་ལོ་འཁོར་ལས་བསྡོམས་རྒྱས་པར་ཞིབ་འཇུག་གནང་བའི་སྙན་ཐོ་སྤྱི་འཐུས་སློབ་དཔོན་ཐུབ་བསྟན་རྒྱལ་མཚན་ལགས་ཀྱིས་སྙན་སྒྲོན་གནང་རྗེས། སྤྱི་འཐུས་རྒྱལ་ལྡོང་ཕུར་པ་རྡོ་རྗེ་ལགས་ཀྱིས་གོང་གསལ་ལས་བསྡོམས་དང་། ཞིབ་འཇུག་གནང་བའི་སྙན་ཐོ་སྙན་སྒྲོན་ཟིན་པ་རྣམས་ལ་བགྲོ་གླེང་དགོས་པའི་གྲོས་འཆར་བཏོན་གནང་བར། སྤྱི་འཐུས་སློབ་དཔོན་ཐུབ་བསྟན་རྒྱལ་མཚན་ལགས་ཀྱིས་རྒྱབ་སྐྱོར་གནང་རྗེས། ཤེས་རིག་ལས་ཁུངས་མ་ལག་དང་བཅས་པའི་ལས་བསྡོམས་ཐོག་སྤྱི་ཡོངས་ནས་བགྲོ་གླེང་གནང་འགོ་འཛུགས་ཡོད་པ་བཅས། །