༄༅། །ཕྱི་ལོ་ ༢༠༢༤ ཟླ་ ༠༩ ཚེས་ ༡༢ ཉིན་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་གོ་སྒྲིག་འོག་རྡ་ས་སྦྱོང་བརྡར་བསྟི་གནས་ཁང་དུ་དགེ་རྒན་ཆེད་ལས་ཡར་རྒྱས་ཀྱི་བགྲོ་གླེང་ཚོགས་འདུ་ཞིག་འཚོགས་གནང་ཡོད། ཚོགས་འདུ་འདིའི་བརྒྱུད་དགེ་རྒན་སོ་སོའི་ཉམས་མྱོང་བརྗེ་རེས་དང་། ཉམས་ཞིབ་ཀྱི་རྩལ་གོང་མཐོར། མཉམ་འབྲེལ་དང་གསར་གཏོད་ཀྱི་ནུས་པ་གོང་མཐོར་གཏང་རྒྱུ་སོགས་བྱེད་སྒོ་ཁག་བརྒྱུད་ལག་བསྟར་གནང་ཕྱོགས་ཐོག་གྲོས་བསྡུར་གནང་གི་ཡོད།
བགྲོ་གླེང་དེའི་ཐོག་མཉམ་ཞུགས་གནང་མཁན་རྣམས་དེབ་སྐྱེལ་ཞུས་ཟིན་པའི་དགེ་རྒན་ ༤༥ ལས་དགེ་རྒན་གྲངས་ ༢༦ འདེམས་སྒྲུག་གནང་ཡོད་ཅིང་། དེའི་ཁྲོད་དུ་གཏམ་བཤད་པ་ ༩ དང་། དམིགས་བསལ་གཏམ་བཤད་པ་ ༣ མགྲོན་འབོད་གནང་ཡོད། ཚོགས་འདུ་དེ་བཞིན་ཉིན་གསུམ་རིང་འཚོག་རྒྱུ་ཡིན་པ་དང་། གཏམ་བཤད་པ་རྣམས་ནས་སློབ་གྲྭ་དང་འབྲེལ་བའི་བྱེད་སྒོ་ཁག་དང་། རང་ཉིད་ཀྱི་ཆེད་ལས་ཀྱི་ཉམས་མྱོང་སོགས་ཀྱི་ཐོག་གཏམ་བཤད་གནང་གི་ཡོད།
དེ་ཡང་ཚོགས་འདུའི་དབུ་འབྱེད་མཛད་སྒོའི་ཐོག་ཤེས་རིག་ལས་ཁུངས་ཀྱི་དྲུང་གཞོན་ཚེ་རིང་དབྱངས་སྐྱིད་ལགས་ཀྱིས་དབུ་འབྱེད་གཏམ་བཤད་གནང་རྗེས་ཤེས་རིག་ཤེས་ཡོན་ཚན་པའི་འགན་འཛིན་བསྟན་འཛིན་རྡོ་རྗེ་ལགས་ཀྱིས་ཚོགས་འདུ་དེའི་དགོས་དམིགས་དང་། དེར་མཉམ་ཞུགས་པའི་འདེམས་སྒྲུག་གི་བརྒྱུད་རིམ་སྐོར་ངོ་སྤྲོད་གནང་ཡོད། དེ་བཞིན་ཁོང་གིས་ལོ་བཅུའི་བརྒྱུད་རིམ་ནང་བོད་སློབ་ཁག་ཏུ་དགེ་རྒན་གྱི་ནུས་རྩལ་གོང་མཐོར་དང་ཡར་རྒྱས་ཕྱིན་ཡོད་པའི་སྐོར་ཡང་འགྲེལ་བརྗོད་གནང་ཡོད།
ཐེངས་འདིའི་བགྲོ་གླེང་དེ་བཞིན་ཨ་རིའི་རོགས་ཚོགས་ (USAID) ནས་མཐུན་འགྱུར་གནང་ཡོད་པ་བཅས།།
