༄༅། །ཕྱི་ལོ་ ༢༠༢༤ ཟླ་བ་ ༠༩ ཚེས་ ༢༧ ཉིན་བོད་མིའི་སྒྲིག་འཛུགས་ཀྱི་ཕྱི་དྲིལ་དྲུང་འཕར་བསྟན་འཛིན་ལེགས་བཤད་ལགས་ནས་ཝར་ཎཱ་དབུས་བོད་ཀྱི་མཐོ་རིམ་སློབ་གཉེར་ཁང་དུ་དབུ་མའི་ལམ་གྱི་སྲིད་བྱུས་སྐོར་གསུང་བཤད་གནང་ཡོད།

དེ་ཡང་ཝར་ཎཱ་དབུས་བོད་ཀྱི་མཐོ་རིམ་སློབ་གཉེར་ཁང་གི་ཉེ་བའི་རིགས་བདག་གཙོས་པའི་དགེ་ལས་སློབ་ཕྲུག་བཅས་ཚང་འཛོམས་ཀྱིས་ཐོག་མར་ཉེ་བའི་རིགས་བདག་འབུམ་རམས་པ་དབང་ཕྱུག་རྡོ་རྗེ་ནེ་གི་མཆོག་གིས་ཕེབས་བསུའི་གསུང་བཤད་གནང་རྗེས་ཕྱི་དྲིལ་དྲུང་འཕར་བསྟན་འཛིན་ལེགས་བཤད་ལགས་ཀྱིས་དབུ་མའི་ལམ་གྱི་ལོ་རྒྱུས་ཐོག་གི་གནས་བབ་དང་། ད་ལྟའི་ཆར་དབུ་མའི་ལམ་གྱི་སྲིད་བྱུས་ལག་བསྟར་གནང་ཕྱོགས་སོགས་ཀྱི་སྐོར་གསུང་བཤད་གནང་ཡོད།

སྐབས་དེར་དགེ་ལས་དང་སློབ་ཕྲུག་བཅས་ནས་དབུ་མའི་ལམ་གྱི་སྲིད་བྱུས་ཐོག་དོ་སྣང་ཆེན་པོའི་ངང་གསན་ཞིབ་གནང་བ་མ་ཟད་དོགས་དྲི་ཕུལ་ཡོད་པ་བཅས།།