༄༅། །འདི་གར་བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་ནས་བཏང་གནས་ནང་འཁོད་དོན། ཤེས་རིག་ལས་ཁུངས་དང་པཱ་ལམ་པུར་ཚན་རིག་ལྟེ་གནས་ཁང་གཉིས་ཟུང་འབྲེལ་ཐོག་ཕྱི་ལོ་ ༢༠༢༤ ཟླ་བ་ ༩ ཚེས་ ༡༦ ནས་ ༢༠ བར་སློབ་གྲྭའི་ཚན་རིག་བརྟག་དཔྱད་ཁང་གི་དོ་དམ་དགེ་རྒན་རྣམས་ལ་ནུས་པ་གོང་འཕེལ་གྱི་ཉིན་ལྔའི་རིང་ཟབ་སྦྱོང་ལེགས་གྲུབ་བྱུང་ཡོད།
དེ་ཡང་ལས་རིམ་འདིའི་ནང་དུ་བཙན་བྱོལ་བོད་མིའི་སློབ་གྲྭ་ཁག་ ༢༢ ནས་ཚན་རིག་དགེ་རྒན་དང་། བརྟག་དཔྱད་ཁང་གི་དོ་དམ་དགེ་རྒན་བཅས་མི་གྲངས་ ༢༥ མཉམ་ཞུགས་གནང་སྟེ། གཙོ་བོ་བརྟག་དཔྱད་ཁང་གི་འཛིན་སྐྱོང་དང་། ཡོ་ཆས་བེད་སྤྱོད། བདེ་འཇགས་ལམ་སྟོན་སོགས་དངོས་སུ་ལག་ལེན་བྱེད་ཕྱོགས་སྐོར་ལ་དམིགས་འཛུགས་བྱས་ཡོད། མཉམ་ཞུགས་པའི་ཁྲོད་དུ་སམ་བྷོ་ཊ་བོད་སློབ་ཁག་ ༡༣ ནས་སྐུ་ཚབ་ ༡༤ དང་། བོད་ཕྲུག་ཁྱིམ་སྡེའི་སློབ་གྲྭ་ཁག་ ༧ ནས་སྐུ་ཚབ་ ༨ ། མ་སུ་རི་བོད་ཁྱིམ་སློབ་ཁག་གཉིས་ནས་སྐུ་ཚབ་ ༢ ། དེ་བཞིན་ཤེས་རིག་ལས་ཁུངས་ཀྱི་ཚན་རིག་སློབ་དེབ་རྩོམ་སྒྲིག་པ་ལྕགས་ཐར་འབུམ་ལགས་བཅས་མཉམ་ཞུགས་གནང་ཡོད།
མཉམ་ཞུགས་པ་རྣམས་ཀྱི་བསླབ་གཞི་ཁག་ནི། དངོས་ཁམས་རིག་པ་དང་། སྐྱེ་དངོས་རིག་པ། རྫས་འགྱུར་རིག་པ་བཅས་ཡིན་སྟབས། འོད་རིག་དང་། གློག་ཁབ་ལེན་གྱི་འགྱེད་འཕྲོ་བྱེད་ཚུལ། གློག་ལམ་ནང་གི་གློག་འགོག་གི་དབྱེ་ཞིབ། འདུས་རྡུལ་མངོན་སྟོན། སྐྱུར་དང་བུལ་རྫས་གཉིས་བར་སྙོམས་བཟོ་ཚུལ། ཙོང་རྡོག་ཕྱི་ཤུན་སོགས་ཀྱི་གནས་སྐབས་སྒྲིག་ལེབ་བཟོ་སྟངས། རྩི་ཤིང་དབྱེ་འབྱེད། སིམ་ནུས་ཀྱི་བརྒྱུད་རིམ་སོགས་ཀྱི་ལག་ལེན་དངོས་ལ་སྦྱོང་བརྡར་བྱས་པ་མ་ཟད། ཚན་རིག་ཁྲིད་ཆས་བཟོ་སྐྲུན་གྱི་ཐབས་ལམ་དང་ཕྲ་མཐོང་ཆེ་ཤེལ་བཟོ་བཅོས་ཀྱང་ངོ་སྤྲོད་བྱས་ཡོད་འདུག
མཇུག་བསྡོམས་མཛད་སྒོའི་སྐབས་ཤེས་རིག་ལས་ཁུངས་ཀྱི་ཤེས་ཡོན་ཚན་པའི་འགན་འཛིན་བསྟན་འཛིན་རྡོ་རྗེ་ལགས་སྐུ་མགྲོན་གཙོ་བོར་ཕེབས་ནས་མཉམ་ཞུགས་པ་རྣམས་ལ་རང་ཉིད་ཀྱི་ཆེད་ལས་ཡར་རྒྱས་ནང་དུ་ཆ་ཤས་ལེན་དགོས་པའི་སྐུལ་མ་གནང་ཡོད་པ་དང་། པཱ་ལམ་པུར་ཚན་རིག་ལྟེ་གནས་ཁང་གི་འགན་འཛིན་དང་ལས་འཆར་འབྲེལ་མཐུད་པ་སྐུ་ཞབས་རཱམ་སཱ་རུབ་ལགས་ཀྱིས་ཤེས་ཡོན་སྡེ་ཁག་གིས་ནུས་པ་མཉམ་སྤུངས་ཀྱིས་མཉམ་ལས་ཐོག་མུ་མཐུད་ཤུགས་སྣོན་བྱེད་རྒྱུ་དང་། མ་འོངས་པར་ཤེས་རིག་ལས་ཁུངས་དང་ལྷན་དུ་ཚན་རིག་ཤེས་ཡོན་གོང་ཐོར་གཏོང་རྒྱུའི་འདུན་པ་ཡོད་སྐོར་འགྲེལ་བརྗོད་གནང་། དེ་ནས་སྐུ་མགྲོན་གཙོ་བོ་ནས་མཉམ་ཞུགས་པ་ཡོངས་ལ་ཕྱག་འཁྱེར་སྩལ་བ་དང་། མཐའ་མར་ཤེས་རིག་ལས་ཁུངས་ཀྱི་ཚན་རིག་ཤེས་ཡོན་འགན་འཛིན་རྡོ་རྗེ་དབང་འདུས་ལགས་ནས་ཟབ་སྦྱོང་ལ་མཉམ་ཞུགས་གནང་མཁན་དང་སློབ་སྟོན་པ་རྣམས་ལ་ཐུགས་རྗེ་ཆེ་ཞུས་པ་དང་ཆབས་ཅིག་ཟབ་སྦྱོང་གི་ལམ་ལྷོངས་བྱུང་བར་བསྔགས་བརྗོད་ཞུས།
ཐེངས་འདིའི་མཉམ་ཞུགས་པ་རྣམས་ཀྱི་བཞུགས་གནས་དང་ཞལ་ལག་གི་མཐུན་རྐྱེན་གོ་པལ་པུར་བོད་ཁྱིམ་ནས་སྦྱར་ཡོད་པ་དང་། ཨ་རིའི་རོགས་ཚོགས་ནས་བོད་ཀྱི་ཐེབས་རྩ་བརྒྱུད་རོགས་དངུལ་མཐུན་འགྱུར་གནང་བ་ཡིན་འདུག །
