༄༅། །ཕྱི་ལོ་ ༢༠༢༤ ཟླ་བ་ ༠༩ ཚེས་ ༡༠ ཉིན་བོད་ཀྱི་བུད་མེད་ལྷན་ཚོགས་བཙན་བྱོལ་དུ་སླར་གསོ་ཞུས་ཏེ་ལོ་ངོ་ ༤༠ ཧྲིལ་པོ་འཁོར་བའི་དུས་ཆེན་བཞུགས་སྒར་རྡ་རམ་ས་ལའི་བོད་ཀྱི་ཟློས་གར་ཚོགས་པའི་ཚོགས་ཁང་དུ་སྲུང་བརྩི་ཞུས་ཡོད།
དེ་ཡང་གོང་ཚེས་ཉིན་གྱི་ཕྱི་དྲོ་ཆུ་ཚོད་ལྔ་པའི་ཐོག་བོད་ཀྱི་ཟློས་གར་ཚོགས་པའི་ཚོགས་ཁང་དུ་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གཙོས་པའི་བཀའ་ཟུར་རིན་ཆེན་མཁའ་འགྲོ་མཆོག་དང་། བོད་མི་མང་སྤྱི་འཐུས་ལས་ཐོག་ལས་ཟུར་ཁག་ཅིག བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་གཙོས་པའི་རྒྱུན་ལས་རྣམ་པ། བཞུགས་སྒར་ཁུལ་གྱི་ཚོགས་སྡེ་ཁག་གི་སྐུ་ཚབ་སོགས་ཕེབས་ཞུགས་ཐོག་བཙན་བྱོལ་ནང་དུ་བོད་ཀྱི་བུད་མེད་ལྷན་ཚོགས་སླར་གསོ་ཞུས་ཏེ་ལོ་ངོ་ ༤༠ ཧྲིལ་པོ་འཁོར་བའི་དུས་ཆེན་སྲུང་བརྩིའི་མཛད་སྒོ་འཚོགས་ཡོད།
མཛད་སྒོའི་ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བོད་ཀྱི་བུད་མེད་ལྷན་ཚོགས་སླར་གསོ་ཞུས་ཏེ་མི་ལོ་ ༤༠ འཁོར་བར་འཚམས་འདྲི་དང་སྦྲགས། བོད་ཀྱི་བུད་མེད་ལྷན་ཚོགས་ཀྱི་སྒྲིག་འཛུགས་དེ་ཉིད་ཐོག་མར་གསར་འཛུགས་གནང་བ་ནས་བཟུང་ད་བར་བོད་དོན་བསྟན་པ་ཆབ་སྲིད་སླད་ཚགས་ཚུད་རྒྱུན་འཛིན་གནང་མཁན་རྒྱུན་ལས་ཟུར་པ་དང་ལས་ཐོག་རྣམ་པར་བསྔགས་བརྗོད་གནང་བའི་ཐོག ལྷན་ཚོགས་ངོས་ནས་འབྱུང་འགྱུར་ཡང་བོད་མིའི་སྤྱི་ཚོགས་ཁྲོད་བུད་མེད་འགོ་ཁྲིད་སྐྱེད་སྲིང་གནང་དགོས་པའི་ལམ་སྟོན་གནང་ཡོད། དེ་བཞིན་ཁོང་གིས་༸གོང་ས་སྐུ་ཕྲེང་བཅུ་བཞི་པ་ཆེན་པོ་མཆོག་གི་ཐུགས་རྗེ་བཀའ་དྲིན་དང་དབུ་ཁྲིད་ལམ་སྟོན་འོག་བོད་ཆོལ་ཁ་གསུམ་གཅིག་ཏུ་བསྒྲིལ་བའི་ངོ་བོ་ཞིག་སྐྲུན་ཐུབ་པ་བྱུང་ཡོད་པ་དེ་ཉིད་རྒྱུན་འཛིན་གྱིས་ལྟ་ཚུལ་ཕྲན་བུ་མཐུན་མིན་ལ་མ་ལྟོས་པར་བོད་མི་ཕན་ཚུན་མཐུན་ལམ་རྡོག་རྩ་ཆིག་སྒྲིལ་དགོས་རྒྱུར་ཚང་མས་ཐུགས་སྣང་དགོས་པའི་འབོད་སྐུལ་ཞུས་པ་དང་ཆབས་ཅིག