༄༅། །བོད་མིའི་སྒྲིག་འཛུགས་ནས་རྒྱ་གར་རྒྱལ་ས་ལྡི་ལིར་རྟེན་གཞི་བྱས་པའི་རྒྱ་གར་རྒྱལ་སྤྱིའི་ལྟེ་གནས་ཁང་ (India International Centre) དུ་བོད་ཀྱི་ཁྱད་ནོར། བྱམས་སྙིང་རྗེ་དང་རིག་གཞུང་ཞེས་པའི་དུས་སྟོན་སྲུང་བརྩི་གནང་ཡོད་པ་རེད།

དེ་ཡང་དུས་སྟོན་སྐབས་དཔེ་དེབ་དང་། ལེགས་སྦྱང་དང་འབྲེལ་བའི་ཅ་དངོས་འགྲེམས་སྟོན། བོད་ཟས་འགྲེམས་ཚོང་། རྡུལ་ཚོན་དཀྱིལ་འཁོར་བཞེངས་རྒྱུ། རིག་གཞུང་འཁྲབ་སྟོན། བོད་ཀྱི་གནའ་རབས་ལོ་རྒྱུས་དང་ཆབ་སྲིད་བཅས་ཀྱི་གནད་དོན་འདྲ་མིན་ཐོག་མཁས་པའི་གསུང་བཤད་དང་བགྲོ་གླེང་། དེ་བཞིན་འགྲོ་ཕན་བོད་ཀྱི་སྨན་རྩིས་ཁང་ནས་གསོ་བ་རིག་པ་དང་སྐར་རྩིས་ངོ་སྤྲོད་དང་བརྟག་དཔྱད། བོད་གནད་དང་འབྲེལ་བའི་བརྙན་འཕྲིན་གཟིགས་འབུལ་ཞུ་གནང་གི་ཡོད་པ་རེད།

བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་དུས་སྟོན་དབུ་འབྱེད་གནང་ཡོད་པ་དང་། དུས་སྟོན་དབུ་འབྱེད་ཀྱི་བགྲོ་གླེང་སྐབས་དཔལ་ལྡན་སྲིད་སྐྱོང་མཆོག་གིས་བོད་དང་རྒྱ་གར་གྱི་འབྲེལ་བ། རྒྱ་ནག་གཞུང་གིས་བོད་མིའི་རིག་གཞུང་དང་མི་རིགས་ཀྱི་ངོ་བོ་རྩ་མེད་གཏོང་བཞིན་པའི་སྲིད་བྱུས་སྐོར། བཀའ་ཤག་གིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་དགོངས་གཞི་ལྟར་གཏན་ལ་ཕབ་པའི་དབུ་མའི་ལམ་གྱི་སྲིད་བྱུས་གཞིར་བཟུང་བོད་རྒྱའི་དཀའ་རྙོག་སེལ་ཐབས་བྱེད་བཞིན་ཡོད་པ། ཨ་རིའི་གྲོས་ཚོགས་ནས་གཏན་འབེབས་གནང་བའི་བོད་རྒྱའི་རྩོད་རྙོག་སེལ་བར་སྐུལ་འདེད་ཀྱི་ཁྲིམས་ཡིག་སོགས་རྒྱལ་སྤྱིའི་གཞུང་དང་མང་ཚོགས་ནས་བོད་དོན་ཐོག་རྒྱབ་སྐྱོར་སྐོར་ངོ་སྤྲོད་གནང་ཡོད་པ་རེད།

ཐེངས་འདིའི་དུས་སྟོན་གོ་སྒྲིག་གནང་མཁན་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་དང་། འཚེ་མེད་ཞི་བའི་ཐེབས་རྩ་ཁང་། (Foundation for Non-violent Alternatives)  བོད་ཀྱི་ཐེབས་རྩ། ཨ་རིའི་རོགས་ཚོགས་བཅས་མཉམ་རུབ་ཐོག་ནས་གནང་ཡོད་པ་རེད། དུས་སྟོན་དུས་ཡུན་ཟླ་ ༩ ཚེས ༣ ནས་ ༥ བར་ཡིན་པ་དང་། གསུང་བཤད་གནང་མཁན་ཁོངས་སུ་བཀའ་བློན་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག་དང་། ༧སྐྱབས་རྗེ་ཡོངས་དགེ་མི་འགྱུར་རིན་པོ་ཆེ་སོགས་ཕྱི་ནང་མཁས་པ་དང་ཤེས་ཡོན་ཅན་མང་དག་ཅིག་ཡོད་པ་རེད། དུས་སྟོན་ཉིན་དང་པོར་མི་མང་ ༥༠༠ ཙམ་འདུ་འཛོམས་བྱུང་ཡོད་པ་བཅས། །