༄༅། །འདི་གར་ཆོས་རིག་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ ཟླ་བ་ ༩ ཚེས་ ༡༣ ཉིན་མོན་གྷོ་སྔ་འགྱུར་རྡོར་བྲག་གསང་སྔགས་ཆོས་འཁོར་གླིང་གི་རྡོ་རྗེ་སློབ་དཔོན་བཤད་སྒྲུབ་ཡོན་ཏན་བཟང་པོ་མཆོག་མཁན་པོ་མངའ་གསོལ་རྟེན་འབྲེལ་གྱི་མཛད་སྒོར་ཆོས་རིག་དྲུང་ཆེ་མཉམ་ཞུགས་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠།༣༠ ཐོག་རྡོ་རྗེ་སློབ་དཔོན་བཤད་སྒྲུབ་ཡོན་ཏན་བཟང་པོ་མཆོག་འདུ་ཁང་དུ་ཕེབས་གྲུབ་མཚམས་རྟེན་གཙོ་རྣམས་ལ་སྐུ་ཕྱག་ཕུལ་ཏེ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཞུགས་ཁྲི་རིན་པོ་ཆེ་དང་། སིམ་ལ་མ་དགོན་རྡོ་རྗེ་བྲག་མཁན་རིན་པོ་ཆེ་མཆོག་ལ་མཇལ་དར་ཕུལ་རྗེས། ༸སྐྱབས་རྗེ་ལ་ཆུང་རིན་པོ་ཆེའི་སྐུ་ཚབ་མཆོག་སྤྲུལ་ངག་དབང་བསྟན་འཛིན་མཆོག་གི་དྲུང་ནས་པཎ་ཞྭ་དང་མཁན་པོའི་ཕྱག་འཁྱེར་བཞེས་ཏེ་མཁན་པོའི་ཁྲིར་འཁོད།
དེ་རྗེས་སིམ་ལ་མ་དགོན་རྡོ་རྗེ་བྲག་མཁན་རིན་པོ་ཆེ་མཆོག་ནས་༸སྐྱབས་རྗེ་ལ་ཆུང་རིན་པོ་ཆེའི་གསུང་འཕྲིན་སྒྲོགས་སྦྱང་དང་མཁན་པོ་བཤད་སྒྲུབ་ཡོན་ཏན་བཟང་པོ་མཆོག་གི་མཛད་རྣམ་སྙིང་བསྡུས་སྙན་སྒྲོན་ཞུས། དེ་ནས་མོན་གྷོ་རྡོ་རྗེ་བྲག་གསང་སྔགས་ཆོས་འཁོར་གླིང་འདུས་སྤྱི་དང་། ཆོས་རིག་དྲུང་ཆེ། སྔ་འགྱུར་མ་དགོན་ཆེན་མོ་དྲུག་གི་ཡ་གྱལ་བྱང་གཏེར་ཆོས་བརྒྱུད་འཛིན་པའི་དགོན་སྡེ་སིམ་ལ་ཐུབ་བསྟན་རྡོ་རྗེ་བྲག་ཨེ་ཝཾ་ལྕོག་སྒར། སྒང་ཏོག་གུ་རུ་སྐུ་འབུམ་སྟག་ལུང་གསང་སྔགས་ཆོས་འཁོར་གླིང་། གནས་ཆུང་སྐུ་རྟེན་མཆོག་གི་སྐུ་ཚབ་བདེ་ཡངས་རིན་པོ་ཆེ་མཆོག འབྲས་ལྗོངས་མངའ་བདག་དགོན། དགའ་གདོང་གསལ་བྱེད་གླིང་གྲྭ་ཚང་། གནས་ཆུང་སྒྲ་དབྱངས་གླིང་གྲྭ་ཚང་། ལ་དྭགས་བྲག་ཐོག་དགོན། སྒང་ཏོག་དགོན་བྱང་དགོན་དང་། དེ་བཞིན་འབྲི་གུང་བཀའ་བརྒྱུད་དགོན་བླ་མ་ཆོས་བཟང་མཆོག་དང་། མོན་གྷོ་ས་འཐུས་ཚོགས་གཙོ་དང་ས་གནས་འགོ་འཛིན་རྣམ་གཉིས་བཅས་ནས་རིམ་བཞིན་མཁན་པོ་བཤད་སྒྲུབ་ཡོན་ཏན་བཟང་པོ་མཆོག་ལ་མཎྜལ་སྐུ་གསུང་ཐུགས་རྟེན་འདེགས་འབུལ་ཞུས། དེ་ནས་གདན་ས་བླ་སྤྱི་རྣམ་གཉིས་ཀྱིས་དབུས་པའི་གྲྭ་ཚང་ཁག་གི་ཕྱག་མཛོད་ལྷན་རྒྱས་དང་། དེ་བཞིན་སྐུ་མགྲོན་རྣམ་པ་དང་དད་ལྡན་མང་ཚོགས་ནས་མཁན་པོ་མཆོག་ལ་མཇལ་དར་སྒྲོན་འབུལ་ཞུས་ཏེ་མཁན་པོ་མངའ་གསོལ་རྟེན་འབྲེལ་མཛད་སྒོ་གྲོལ། །