བཀའ་ཤག་སྐབས་བཅུ་དྲུག་པའི་ངོས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དགོངས་བཞེད་མཛད་ཅིང་བོད་མི་མང་སྤྱི་འཐུས་ལྷན་ཚོགས་ནས་གཏན་འབེབས་གནང་བའི་གཞུང་འབྲེལ་དབུ་མའི་ལམ་གྱི་སྲིད་བྱུས་གཞིར་བཞག་ཐོག ཐབས་བྱུས་བསྟེན་ཕྱོགས་ལ་འགྱུར་བ་ཕྲན་བུ་བཏང་སྟེ། དབུ་མའི་ལམ་ལ་གདེང་འཇོག་ཐོབ་ཆེད་ལོ་རྒྱུས་ཐོག་ནས་བོད་རང་བཙན་ཡིན་པའི་གནས་བབ་ལ་ངོས་འཛིན་ཡོང་ཐབས་འབད་རྩོལ་གནང་མུས་ཡིན་པ་གསལ་བཤད་གནང་།
ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས་ཆབ་སྲིད་ཀྱི་ལས་དོན་སྒྲུབ་ཐབས་སུ་ལམ་སྟོན་གནང་དོན། ཆབ་སྲིད་ཀྱི་ལས་ཀ་བྱེད་པའི་སྐབས་ང་ཚོས་ཐབས་བྱུས་ལྡན་པའི་ཐོག་ནས་ལས་ཀ་བྱ་རྒྱུ་དེ་ཧ་ཅང་གལ་ཆེན་པོ་རེད། རྒྱུན་ལྡན་ལྟར་ང་ཚོ་ཕར་ཚུར་ཕྱིན། ཐབས་བྱུས་ཀྱང་མེད། དོན་དག་གྲུབ་ནའང་འདྲ་མ་གྲུབ་ནའང་འདྲ། དེ་རིང་བློན་ཆེན་ཞིག་གམ་གྲོས་ཚོགས་འཐུས་མི་ཞིག་ཐུག་པ་ཡིན་ཞེས་པར་བརྒྱབ་ནས་གཞུང་འབྲེལ་དྲྭ་ཚིགས་སུ་བཞག་ནས་དེ་རིང་གཅིག་བྱས་པ་ཡིན་བསམ་པ་ཡིན་ན། དེ་ཏག་ཏག་སྡོད་ཀྱི་མེད། ང་ཚོས་ལས་ཀ་གང་ཞིག་བྱས་ཀྱང་ཐབས་བྱུས་ལྡན་པའི་ཐོག་བྱ་རྒྱུ་དེ་ཧ་ཅང་གལ་ཆེན་པོ་རེད། དེ་འདྲ་ཡིན་དུས་བོད་ཀྱི་བུད་མེད་ལྷན་ཚོགས་ཀྱི་ཕྱག་ལས་གནང་བའི་སྐབས་སུ་ཡིན་ནའང་ཁྱེད་ཚོས་ཐབས་བྱུས་ཚོགས་འདུ་ངེས་པར་དུ་འཚོག་དགོས། ཚོགས་འདུ་དེའང་རིག་པ་ཡོད་མཁན་དང་། བསམ་བློ་ཡོད་མཁན། འཛམ་བུ་གླིང་གི་ཆབ་སྲིད་ལའང་དོ་སྣང་ཡོད་མཁན། རྒྱ་ནག་ཐོག་ལའང་གོ་རྟོགས་ཡོད་མཁན། བོད་ཀྱི་གནས་ཚུལ་ལའང་དོ་སྣང་བྱེད་མཁན་རིགས་བོས་ཏེ། བུད་མེད་ལྷན་ཚོགས་ཀྱི་རྒྱུན་ལས་གསར་པ་ལྟ་བུ་ཕེབས་ཀྱི་ཡོད་ན། འབྱུང་འགྱུར་ལོ་གསུམ་གྱི་ནང་ལ་ལས་དོན་གང་གང་བརྩམ་རྒྱུ་ཡིན་པ་སོགས་ཐབས་བྱུས་བསྟེན་སྟངས་སྐོར་ཚོགས་འདུ་འཚོགས་དགོས།
