༄༅། །ཕྱི་ལོ་ ༢༠༢༤ ཟླ་བ་ ༠༩ ཚེས་ ༠༩ ཉིན་ཏེ་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་ཐུན་ཐེངས་ ༥༧ པའི་ཉིན་དང་པོར་སུད་སི་དང་ལེག་ཊིན་ཚིན་བོད་མི་རྣམས་ནས་བོད་ནང་རྒྱ་ནག་གཞུང་གི་དབང་སྒྱུར་འོག་འགྲོ་བ་མིའི་ཐོབ་ཐང་གནས་བབ་ཇེ་སྡུག་ཏུ་འགྲོ་བཞིན་པར་རྒྱལ་ཚོགས་ཀྱི་ཚོགས་ཁང་མདུན་དུ་ངོ་རྒོལ་སྐད་འབོད་གནང་ཡོད། དེ་ཡང་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་འདུ་ཐེངས་ ༥༧ པ་དེ་ཕྱི་ལོ་ ༢༠༢༤ ལོའི་ཚོགས་ཐུན་མཐའ་མ་ཡིན་པ་དང་། དེ་ཉིད་ཕྱི་ལོ་ ༢༠༢༤ ཟླ་བ་ ༩ ཚེས་ ༩ ནས་འགོ་བཙུགས་ཏེ་ཕྱི་ཟླ་ ༡༠ ཚེས་ ༡༡ བར་འཚོག་གི་ཡོད་ཅིང་། སྐབས་དེར་འདུ་འཛོམས་ཐོག་སུད་སི་སྐུ་ཚབ་དོན་ཁང་གི་རྒྱལ་ཚོགས་འབྲེལ་མཐུད་པ་ཕུན་ཚོགས་སྟོབས་རྒྱལ་ལགས་ཀྱིས་གསུང་བཤད་གནང་སྐབས། ཉེ་ལམ་མཉམ་འབྲེལ་རྒྱལ་ཚོགས་ཀྱི་དམིགས་བསལ་ཆེད་མཁས་པ་ ༡༣ གྱིས་མཉམ་འབྲེལ་རྒྱལ་ཚོགས་དང་། རྒྱ་ནག་གི་གློག་ཁང་བཟོ་མཁན་ཁེ་ལས་ཚོགས་པ་ (Huadian Jinsha River Upstream Hydropower Development Co. Ltd) བཅས་ལ་ཡིག་འབྲེལ་བཏང་སྟེ། འབྲི་ཆུའི་འགྲམ་དུ་གསར་རྒྱག་བྱེད་བཞིན་པའི་སྐམ་ཐོག་ཆུ་གློག་ལས་གཞིས་རྐྱེན་པས། ས་གནས་བོད་མི་རྣམས་བཙན་དབང་གིས་གནས་སྤོ་བྱེད་དགོས་པའི་ཉེན་ཁ་ཡོད་པར་སེམས་འཚབ་ཆེན་པོ་བསྟན་ཡོད་པ་དང་། དེ་ཉིད་འགྲོ་བ་མིའི་ཐོབ་ཐང་རྡོག་རོལ་གཏང་བ་ཙམ་མ་ཡིན་པར། བོད་མི་མི་རབས་མང་པོའི་རིང་ནས་གཅེས་འཛིན་བྱེད་པའི་ཆོས་ཕྱོགས་ཀྱི་ས་ཚིགས་དང་། ཁོར་ཡུག་ལའང་གནོད་སྐྱོན་ཚབས་ཆེན་གཏོང་སྲིད་པའི་ཉེན་ཁ་ཆགས་ཡོད་སྐོར་བློ་འཚབ་བསྟན་པ་གསལ་བཤད་གནང་ཡོད། དེ་བཞིན་ཁོང་གིས་བོད་མི་རྣམས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ལམ་སྟོན་སྙིང་བཅངས་ཀྱིས་བོད་དོན་རང་དབང་འཐབ་རྩོད་ལ་མུ་མཐུད་ཆིག་སྒྲིལ་གྱིས་འབད་འབུངས་བྱས་ན། བོད་མིའི་འཐབ་རྩོད་ལ་གྲུབ་འབྲས་སོན་ངེས་ཡིན་པ་གསུངས་ཡོད།བོད་མི་མང་སྤྱི་ཟུར་དང་སུད་བོད་མཛའ་འབྲེལ་ཚོགས་པའི་ཚོགས་གཙོ་ཟམ་མདོ་བྱམས་པ་ཚེ་རིང་ལགས་ཀྱིས་གསུང་དོན། མཉམ་འབྲེལ་རྒྱལ་ཚོགས་ཀྱིས་རྒྱ་ནག་གི་འགྲོ་བ་མིའི་ཐོབ་ཐང་གནས་བབ་ཐོག་དུས་བཀག་བསྐྱར་ཞིབ་ཐེངས་བཞི་པ་གནང་བའི་སྐབས། རྒྱལ་ཁབ་ ༢༤ ཡིས་རྒྱ་ནག་གཞུང་ལ་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཡར་རྒྱས་གཏོང་དགོས་པའི་རེ་འདུན་བཏོན་ཡོད། དགོས་འདུན་འདི་དག་གིས་བོད་ནང་གི་གནས་སྟངས་ལ་རྒྱལ་སྤྱིའི་སྤྱི་ཚོགས་ནས་སེམས་འཚབ་གནང་གི་ཡོད་པ་མཚོན་གྱི་ཡོད་ཅེས་དང་། དེ་བཞིན་ཁོང་གིས་མུ་མཐུད་རྒྱ་ནག་གཞུང་གིས་བོད་མིའི་ཐོབ་ཐང་དང་། རིག་གཞུང་། རང་སྐྱོང་ལ་བརྩི་བཀུར་དང་། བོད་ཀྱི་ཆབ་སྲིད་བཙོན་པ་གྲོད་བཀྲོལ་གཏོང་དགོས་པའི་འབོད་སྐུལ་ཞུས་ཡོད།

ཡུ་རོབ་བོད་ཀྱི་གཞོན་ནུ་ཚོགས་པའི་སྐུ་ཚབ་འབྱོར་ལྡན་ལགས་ཀྱིས་གསུང་དོན། མཉམ་འབྲེལ་རྒྱལ་ཚོགས་ཀྱིས་རྒྱ་ནག་གི་བཙན་གནོན་དབང་སྒྱུར་འོག་བོད་མི་ཚོའི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནད་དོན་ཐོག་ཐུགས་སྣང་གནང་དགོས། བོད་མི་ཚོས་རང་དབང་གི་འཐབ་རྩོད་མཚམས་འཇོག་བྱས་མེད་ཅིང་། རྒྱལ་སྤྱིའི་སྤྱི་ཚོགས་དང་ལྷག་པར་དུ་མཉམ་འབྲེལ་རྒྱལ་ཚོགས་ཀྱིས་མྱུར་དུ་ཐབས་ལམ་བཏོན་ནས་རྒྱ་ནག་གཞུང་གིས་བོད་ནང་འགྲོ་བ་མིའི་ཐོབ་ཐང་ལ་བརྡལ་བཤིག་བཏང་བར་འགན་འཁུར་འཇུག་དགོས་པའི་འབོད་སྐུལ་ཞུ་རྒྱུ་ཡིན། ཞེས་གསུངས།

སྐད་འབོད་འདུ་འཛོམས་ཐོག་རི་ཀོན་ཆོས་འཁོར་དགོན་གྱི་མཁན་རིན་པོ་ཆེ་མཆོག་དང་། སྤྱི་ཟུར་ཟམ་མདོ་བྱམས་པ་ཚེ་རིང་ལགས། སྤྱི་ཟུར་གངས་གཞོན་ཚང་ངག་དབང་རྒྱལ་མཚན་ལགས། སྤྱི་ཟུར་ཚེ་རིང་རྡོ་རྗེ་ལགས། སྤྱི་ཟུར་བསོད་ནམས་ལགས། སུད་སི་སྐུ་ཚབ་དོན་ཁང་གི་རྒྱལ་ཚོགས་འབྲེལ་མཐུད་པ་ཕུན་ཚོགས་སྟོབས་རྒྱལ་ལགས། སུད་སི་དང་ལེག་ཏེན་ཚིན་བོད་རིགས་སྤྱི་མཐུན་ཚོགས་པའི་ཚོགས་གཞོན་སྐལ་བཟང་ལགས། སུད་སི་དང་ལེག་ཏེན་ཚིན་བོད་རིགས་སྤྱི་མཐུན་ཚོགས་པའི་ཚོགས་མི་ཉི་མ་སྒྲོལ་མ་ལགས། ཡུ་རོབ་བོད་ཀྱི་གཞོན་ནུ་ཚོགས་པའི་སྐུ་ཚབ་འབྱོར་ལྡན་ལགས། གཞན་ཡང་ས་གནས་བོད་མི་ལྔ་བཅུ་ལྷག་ཙམ་མཉམ་ཞུགས་གནང་ཡོད་པ་བཅས།།