༄༅། །ཕྱི་ལོ་ ༢༠༢༤ ཟླ་བ་ ༠༩ ཚེས་ ༠༢ ཉིན་ལྡི་ལི་སྐུ་ཚབ་དོན་ཁང་དུ་རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མའི་ཚོགས་འདུ་ཞིག་བསྐོང་ཚོགས་གནང་ཡོད།
དེ་ཡང་ཚོགས་འདུའི་ཐོག་མར་འཕགས་བོད་འབྲེལ་མཐུད་ལས་ཁང་གི་འབྲེལ་མཐུད་ལས་ཚབ་བཀྲ་ཤིས་བདེ་སྐྱིད་ལགས་ནས་ཕེབས་བསུའི་གསུང་བཤད་དང་སྦྲགས་འཕགས་བོད་འབྲེལ་མཐུད་ལས་ཁང་གི་ལས་བྱེད་གསར་བསྐོ་གཉིས་ངོ་སྤྲོད་གནང་ཡོད། ཚོགས་འདུའི་ཐོག་རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མའི་རྒྱལ་ཡོངས་ཚོགས་གཙོ་སྐུ་ཞབས་རིན་ཆེན་མཁའ་འགྲོ་ལགས་ཀྱིས་གཙོ་སྐྱོང་གནང་བ་དང་ཆབས་ཅིག། བོད་དོན་ཐོག་རྒྱབ་སྐྱོར་གནང་མཁན་ཚེ་འདས་སློབ་དཔོན་ར་མེཤ་ཏི་ཝ་རི་ལགས་ཀྱི་ཆེད་སྐར་མ་གཉིས་རིང་མྱ་ངན་གུས་འདུད་ཞུས་གྲུབ་མཚམས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཁམས་དྭངས་བསྐྱེད་དང་། སྐུ་ཚེ་ཡུན་རིང་བརྟན་པའི་སྨོན་འདུན་ཞུས་ཡོད།
ཚོགས་འདུ་དེར་འཕགས་བོད་འབྲེལ་མཐུད་ལས་ཁང་ནས་མཐུན་འགྱུར་གནང་ཡོད་ཅིང་། སྐབས་དེར་རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མའི་ཚོགས་གཙོ་སྐུ་ཞབས་རིན་ཆེན་མཁའ་འགྲོ་ཁིར་མེ་ལགས་དང་། ཟུང་སྦྲེལ་ཚོགས་གཙོ་སྐུ་ཞབས་སུ་རེན་དྲ་ཀུ་མཱར་ལགས། ཟུང་སྦྲེལ་ཚོགས་གཙོ་སྐུ་ཞབས་ཨར་ཝིནྜ་ནི་ཀོ་སེ་ལགས། དེ་བཞིན་རྒྱ་གར་བོད་དོན་རྒྱབ་སྐྱོར་ཚོགས་པའི་སྡེ་ཚན་ནང་མའི་ས་གནས་འབྲེལ་མཐུད་པ་འབུམ་རམས་པ་སན་ཇེ་ཤུག་ལཱ་ལགས་དང་། སྐུ་ཞབས་སཽ་རབ་ས་ར་སཝཊ་ལགས། སྐུ་ཞབས་སུ་དྷེཤ་ཀུ་མཱར་ལགས། སྐུ་ཞབས་སན་དྷེཤ་མེཤ་རམ་ལགས། འབུམ་རམས་པ་ཨ་མིཊ་ཇྱོ་ཡི་ཀར་ལགས། སྐུ་ཞབས་ཀར་ཝ་ཊ་ཀ་ལགས། སྐུ་ཞབས་པུ་དུ་ཨ་དྷ་ཝན་ལགས། གཞན་ཡང་འཕགས་བོད་འབྲེལ་མཐུད་ལས་ཁང་གི་འབྲེལ་མཐུད་ལས་ཚབ་བཀྲ་ཤིས་བདེ་སྐྱིད་ལགས་དང་། རྩིས་པ་མིག་དམར་མཚམས་གཅོད་ལགས། ལས་འཆར་འགན་འཛིན་ངག་དབང་ཆོས་ལྡན་ལགས་བཅས་ཡོད།
ཚོགས་འདུའི་སྐབས་གཤམ་གསལ་གནད་དོན་ཐོག་གྲོས་བསྡུར་གནང་ཡོད།
༡༽ ཕྱི་ལོ་ ༢༠༢༥ ཟླ་བ་ ༠༧ ཚེས་ ༠༦ ཉིན་༸གོང་ས་མཆོག་གི་སྐུའི་འཁྲུངས་སྐར་དང་སྟབས་བསྟུན་ལོ་འཁོར་མོའི་རིང་སྙིང་རྗེའི་ལོ་ཞེས་སྲུང་བརྩི་ཞུ་རྒྱུ།
༢༽ འདི་ལོའི་ཟླ་ ༡༢ ནང་དགུན་དུས་གྲོས་ཚོགས་སྐབས་རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མའི་ཚོགས་གཙོ་དང་ཟུང་སྦྲེལ་ཚོགས་གས་རྒྱ་གར་གྲོས་ཚོགས་འཐུས་མི་ལྷན་མཇལ་མོལ་གནང་རྒྱུ།
༣༽ ས་གནས་ཁག་གི་གསར་འགོད་པ་དང་མཉམ་འབྲེལ་གྱིས་བོད་དོན་སྐོར་གོ་རྟོགས་སྤེལ་རྒྱུ།
༤༽ ཕྱི་སྲིད་ལས་ཁུངས་ཀྱི་སློབ་སྟོན་ཚོགས་ཆུང་དང་ལྷན་དུ་ཚོགས་འདུ་འཚོག་རྒྱུ།
དེ་བཞིན་ཚོགས་འདུའི་ཐོག་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ཚོགས་འདུ་ཐེངས་བདུན་པའི་རྗེས་ནས་ད་བར་སྤེལ་བའི་ལས་དོན་སྐོར་བགྲོ་གླེང་དང་། བོད་ཀྱི་ཉིན་མོའི་ལས་འཆར་རྒྱུན་སྐྱོང་། རྒྱ་གར་མངའ་སྡེའི་སྲིད་གཞུང་ལྷན་རྒྱ་གར་གྱི་གྲོང་ཁྱེར་ལག་ནཽ་རུ་བོད་ཀྱི་སྨན་རྩིས་ཁང་ཆེད་ས་ཆའི་མཐུན་འགྱུར་ཞུ་ཕྱོགས། བོད་ཀྱི་རིག་གཞུང་དང་བོད་དོན་ཆབ་སྲིད་སྐོར་ཟབ་སྦྱོང་འཚོག་རྒྱུར་འབད་རྩོལ་གནང་དགོས་པའི་འབོད་སྐུལ་ཞུས་ཡོད།
མཐར་འཕགས་བོད་འབྲེལ་མཐུད་ལས་ཁང་གི་ལས་འཆར་འགན་འཛིན་ངག་དབང་ཆོས་ལྡན་ལགས་ནས་ཐུགས་རྗེ་ཆེ་ཞུའི་གསུང་བཤད་གནང་སྟེ་ཚོགས་འདུ་མཇུག་སྒྲིལ་ཡོད་པ་བཅས།།