བོད་མིའི་སྒྲིག་འཛུགས་ལྟ་བུར་མཚོན་པ་ཡིན་ན། ང་ཚོས་རྒྱལ་ཁབ་ཁག་དང་འབྲེལ་བ་བྱེད་དགོས་དུས་ང་ཚོར་རྒྱབ་སྐྱོར་ཡག་པོ་བྱེད་མཁན་རྒྱལ་ཁབ་ཨ་རི་ལྟ་བུར་ང་ཚོས་ལོ་ལྟར་གྲོས་ཚོགས་འཐུས་མི་རྣམ་པ་ལྷན་དུ་ཐབས་བྱུས་ཚོགས་འདུ་འཚོག་གི་ཡོད། ལྷག་པར་ལྕམ་སྐུ་ནན་སི་པི་ལོ་སི་མཆོག་གྲོས་ཚོགས་ཀྱི་ཚོགས་གཙོ་གནང་བའི་སྐབས་ཁོང་མོ་ཚོགས་གཙོ་ཡིན་ནའང་ང་ཚོ་མཉམ་དུ་ཐབས་བྱུས་ཚོགས་འདུ་འཚོག་གནང་སྟེ། ལོ་དེའི་ནང་དུ་ཨ་རི་གཞུང་གིས་བོད་མི་རྣམས་ལ་ཁྲིམས་དང་། དཔལ་འབྱོར་གྱི་ཐོག་ནས་རྒྱབ་སྐྱོར་གང་གནང་ཐུབ་མིན་སྐོར་གྲོས་བསྡུར་གནང་གི་ཡོད། བོད་མིའི་སྒྲིག་འཛུགས་གཅིག་པུའི་ནུས་པས་འདང་གི་མ་རེད། ང་རང་སྲིད་སྐྱོང་ཡིན་ནའང་རྒྱལ་ཁབ་ཉི་ཤུ་རྩ་བཞི་རྩ་ལྔ་བསྐོར་བར་ལོ་གསུམ་ཙམ་འགོར་གྱི་འདུག ད་དུང་ཐེངས་མ་གཉིས་པ་བསྐོར་བ་བརྒྱབ་པར་དུས་ཡུན་དེ་ཚོད་འགོར་གྱི་རེད། དེས་ན། བོད་མིའི་སྤྱི་ཚོགས་ཁྲོད་བོད་དོན་སྐོར་ཞུ་གཏུག་བྱེད་མཁན་ཇི་ཙམ་མང་དུ་ཕྱིན་པ་ཡིན་ན་དེ་ཙམ་གྱིས་བོད་དོན་ལ་ཕན་ཐོགས་ཀྱི་ཡོད། ཅེས་སོགས་དང་།
གཞན་ཡང་སྲིད་སྐྱོང་མཆོག་ནས་བོད་མིའི་ཚོགས་སྡེ་ཁག་ནས་བོད་མིའི་སྒྲིག་འཛུགས་བཀའ་ཤག་སྐབས་སོ་སོའི་ཐབས་བྱུས་བསྟེན་ཕྱོགས་དང་མཉམ་མཐུན་གྱིས་དབུ་འོག་དཔུང་འདེགས་ཞུ་ཐུབ་ན། བོད་དོན་ཞུ་གཏུག་དང་འཐབ་རྩོད་ལ་ནུས་པ་ཆེ་བ་ཐོན་ངེས་ཡིན་པས། ཚང་མས་འབད་འབུངས་གནང་དགོས་པའི་གཞེན་སྐུལ་གནང་བ་མ་ཟད། དེང་གི་དུས་སུ་བོད་མི་གཞོན་སྐྱེས་རྣམས་ལ་དེང་རབས་ཤེས་ཡོན་གྱི་གོ་སྐབས་བཟང་པོ་ཐོབ་ཡོད་སྟབས། དུས་རབས་དང་མཐུན་པའི་སྒོ་ནས་བོད་དོན་དྲིལ་བསྒྲགས་དང་ཞུ་གཏུག་གནང་རྒྱུར་ཧུར་སྐྱེད་གནང་དགོས་པ་གསུངས། དེ་ལས་འཕྲོས་ཏེ་དཔལ་ལྡན་སྲིད་སྐྱོང་མཆོག་གིས་བུད་མེད་ལྷན་ཚོགས་ངོས་ནས་སྤྱི་ཚོགས་བདེ་དོན་དང་ལྷན་དུ་བོད་དོན་ཆབ་སྲིད་ཐོག་རྒྱལ་སྤྱིའི་སྤྱི་ཚོགས་ལ་ཞུ་གཏུག་གནང་རྒྱུ་སོགས་ཀྱི་ལས་དོན་མང་ཙམ་སྤེལ་ཐུབ་ན། གྲུབ་འབྲས་སོན་ངེས་ཡིན་པ་དང་། ལས་དོན་རྩོམ་པའི་སྐབས་སུའང་ཚོགས་སྒེར་མཉམ་རུབ་ཀྱིས་ནུས་པ་སྤུངས་ན་གྲུབ་འབྲས་ཆེ་བ་སོན་རྒྱུ་ཐག་ཆོད་ཡིན་པ་ཉེ་ལམ་ཨ་རིའི་གཞུང་གི་བོད་རྒྱའི་རྩོད་རྙོག་སེལ་ཐབས་ཀྱི་ཁྲིམས་ཡིག་གཏན་འབེབས་ཐུབ་པ་དེ་ལས་རྟོགས་ཐུབ་ཡིན་སྐོར་ལམ་སྟོན་གནང་ཡོད་པ་བཅས།།
